Génesis 39 - Kuna San Blas

José Potifar-e-omebo

¹ José Egipto-yarse-selesgu, Egipto-dule-Potifarʼye-nugad Ismael-dulemarse José-baksad. Potifarʼde Faraónʼga arbaedid, degi, Faraón-sordamar-daked-e-dummadid. Faraónʼdi Egipto-e-reyd.

² Ar Bab-Jehováʼdi Joséʼba gudiguad. Degisoggu, José e-dummad-Egipto-dule-neggi-gudigu, bela Joséʼga ibmar nueganbi nadegusad.

³ E-dummad-Potifar dakalid, Bab-Jehová Joséʼba nue-gudii. A-ulale, Joséʼga bela ibmar nueganbi guddae.

⁴ Degisoggu, e-dummad José-yeer-dake gunonisunnad. Potifar José e-bendakega onugsanonikid, degine, e-neggi ega-ibmar-daked-dummadga onugsasbalid. Degisoggu, Potifar bela e-ibmar-nikadi, José bela ega ibmar-dakega nugsasad.

⁵ Potifar e-neg-dakega José-onugsasgu, degi, bela e-ibmar-nikad ega dakega imaksabargu, a-ibagan-onoded-akar, Bab-Jehová Egipto-dule-Potifarʼgi ise-nued binsaded. E-neggi, degi, sapurba bela e-ibmar-nikadgi, ise-nued binsaded.

⁶ José Potifarʼga bela ibmar-dakdisoggu, Potifar dogdar bar e-ibmargi ise-binsaar gudisulid, ar wisid, José bela ega ibmar nue-akwediid. Degisoggu, unnila masginbi binsadisunnad. José, sapingwa-nued-itoged yeer dakleged.

⁷ Degisoggu, ibagan-nanamaidgi, Potifar-e-ome, Joséʼbina-sokalid. Ibagwengi Joséʼga sogded: —José, dage. Anmar anbo mege.

⁸ Joséʼdi yapa gusad. José, ome-abin sogded: —An-dummad bela-ibmar-nikad ega-dakega an-nug-imaksad. Emigi, an-wegi-gudiidgi an-dummad bar gwen dogdar ibmargi bukib binsadisulid.

⁹ We-neguyagi, dule-baid anba-bur-dummad sulid. An-dummadse ibi an egisdedibe, surye gwen anga sogdisulid. Unnila bebi geg an be-ebuged, ar ade, bedi e-omed. Degisoggu, ¿ar igi we-ibmar-isgana an imakosunna? Bab-Dummadgi an nue-dummad-nosar-itole.

¹⁰ Ar Potifar-e-ome bane-bane Joséʼgi alamakdidaed, ebo megega, degine, e-walikaa-gudii guegar. Ar Joséʼdi gwen eba ibsadisulid.

¹¹ Ibagwengine, José arbaegala negyaba dogded.

¹² Ar dule satesoggu, ome, José-mordukugi gadebin-imaksad, ega sogded: “¡Anbo be mege!” Ar Joséʼdi ise-abarmakar noded. Degisoggu, e-mor ome-argangi-obes abarmakded.

¹³ Ome José-abarmakde-dakdegu, degi, e-argangi mor mide-nade dakdegu,

¹⁴ neggi-ega-arbamaladse gochad. Amarga sogded: “Nue be dakmala. An-sui anmarga Hebreo-dule-senonikidi, emigindi, anmargi dodoalid. An-dakega negyaba dogsad, anse gorbigualid. Ar andi binnasur goted.

¹⁵ Ar bela-bela binnasur-gole an-itoargu, e-mor-obesa abarmakded.”

¹⁶ Geb degine, ome José-mor urbisad, geb e-sui-negse-nonigua ega oyosad.

¹⁷ Geb degine, ome dule-baiganga-sogsadyob e-suiga sogdebalid: “Hebreo-mai-be-anmarga-senonikidi, angi dodogega an-gabedyaba dogsad.

¹⁸ Ar an bela-bela binnasur gotesoggu, e-mor-obes abarmakded.

¹⁹ Weyob, be-mai an-imaksad.” José-e-dummad e-ome-ega-ibmar-sogsadba bela-bela nue-sae itoded.

²⁰ Degisoggu, Potifar José-gasgu, igar ukded, reymar-sordamar esgaryagi-mellesiidyaba José-metoye. Amba esgaryagi José mellesi-inigwele,

²¹ Bab-Jehováʼdi, Joséʼba amba gudii gusad. E-sabgued amba Joséʼga oyomai gusad. Degisoggu, Bab-Jehová esgarya-daked-dummad José-nued-dakega imaksad.

²² Esgarya-daked-dummad, bela dulemar-mellebukwad-dakega José-onugsasad. Esgaryagi bela ibmar-imakleged José-sogedba imaklemai gualid.

²³ Esgarya-daked-dummad José-ibmar-imaked bar sorba daknonidasulid, bule nabir imaksadibeye. Ar ade, Bab-Jehová Joséʼba-gudigusoggu, bela Joséʼga ibmar-nueganbi-gued imakdaed.