Ezequiel 19 - Kuna San Blas

Israel-sapin-dummaganga wile-itoged

¹ Bab-Jehová sogdebalid: “Israel-sapin-dummaganga, we-wile-itoged be soge:

² ‘Be-nandi, achumigur-nono-wawaadmar-abargi, achumigur-nono-wawaad-omeyob guenad. Achumigur-nono-wawaad-e-burwigan-abargi-mai, e-mimmigan-onumadaed.

³ Na e-mimmi-wargwendi, odummosad, wedi achumigur-nono-wawaad gadi-urwedga gunonikid, e-mas-ichimaked durdaksad, dule-gunned durdaksabalid.

⁴ Dulemar-yar-baid-baidgi-bukwamaladi, achumigur-e-wilub-obichadaed itosmalad, geb yamo-yardakar achumigur-gasmalad, geb Egipto-yarse, esgoro-dubgi edinnar sesmalad.

⁵ ” ’Ar achumigur-nono-wawaad-ome, e-mimmi bar ese nonikosur daksoggu, e-mimmi-baid odummosbalid, geb achumigur-nono-wawaad-ursilidga imaksad.

⁶ Ar we-achumigur-nono-wawaad gangued-nika gunonigua, e-sordamar-bamalad-abargi dobsuli nanadii gusad. Na e-mas-ichimaked durdaksad, dule-gunned durdaksabalid.

⁷ Reynegmar omukusad, neggweburmar obelosad. E-uurmakedba bela dulemar-ogwayedii gusad.

⁸ Dulemar-yar-baid-baidgi-bukwamaladi, degi, dikarba neggwebur-baigan bukwamaladi, achumigurgi gwisguarmalad. Yardakega e-idu galeged sobsamalad, geb yaa-ollor-gwisaledgi galessunnad.

⁹ Galu-yaba esgoro-dubgi edinnar-sii Babilonia-e-reyse sesmalad. Israel-yalaganba melle bar e-uurmaked-itolegega, galu-yaba-sii sesmalad.

¹⁰ ” ’Be-nan uva-digaled-abargi uva-dubyobi, dii-dikarba digar-gwichi gusad. Ar bela-bela dii-sugwissoggu, yaisur-sanmakgwichi gusad, yaisur-aramakgwichi gusbalid.

¹¹ E-anagan gandikidba-dutusuli-gumai gusad, reymar-e-suar-gaapoledga gusad. Bela-belad bipisuli gusad. Bela-belad muamakgwichi gusad. E-matusulidbali dulemar magar daksamalad. E-anagan-gandikidbali dulemar magar daksamalad.

¹² Degi-inigwele, urwedgine sabsur-unnulesad, napagi balimetemalad. Dad-nakwedsik-burwa-uereged-goledi, uva-dub-odinnosad, dulemala e-san-nanaid wesmalad. E-anagan-dutusurmalad bela dinare gusad, geb soose ogumaklessunnad.

¹³ Emigindi, we-uva-dub nega-dulesulidganba, napa-dinnaregedgi, dii-satedgi, digar gwichid.

¹⁴ E-ana-wargwengi soo gaded, we-soo e-sanmar ogumaksad. E-anagan-dutusurmalad rey-e-suarmarga-guega, bar gwen bessulid.’ ”We-namakedi, wile-itogedid. Degisoggu, wile-itogedgi weyob namaklegergebed.”