Éxodo 26 - Kuna San Blas

Bab-Dummadse-goled-neg-sunna-seleged-soblegoed

¹ Bab-Jehová Moisésʼga sogdebalid: “Anse-goled-neg-sunna-seleged be soboed. Be sobega, lino-mor-nued goambe (10) be ebugoed. Deginbali, be nirbadub-arad, nirbadub-suir-akwagiid, degi, nirbadub-ginnid be ebubaloed. Agine, baliwitur-dummagan-querubinʼye-nugad, bela nue-yeerdakle-imakar, a-morgi be sobbaloed.

² Bela mormar-e-suguedi, daligugledbi (7) be imakoed. E-matardungueddi, daligwenadbi be imakoed. Mormala bela emarbi-dungu be imakoed.

³ Mor-dummagan-goatale be gwadi-gwadi imakoed. Baid-mormar-goataledi amba gwadi-gwadi be imakbaloed.

⁴ Degine, mor-goataled-gwadialed-e-dikargi e-uayamar dub-aradgi ega be nasikoed. Amba deyob mormar-baigan-goataled gwadiarmalad-e-dikargi be imakbaloed.

⁵ Mormar-goataled-gwadiarmaladgi e-uayamar gwadulabo-gakambe (50) be nasikoed. Degine, baigan-goataled-gwadiarmaladgi amba gwadulabo-gakambe (50) be nasikbaloed. E-uayamar abin-abin be nasikoed.

⁶ Mor-nasiked orbi dulabo-gakambe (50) be imakbaloed, adi, mormar-goataledi, baigan-mormar-goataledbo be oatogegar, adi, anse-goled-neg-sunna-seleged-e-mor unnila gogwenayob guegar.

⁷ Sibad-absar mor-dummaganga be imakbaloed, adi, anse-goled-neg-sunna-seleged-birgi anwegar. A-mormar-dummagan goambe-gakagwensak (11) be imakoed.

⁸ Mormar-e-sugued, daligugle-gaka-abala sugue (7½) be imakoed, e-matardungueddi, daligwen be imakoed. Mormar-dummagan goambe-gakagwensakad (11) bela emarbi-dungu be imakoed.

⁹ We-mormar-dummagan, goatar be gwadioed, degine, baid goanergwa (6) be gwadibaloed. Geb anse-goled-neg-sunna-seleged-e-yawagak-asabin, mormar-dummagan-goanergwad-e-gogwenad-napid be nubyar nasikoed.

¹⁰ Geb a-sorbali, mor-dummad-dikarba gwadulabo-gakambe (50) e-uayamar be nasikoed. Amba deyob baigan-gwadilesmalad-dikarba e-uayamar be nasikbaloed.

¹¹ Deginbali, esgoro-gordikid-dulabo-gakambe (50) mor-gamalad be imakbaloed. Wemala mor-dummad-e-uaya-yaba be odogoed, adi, mor-dummagan danar-danaled unnila goa-gwennagwadyob guegar.

¹² Mormar-dummagan, ar bur-suidsoggu, anse-goled-neg-sunna-seleged-e-dikarmargi batenai guoed.

¹³ We-batenanaidi, anse-goled-neg-sunna-seleged-edugoed, gwensaksik, achabo batenai be imakoed, baidsik, amba achabo batenai be imakbaloed.

¹⁴ Sibad-wawaad-machered-e-ukamar-ginnidgi-odolegaled, anse-goled-neg-sunna-seleged-edugega be imakbaloed. Geb degine, ibdurgan-uka-nuegan, be ebubaloed, adi, agi anse-goled-neg-edugegarbar.

¹⁵ ”Deginbali, anse-goled-neg-sunna-selegedga urgomar-acaciaʼye-nugad be sobbaloed. We-urgomar nue inniki-inniki be imakoed.

¹⁶ We-urgomar dalibo-abala-sugu be imakoed, e-matardungueddi achapaa be imakoed.

¹⁷ Deginbali, urgomargi e-nagmar war-warbo-nika be soboed, adi, nabir urgomar naga-nagaba matak-matak gwisguegar. Weyob bela urgomar be anse-goled-neg-sunna-selegedga be imakoed.

¹⁸ Degisoggu, urgomar mata-dulagwen (20) anse-goled-neg-sunna-selegedga, dad-nakwed-argan-nuedsik ogwichega be imakoed.

¹⁹ Urgomar-mata-dulagwenad-urba e-sigmalad gwadulabo (40) manibi be soboed. Urgomar-irbali gwa-gwabo e-sigmalad be imakoed, adi, urgo-e-nagmar e-sigmaladgi dogegar.

