Génesis 46 - Kuna San Blas

2e. Jacob e-machimalabo Egipto-yarse-nonikid (46:1–50:26) Jacob Egipto-yarse megnaded

¹ Israel Egipto-yarse nadegusad, bela ibmar-nikad sesa gusad. Israelʼde Jacobʼye nugbalid. Beerseba-neggweburse mosgu, e-bab-Isaac-e-Bab-Dummadga ibmar-ogumakar uksad. We-Bab-Dummadde e-bab-Isaac-e-Bab-Dummadmogad.

² A-mutikidba Bab-Dummad Israelʼga gabdakedba sunmaksad. Jacobʼse e-nugba gornonikid: —¡Jacob! Jacob Bab-Dummad-abin sogded: —Wegi an be-itomai.

³ Geb degi, Bab-Dummad sogded: —Ani, an Bab-Dummadid, be-bab-e-Bab-Dummadmogad. Egipto-yarse-be-naed mer dobguo, ar ade, agi be-wagan bukidar-merguega an imakoed.

⁴ Ani, an beba Egiptoʼse naoed, degi, an-sunnad gannar we-yarse-dagega an be-imakoed. Deginbali, be burgwiar-sogele, José be-dikarba-gwichi guoed.

⁵ Geb a-sorbali, Jacob, Beersebaʼgi-maid naded. Israel-machimala, Faraón-urmar-napagined-ibmar-seed-barmialidgi, e-bab, e-bab-e-omegan, degi, e-mimmigan-onakwis sesmalad.

⁶ Jacob, degi, e-gwenadgan, bela Egipto-yarse nadmalad. We-ibmar sesmalad: E-molimar-bebe-nikad, e-sibad-wawaadmar, degi, bela Canaán-yargi ibmar-nikad sesad.

⁷ Bela wemar Jacobʼba Egipto-yarse nade gusmalad: E-masmala, e-sisgan, degi, e-wagan.

⁸ Jacobʼde Israelʼye nugbalid. Israel-masmala Egipto-yarse-nadegusmalad-e-nugmar, wemalad: Rubén, Jacob-machi-gebesailagined.

⁹ Rubén-e-masmaladi, wemalad: Hanoc, Falú, Hezrón, Carmi.

¹⁰ Simeón, Rubén-yarbalidid. E-masmaladi, wemarmogad: Jemuel, Jamín, Ohad, Jaquín, Zohar, Saúl. Saúl-e-nande Canaán-dolad.

¹¹ Leví, Simeón-yarbalidid. E-masmaladi, wemarmogad: Gersón, Coat, Merari.

¹² Judá, Leví-yarbalidid. E-masmaladi, wemarmogad: Er, Onán, Sela, Fares, Zara. Ar Erʼdi, Onán-ebogwa Canaán-yargi burgwismalad. Fares-e-masmaladi, wemarmogad: Hezrón, Hamul.

¹³ Isacar, Leví-yarbalidid. E-masmaladi, wemarmogad: Tola, Fúa, Job, Simrón.

¹⁴ Zabulón, Isacar-yarbalidid. E-masmaladi, wemarmogad: Sered, Elón, Jahleel.

¹⁵ Jacob, we-masmala Padan-Aram-neggweburgi Leaʼbo baksa gusad. Agi, e-bunagwa-Dina baksabalid. Bela-e-wagan: Omegan, degi, macherganse-bakar, dulagwen-gakambe-gakapaa-mergu (33) gusad.

¹⁶ Jacob masmala-Zilpaʼbo-baksad, wemalad: Gwensak, Gadʼye nugad. E-masmaladi, wemalad: Zifión, Hagui, Ezbón, Suni, Eri, Arodi, Areli.

¹⁷ Baiddi, Aserʼye nugad. E-masmaladi, wemarmogad: Imna, Isúa, Isúi, Bería. Degine, amar-e-bundi Seraʼye nugad. Bería-e-masmaladi, wemarmogad: Heber, Malquiel.

