Génesis 11 - Kuna San Blas

Neg-matusulid-Babel

¹ Epennegwa, bela dulemar unnila gaya-gwennaa sunmakmalanad.

² Dad-nakwedsik dulemar nadgua, Sinarʼgi nebabi-nai dakdapid. Agi ambikudapmalad.

³ Ibagwengi, na ga muchub-muchub sokarmalad: “Anmar dakebinne, anmar napa-ginnid akwayob dutusuli sobe, geb degine, anmar soogine ogumakar imakoed.” Weyob akwa-anar napa-ginnid-akwayob-dutusuli-sobaled ebusmalad, degine, barya ebusmarbalid, ebo acha-acha imakegar.

⁴ Geb a-sorba, sogdemarbalid: “Anmar dakebinne, anmar neggwebur-dummad sobmala. Geb neg-matusulid nibnegse-warmakedse, anmar sobbaloed. Anmar deyob imakele, bela anmar nug-nika gumaloed, dule-dummaganga anmar gumaloed, degine, adi, mer anmar we-napneggi aisakimalagar.”

⁵ Geb Bab-Jehováʼdi, dulemar-neggwebur-dummad-sobnanaid, degine, dulemar-neg-matusulid-sobnanaid-dakega aidenonikid.

⁶ Geb Bab-Jehová binsaded: “Wemar, unnila dulemar-soggwenna gued, unnila gaya-soggwenna sunmakmalad. We-arbaedgebe-imaklenaid-obelosmalale, sogdamarbaloed, arbaed-baid anmar imakmarbarye. Degisoggu, bar galegosurmalad.

⁷ A-ulale, anmar aidenaergebed, ei gaya oburnaegar, adi, na aku itomaloed.”

⁸ Deyobi, Bab-Jehová belagwapa we-napneggi dulemar-osakisad. Degisoggu, we-neggwebur bar sobsasurmalad.

⁹ We-neggweburgine, Bab-Jehová weyob dulemar gaya-akar-akar-sunmakega imaksad. A-ulale, we-neggwebur Babelʼye nuggusad. Geb wegine, Bab-Jehová bela dulemar we-napneg-ugakaase osakisad.

Sem-e-wagan

¹⁰ Wemar, Sem-e-wagan gumalad: Birgabogus muusaila-nasad-sorba, Sem-machi-Arfaxad gwalulesad. Deunni, Sem birga-dulatar (100) nikad.

¹¹ A-sorbali, Sem birga-dulataled-ilatar (500) napi-gudii gusad. Sem machimala-baigan nikusbalid, degine, bunamala nikusbalid.

¹² Arfaxad birga-dulagwen-gakambe-gakatar-nikadgi (35), e-machi-Sala gwalulesad.

¹³ A-sorbali, Arfaxad birga-dulataled-ilabake-gakapaa (403) napi-gudii gusad. Arfaxad machimala-baigan nikusbalid, degine, bunamala nikusbalid.

¹⁴ Sala birga-dulagwen-gakambe-nikadgi (30), e-machi-Heber gwalulesad.

¹⁵ A-sorbali, Sala birga-dulataled-ilabake-gakapaa (403) napi-gudii gusad. Sala machimala-baigan nikusbalid, degine, bunamala nikusbalid.

¹⁶ Heber birga-dulagwen-gakambe-gakabake-nikadgi (34), e-machi-Peleg gwalulesad.

¹⁷ A-sorbali, Heber birga-dulataled-ilabake gaka dulagwen-gakambe (430) napi-gudii gusad. Heber machimala-baigan nikusbalid, degine, bunamala nikusbalid.

¹⁸ Peleg birga-dulagwen-gakambe-nikadgi (30), e-machi-Reu gwalulesad.

¹⁹ A-sorbali, Peleg birga-dulataled-ilabo-gakabakebak (209) napi-gudii gusad. Peleg machimala-baigan nikusbalid, degine, bunamala nikusbalid.

²⁰ Reu birga-dulagwen-gakambe-gakabo-nikadgi (32), e-machi-Serug gwalulesad.

²¹ A-sorbali, Reu birga-dulataled-ilabo-gakagugle (207) napi-gudii gusad. Reu machimala-baigan nikusbalid, degine, bunamala nikusbalid.

²² Serug birga-dulagwen-gakambe-nikadgi (30), e-machi-Nacor gwalulesad.

²³ A-sorbali, Serug birga-dulataled-ilabo (200) napi-gudii gusad. Serug machimala-baigan nikusbalid, degine, bunamala nikusbalid.

²⁴ Nacor birga-dulagwen-gakabakebak-nikadgi (29), e-machi-Taré gwalulesad.

²⁵ A-sorbali, Nacor birga-dulatar-gakambe-gakabakebak (119) napi-gudii gusad. Nacor machimala-baigan nikusbalid, degine, bunamala nikusbalid.

²⁶ Taré bato birga-dulapaa-gakambe-nikadgi (70), e-masmala Abram, Nacor, degi, Harán gwalulesad.

Taré-e-wagan

²⁷ We, Taré-e-igar: Taré, Abram-e-babad. Nacor, degi, Harán amba Taré-masmalamogad. Haránʼde, Lot-e-babad.

²⁸ Harán e-bab-Taré-iduar Caldea-dulemar-yargi, Ur-neggweburgi burgwisad. Urʼde Harán-gwalulesad-neggweburad.

²⁹ Abram, Sarai-nikusad. Nacorʼdi, Milca-nikusad. Milcaʼde, degi, Isca, Harán-e-sisgan gumalad.

³⁰ Saraiʼdi geg mimmi nikued, ar ade, gusgu muu-neggi geg mimmi-bake danikid.

³¹ Taré Canaán-yarse-naega Caldea-dulemar-yargi Ur-neggweburgi noar gusad. Taré na eba wemar sear gusad: E-machi-Abram, e-wagwa-Lot Harán-machi, degine, e-bala-Sarai e-machi-Abram-ome. Degi-inigwele, Taré, Harán-neggweburse-mosgu, agi megidapmalad.

³² Geb Taré, Harán-neggweburgi birga-dulataled-ilabo-gakatar-nikadgi (205) burgwisad.