²⁰ Anse-goled-neg-sunna-selegedga urgomar-mata-dulagwen (20) dad-nakwed-argan-sapiledsik ogwichega be imakbaloed.

²¹ Be e-sigmalad-manibiid gwadulabo (40) be imakbaloed. Urgomar-iliba gwa-gwabo e-sigmalad be imakoed.

²² Anse-goled-neg-sunna-seleged-sorsik, dad-argwanedsiki urgo-matanergwa (6) be sobbaloed.

²³ Deginbali, e-abingunaid-yarganbalidgala, urgo-matabo be soboed. Deyobi, e-abingunaid-yarganbalid-baidga, urgo-matabo be sobbaloed.

²⁴ We-urgo-matabogwad-e-nagmar, e-sigmalad-birgi darbo abingunaidgi gwisguoed. Geb nibalidse or-dummad-naidgi be urgo darbobela be odogoed. Weyob urgo-matabogwad niba ebo-atonai be imakoed.

²⁵ Degisoggu, urgo-matabaabakgi (8) e-sigmalad-manibiid gwaambe-gakanergwa (16) be sioed. A-sogleged, urgo-matagwengi e-urba e-siged be gwa-gwabo sioye.

²⁶ Deginbali, urgo-warakwagana-acaciaʼye-nugad-biir-megmalad be imakbaloed. We-urgo-warakwagana anse-goled-neg-sunna-seleged-e-dikar-soggwensikidga walatar be imakoed.

²⁷ Urgo-warakwagana anse-goled-neg-sunna-seleged-e-dikar-baidsikidga, walatar be imakbaloed. Degine, dad-argwaned-yarganbalidga urgo-warakwagana walatar be imakbaloed,

²⁸ Neg-abargi-urgo-warakwa-megoed bela-baksa urgomar-abargi megoed.

²⁹ Bela urgomar-ebilis or be matak-matak nasikoed. Degine, e-olua-dummagan orbi be imakbaloed, adi, a-yaba urgo-warakwagana-odogegar. Bela we-urgo-warakwagana-biir-megmalad-birgi or be nasikbaloed.

³⁰ ”Igi-dakle yar-birgi bega oyolesa, ayobi, anse-goled-neg-sunna-seleged be soboed.

³¹ Deginbali, mor-dummad be imakoed. We-dubmargi be imakoed: Nirbadub-aradgi, nirbadub-suir-akwagiidgi, nirbadub-ginnidgi, linoʼdub-nuedgi be soboed. We-morde nue-yeerdakle-imakar, baliwiturmar-querubinʼye-nugad, egi-ise-nue-sobale be imakoed.

³² Buarmar-acacia-walabakegwadgi we-mor-dummad-yeerdakleged be nasikoed. We-buarmarde or egi nasiklealed. E-siged-manibiid-birgi we-buarmar gwisguoed.

³³ We-mor-dummadde mor-nasikmaladgi be nasikoed. Degisoggu, we-mor-dummad Neg-Islidikid, Neg-Ise-Islidikid-ebo bachiki-imakega guoed. We-mor-dummad-daksik Dulemarbo-An-Igar-Mesisad-Ulu be sioed.

³⁴ Geb degine, Dulemar-Ebo-An-Igar-Mesisad-Ulu-birgine, e-eduged be mesoed. E-edugedde, Isgued-Elileged-E-Wilubye, sogleged. We-ulude, Neg-Ise-Islidikidyaba sioed.

³⁵ Neg-Islidikidgi, mor-naid-magabali, dad-nakwed-argan-sapiledsik, mese be sioed. We-mese an-asabin madu-ukleged-mesed. A-mese-asabinni, dad-nakwed-argan-nuedsik gwallu be sibaloed.

³⁶ Anse-goled-neg-sunna-seleged-e-yawagakgala, we-dubmargi mor-dummad be soboed: Nirbadub-aradgi, nirbadub-suir-akwagiidgi, nirbadub-ginnidgi, linoʼdub-nuedgi be soboed. Ise-nue-sobar, bela-bela-nue-yeerdakle-imakale, be we-mor-dummad imakoed.

³⁷ Degine, we-mor-dummadgala, acacia-buarmar walatale ega be imakoed. We-buarmar-ebilis or be matak-matak nasikoed, degine, mor-gamalad olobi ega be imakbaloed. Deginbali, wemar-buarmar-ataled-abingaega, esgoro-gordikidgi gwaatale e-sigmalad be soboed.”