¹⁸ We-masmala-ebogwad, Zilpa Jacobʼbo baksad. Zilpaʼde Labán-e-mai guenad. Labán na e-sisgwa-Leaʼga Zilpa-uksa gusad. Bela Zilpa-masmala e-mimmiganse-bakale, warambe-gakanergwa-mergu (16) gusad.

¹⁹ Raquel Jacobʼbo-baksaddi, wemalad: José, Benjamín.

²⁰ José Egipto-yargi Asenatʼbo-masmala-baksadi, wemalad: Manasés, Efraín. Asenatʼde, Potifera-e-sisgwad. Potiferaʼde, On-neggweburgi dule-irwa-e-bab-dummadse-goledid.

²¹ Benjamín-e-masmaladi, wemarmogad: Bela, Bequer, Asbel, Gera, Naamán, Ehi, Ros, Mupim, Hupim, degi, Ard.

²² Wemala, Raquel, degi, Jacob-wagan-gumalad. Bela warambe-gakabake-mergu (14) gusad.

²³ Jacob masmala-Bilhaʼbo-baksad, wemalad: Gwensak, Danʼye nugad. E-machidi, wedid: Husim.

²⁴ Baiddi, Neftalíʼye nugad. E-masmaladi, wemalad: Jahzeel, Guni, Jezer, degi, Silem.

²⁵ We-masmala-ebogwad, Bilha Jacobʼbo baksad. Bilhaʼde Labán-e-mai guenad. Labán e-sisgwa-Raquelʼga Bilha-uksa gusad. Bela Bilha-masmala e-mimmiganse-bakale, walagugle-mergu (7) gumalad.

²⁶ Dulemar-ablis-galagwenmalad Jacobʼba Egipto-yarse nonimaladi, bela dulapaa-gakanergwa (66) mergued. E-masmala-e-omegandi gwen obarilesulid.

²⁷ José-e-masmala Egipto-yargi warbo gwalulesmalad. Degisoggu, Jacob, e-masmala, degi, e-waganse-bakale, bela dulapaa-gakambe (70) Egipto-yargi megidapmarsundo.

²⁸ Jacob e-idu José-daknaega Judá-barmisad, adi, José Gosén-yalaganse e-abindakdagegar. Jacob, degi, eba-danimalad Gosén-yarse nonimarsunnad.

²⁹ Geb degi, José e-bab-abindaknaega igar-ukded, ega guakwaa ur-napagined nasikye. José Gosén-yargi e-bab-abinguargua, angaagwar e-bab-gasad. E-bab-gukingi undar bonai gusad.

³⁰ Geb degine, Israel Joséʼga sogded: —An gannar be-daksadba, degine, amba-dula an be-daknonikidba, emigindi, ¡an burgwer, akarsulid!

³¹ José e-iamarga, degi, e-bab-neguyaginmaladga sogded: —An Faraón-owisogega, Faraón-daknagwelo. An ega sogdapoed: ‘An-iamar, degi, an-bab-e-wagan Canaán-yalagi-mamaiye, wese Egipto-yargi-megega anse nonimarye.

³² Amarde, sibad-wawaad-akwedgi, degi, moli-bebe-nikmalad-akwedgi arbamarye. Na e-sibad-wawaadmar, e-moli-bebe-nikmalad, degi, bela e-ibmarmar-nikamalad senonimarye.’

³³ Faraón bemarse gollalir, degine, bemarse egichialir, ibigi bemar arbamarye,

³⁴ bemar abin-sogoed, bemarde gusgu be-dadganyobi sibad-wawaad-akwedgi arbamarye. Deyob be sogele, adi, nabir bemar Gosén-yalaganba megmaloed, ar ade, Egipto-dulemarga igar maisulid, dule-sibad-wawaad-akwemalad-ebo megmalad.