Ezequiel 30 - Kuna San Blas

Egipto-yar-ulale nunmak-itoged

¹ Bab-Jehová anga sogded:

² “Dule-machi, ibmar-guoed iduakwaa be soge: ‘Bab-Jehová weyob soged: Nunmakedba binnasuli-gormala: ¡A-ibagi nunmaked-dummad naguoed!

³ An-iba warmakdanikid, a-iba bato omodanikid. Negasichid-iba omosad, dulemar-yar-baid-baidgi-bukwamaladga sabsur-odurdakleged-iba omosad.

⁴ Egipto-yargi bila-onoged danikoed, Etiopía-yargi surbinsa-itoged naguoed. Bukidar Egipto-dulemar-oburgwilesmalale, e-ibe ibmar-nuegan atursalegoed, e-negsaila-mamaid bibisgoed.

⁵ ” ’Etiopía-dorgan, Fut-dorgan, Lud-dorgan, bela Arabia-dorgan, Libia-dorgan, degi, yarmar-eba-nanaid-e-dulemar, es-suidgi burgwemaloed.’ ”

⁶ Bab-Jehová weyob soged: “Egipto-yar-bendakdimalad bergumaloed, Egipto-e-gangued san-dummarba-imaked berguoed. Migdol-akar, Seveneʼse es-suidgi burgwemaloed, ani Bab-Jehová-Bela-Gangued-Nikadi, weyob soged.

⁷ ”E-neggweburmar akwamarbi-ganna-ganna-bukwa guoed. Bela yarmar-baiganba bur bule nega-dulesulidganga guoed.

⁸ An Egipto-yargi soo ogadele, degi, bela yarmar-eba-nanaimalad bergusale, wisgumaloed, ani an Bab-Jehová gue.

⁹ ”A-ibagine, an-gayaburba-berbemaladi, Etiopía-dorgan-dobe-itobuksulid-ogwayega, ur-dummagangi ainidmaloed. Egipto-dorgan-sabsur-odurdaklegoed-ibagi, Etiopía-dorgan dummad-gwayemarmogoed. A-iba bato omodanikid.

¹⁰ Ani Bab-Jehová-Bela-Gangued-Nikadi, weyob soged: ‘Babilonia-rey-Nabucodonosor, Egipto-ibmar-nuegan-nikad-obelogega an imakoed.

¹¹ Nabucodonosor, degi, e-sordagan-bila-onomalad, dulemar-yar-baid-baidgi-bukwamaladba bur dule-bulegan gumalad, amar Egipto-yar obergunonimaloed. Amar es-suidgi Egipto-dorgan-ogilononimaloed, Egipto-yargi, muimar-ena metemaloed.

¹² An Nilo-dianmar odinguoed, degi, dule-isganamarga an Egipto-yar ukoed. Dule-ainebarmalad Egipto-yar, degi, egi-ibmar-bukwamalad-oberguega an imakoed.’ Ani an Bab-Jehová weyob soged.

¹³ ”Bab-Jehová-Bela-Gangued-Nikadi, weyob soged: ‘Bela Menfis-e-nuchumar an obelogoed, e-bab-dummadyob-ibmarmar-imakleged an osulogoed. Egipto-yar bar rey nikuosulid, bela Egipto-yargi dobed-dummad an nasikoed.

¹⁴ An Patros-neggwebur obelogoed, an Zoán-neggwebur soogi ogumakoed, an Tebas-neggwebur sabsur-odurdakoed.

¹⁵ ” ’Sin-neggwebur Egipto-yar-e-ganguedga-siidi, an-urwed itogoed. Tebas-neggwebur-e-ibmar-nuegan-nikad an obelogoed.

¹⁶ Egipto-yar an soogi ogumakoed, Sin-neggwebur nunmaked-dummad itogoed. Tebas-neggwebur-e-galu-matusur-maidgi yaamar olloo sigoed. Menfis-neggwebur bali-bali wile-itosii guoed.

¹⁷ Avén-neggwebur-sapingan, degi, Pibeset-neggwebur-sapingan es-suidgi burgwemaloed, e-omegandi, gales-ebipiledmaloed.

¹⁸ Egipto-yar-e-gangued an obelosale, Tafnesʼgi negsichid naguoed. Deyobi, na e-gargangued san-dummarba-imaked bergunonikoed. Egipto-yar negsichidbi naguoed, e-bunamala gales ebipiledmaloed.

¹⁹ Weyob Egipto-yar sabsur-odurdaklegoed. Geb degidbali, Egipto-dulemar na wisgumaloed, ani an Bab-Jehová gue.’ ”

²⁰ Deunni, anmar birgambe-gakagwensakgus gaka nii-wargwenad-ibaguglegus Babiloniaʼgi-bukwadgine, Bab-Jehová weyob anga sokalid:

²¹ “Dule-machi, bato an Egipto-rey-Faraón-ibe sakwa-wargwen bichisad. E-sakwa gannar ganguega, degi, sunna gannar es-suid gaega, dule gwen ega e-sakwa morgi inaba-mesa obipirmassulid, deginbali, ega suarba-mesa edichasurbalid.

²² A-ulale, Bab-Jehová-Bela-Gangued-Nikadi weyob soged: ‘Egipto-rey-Faraónʼgi an gwichid. E-sakwa-nued, e-sakwa-bato-bisgaled, warbobela an e-ibe bisgoed, degi, e-argangi es-suid-argwanega an imakoed.

²³ Egipto-dorgan dulemar-yar-baid-baidgi-bukwamaladse an oaisakioed, yar-baid-baidse an oduurmakoed.

²⁴ Babilonia-rey-e-gargangued an ogannogoed, an-es-suid e-argangi an mesoed. Faraón-e-sakwamar an bibisgoed. Geb dule-nailikgusad burgwedani-akiginmaidyob e-isdarad-asabin nunmakedba akiginnoed.

²⁵ Babilonia-rey-e-gargangued an ogannogoed. Faraón-e-gargangueddi an nolloo imakoed. Babilonia-rey-e-argangi an-es-suid an mesisale, geb agi Egipto-dulemar-ogilosale, wisgumaloed, ani an Bab-Jehová gue.

²⁶ Egipto-dorgan dulemar-yar-baid-baidgi-bukwamaladse an oaisakioed, yar-baid-baidse an oduurmakoed. Geb degine, wisgumaloed, ani an Bab-Jehová gue.’ ”