Filipenses 2 - Kuna San Blas

Cristo-san-bipi-imaklesad, degi, dummadga-imaklesad

¹ Degisoggu, bemar Cristoʼgi-akanaidgi gangued-nika be itomardibe, e-sabguedgi be-ogannomar be itodibe, E-Burba-Isligwaledgi na be walikaa gudimardibe, na be wile dakdimardibe,

² na be nuedgi-gudidimaladgi, weligwar-ito be an-imakmala. Na be muchub-muchub sabgubukmaladgi, na be emarbi binsaedgi, degi, na be emarbi ibmarbina-sogedgi, weligwar-itoge be an-imakmala.

³ Na be san-dummarba-imakega, degi, dule-baiganbo-benguega, mer be ibmar imakmalo. Na be san-bipi-imakedgi ibmar-imakmala, degi, dule-baigan bemarba-bur-dummadyob be dakmaloed.

⁴ Mer be na be-sanginbi binsamalo, gwenadgan-baigangi be binsamogoed.

⁵ Ar igi Cristo-Jesús na dukin san-bipi imaksa, debayobi, bemar binsamarmoga.

⁶ Ar Cristo-Jesús gusgu Bab-Dummad gued, Bab-Dummaddeeye na bar-binsassulid, agi alamaknai gussulid.

⁷ Aka bur Bab-Dummadsuliyobi na imaksad, maiga na san-imaksad, degi, dulega na san-imaksad.

⁸ Jesús nue-dule-sunnadga gunonigu, dukin na san-bipii imaksad. Bab-Dummad-sogedba burgwedse ibsasad, nakrusgi bioklegar burgwisad.

⁹ A-ulale, Bab-Dummad, Cristo-Jesús dulemar-baiganba bur bule dummadga imaksasunnad. Ega bur dule-baiganba nug-dummarba-gued uksasunnad.

¹⁰ Adi, belagwapa nibneggi-bukmalad, napneggi-bukmalad, degi, napneg-urba-bukmalad, Jesús-asabin yokorgi sindigar sigmalagar.

¹¹ Degi, belagwapa sogmalaga, Jesucristo bur-Dule-Dummadye, adi, Bab-Dummad-nug odummolegegar.

Jesúsʼba-nanaid neg-meegwadyob gued

¹² Degisoggu, an-gwenadgan-sabesailamalad, an bemar-abargi-gudigusgu, bemar gusgu an-ibmar-sogedba ibsadamalad. Emigindi, an bemarba-gudisulidgi bur bule be anba ibsamala. Bab-Dummad-dobegwadgi, degi, Bab-Dummadgi-nue-binsaed-nikagwadgi, be-abonolesadgi be alamaknai samala.

¹³ Ar Bab-Dummad na e-nued-binsaedbali, bemargi ibmar-nued-imakedbinasoged, degi, ibmar-nued-imakbied nasiked.

¹⁴ Mer bemar ibmar-isdar-itogedgi, degi, mer na abin-abin-imakmaladgi, be ibmar imakmala.

¹⁵ Adi, mer bemar isgumalaga, degi, dulemar mer bemargi sogmalaga, bemarde galagwensuli gudimarye. Ar bemar Bab-Dummad-mimmigan-gumarsoggu, dulemar-galagwensuli-gudidimalad-abargi, degi, dulemar-isganamar-abargi, gutu-gwen-naisuli gudii gumalargebed. Ar bemar we-napneggi niisgwamar-gaedyobi gumalad.

¹⁶ Melle San-Burba-Dulagudigued-Gayaburbagi be bengumalo. Adi, Cristo we-napnegse gannar danikile, an bemargi yeer-itogwichi guoed. Deyobi, an wisguoed, an Bab-igarba-nanasadi, degi, an Bab-Jesúsʼga-arbadigusadi gwen an binsa arbassurye.

¹⁷ Bemar Bab-Dummadgi bensurmalad, degi, Bab-Dummadga ibmar imakmalad. Wemala, Bab-Dummadga-ibmar-uklegedyob gued. An-oburgwemalodibe, ar deyobile, an-burgwisadi bemarga Bab-Dummadga-ibmar-ukmalad-birgi napi-e-nis-eolegedyob gued. Ar deyob gunonikile, an weligwar itogoed, degi, an bemarbo werguoed.

¹⁸ Deyopira bemar wergumarmoga, degi, anbali wergumarbali.

3. PABLO-E-ARBASAD (2:19–3:21) Timoteo, degi, Epafrodito

¹⁹ Bab-Jesús-sogedba emisgwasaar an bemarse Timoteo-barmidoed, adi, an bemar nueganbi-gudiiye-gwisgualile, an nue-yeer itogoed.

²⁰ Ar an be-sabmaladyobi, dule-baid sated. Unnila Timoteoʼbi deyob be-sabmarmogad, degi, bemarba nue-bukib binsabalid.

²¹ Ar bela dule-baigandi na eginbi binsamalad, Jesucristo-ibmargindi binsasurmalad.

²² Ar bemardi bato nue wismalad, igi Timoteo na e-daed oyodii. Ar bemar wisbalid, igi Timoteo an-machiyobi Bab-Dummad-Gayaburba-Nued-berbegedgi an-bendakdibali.

²³ Degisoggu, igi-anga-wegi-igar-guoed an wisgusale, yog-barmiar an bemarse Timoteo-imakoed.

²⁴ An Bab-Jesúsʼgi bensulid, an bemarse emisgwasaar nadapmogoed.

²⁵ Emigindi, an-gwenad-Epafrodito, anbo-arbaed-dule, degi, Bab-Jesús-igargi-anbo-alamakdiid-dule, bemarse-gannar-barmided bela-bela abele an itodo. We-dule, an-ibmar-abegedgi an-bendakega be anga barmiar gusmalad.

²⁶ Epafrodito bela-bela gannar nue bemar-dakbied. Beedse nue-oakudii gusad, ar ade, bemar gegumaiye wisgusmalad.

²⁷ Ar nue-napiragwa, Epafrodito bela-bela uellemai gusad, burgwednaga gusad. Ar Bab-Dummaddi nue-wile daksad, degi, nue-wile an-daksamogad, adi, an-eba-wile-itodiidgi mer bur bule an wile-itogegar.

²⁸ A-ulale, an bemarse gwae Epafrodito barmisiid, adi, bemar Epafrodito-dakalile, wergumalaga, degi, anmoga bar an wile mer itomogogar.

²⁹ Bab-Jesús-nuggi weligwaledgi bemar Epafrodito abingamalo. Deginbali, bemar dulemar-Epafroditoʼyob-damalad-e-nug be ogannomala.

³⁰ Ar Epafrodito Cristoʼga-arbaed-ular burgwednaga gusad. Ar bemargi an dikasur-maisoggu, bemar-sunnad geg an-bendakmarsunnad. A-ulale, bemar-nuggi anga-arbaega, Epafrodito na san sabsuli uksa gusad.