Ezequiel 15 - Kuna San Blas

Jerusalénʼginmalad uva-dub-isganayob gued

¹ Bab-Jehová anga sogded:

² “Dule-machi, ¿ibigine, uva-dub-e-saila, sapi-bamalad-e-sailamarba bur-nuedi? ¿Uva-dub-e-wala, sapi-bamalad-abargi ibuga gumoga?

³ We-uva-dub-e-saila ibmar-sobega gusulid, ibmar-nasikega gusurbalid.

⁴ Unnila sapanga gued. Ar e-dukumar gummaksale, e-gwaa sogunga-gusale, ¿ibmarga guo be ebinsae?

⁵ Ar amba yoo gummakubela, ibmarga gussulid. Emi-bulesunna, ¿sunna bar ibmarga guosi? Geg bar ibmarga gue.”

⁶ Degisoggu, Bab-Jehová-Bela-Gangued-Nikadi weyob soged: “Ar igi uva-dub-e-saila, soogi gummakega mellege, deyobi, an Jerusalén-e-dulemar imakmogoed.

⁷ An wemarbo urwoed. Amba soogi wakinmalo-inigwele, ar soo-baidse gummakmaloed. Ar an wemarbo ulusale, bemar wisgumaloed, ani an Bab-Jehová gue.

⁸ E-yala nega-dulesulidganga an imakoed, ar angi nosmalad. Ani an Bab-Jehová-Bela-Gangued-Nikadi weyob soged.”