Éxodo 15 - Kuna San Blas

Moisés-namaksad

¹ Geb degidgine, Moisés, degi, Israel-dulemar we-namaked, Bab-Jehová-nug-ogannogega namakdemalad: “Bab-Jehová-nug-odummogega an namakoed, ar ibibayobi Bab-Jehová-emargi-nakwisad geger-daklege, deunni, molimar, degi, e-birgi-sigmalad, demargi ogundisgu.

² An-namaked, Bab-Jehováʼga an namaked. Ar Bab-Jehová an-ogannogedid, an-abonogedid. Bab-Jehová an-Bab-Dummadid, an a-e-nug odummogoed. We-Bab-Jehová an-bab-e-Bab-Dummadid, an a-e-nug ogannoged.

³ Bab-Jehová, dule-bila-onoged-sunsogedid. ¡Bab-Jehováʼye e-nug nugad!

⁴ Bab-Jehová Faraón-e-urmar-napaginmalad, degi, Faraón-sorda-bila-onomalad demargi odosad. Faraónʼga-sorda-semalad-e-dummagan-bur-nuegan, Demar-Ginnidye-nugadgi gundilesad.

⁵ Akwayobi wilasailase argwachamalad, degi, muu-wilasailad egi mulus nagusad.

⁶ ”Bab-Jehová, be-gargangued dutusulid, be-gargangued gandikidba maid. Bab-Jehová, be-garganguedba be be-isdarmalad ogilosad.

⁷ Be-gangued-dutusulidgi dulemar-begi-gwisgusmalad be ogilosad. Be-uluded be barmisgu, be-isdarmalad gaganyob gummakded.

⁸ Be-bunnogedgi be dii danar oambikunonikid. Demar-billigan gasdibir-matusulidyob megisad, muu-wilasailad bogidik nagusad.

⁹ ”Anmar-isdarmalad binsasmalad: ‘An bargaedse bareginnoye. An e-ibmar-suoedi, an mimioye, an egi yeer-itogedse, an mimioye. An es-suid, an egi onogoye, an-sunnagwad an wemar ogilogoye.’

¹⁰ Bab-Jehová, ar be burwa-ogochadba, be demarse-dolegega imaksad. Gingwayobi dii-gandikidba-nukamakmaidgi dogdemalad.

¹¹ Bab-Jehová, ¡bab-dummad-baid bebo wilubdaked sated! ¡Beyob-isligwaled, baid sated! ¡Beyob-dummadid, satebalid! ¡Be ibmar-gegerdakleged-imakedi, dobe-ito anmar-imaked! ¡Ar nabirid, be-nug odummolegergebed!

¹² ¡Be-gangued be oyodgu, napa we-dulemar-dosad!

¹³ ”We-dulemar be abonosadi, be-sabedbali na be semaid. Be-ganguedbali, we-dulemar be-neg-swilidikidse na be sedoed.

¹⁴ Dulemar-yar-baid-baidgi-bukmalad wisguarmalale, wawanmakdemaloed. Filistea-dulemar sulibinsa itodmaloed.

¹⁵ Edom-e-dummagan bela-bela dobgudmaloed. Moab-e-dummagan dobedbali, wawanmakdemaloed. Bela Canaán-dulemar dobedba duurmakdemaloed.

¹⁶ Bab-Jehová, be-surgan-ganguedba we-dulemar bela-belad-gwakidmalodo. Bela we-dulemar dobgudmalodo. Bab-Jehová, be-gangued-abin we-dulemar akwayob geg sunmak sigmaloed. Bela be-dulemar-na-begadga-imaksad bela-obaksadse, we-dulemar bogidik ambikumaloed.

¹⁷ Bab-Jehová, be-megega na be yar-susadse, be-dulamar be sedoed. A-yargi, degisadegu-megega be anmar-imakoed. A-yar na be sisadid. Agi be megega, be-neg be sisad.

¹⁸ ¡Bab-Jehová degisadegu negsemai guoed!”

María-namaksad

¹⁹ Faraón-urmar-napaginmalad, degi, moli-birgi-sii-urwemalad, Israel-dulemar-bargaega demargi-dogdemargu, Bab-Jehová amargi demar-arwega imaksad. Israel-dulemardi demargi napa-dinnagwadgi nadapi obaksamalad.

²⁰ Bab-Dummad-gayaburba-barsoged-bundor-María, Aarón-e-bunad. We-Maríaʼde, gar-panderetaʼye-nugad susad, geb namakded. Bela omegan-baigan gar-pandereta ogornadap gusmarmogad, eba dodonadap gusmarmogad.

²¹ María ega weyob namaknadapid: “Bab-Jehová-nug-odummogega namakmar. Molimar, degi, e-birgi-sigmalad demargi ogundisa. Ibibayobi, Bab-Jehová Egipto-dulemargi-nakwisad geger-daklege.”

2. ISRAEL-DULEMAR SINAÍ-YARSE NADEGUSAD (15:22–18:27) Dii-gagbiregedse warmakdapmalad

²² Moisés, Israel-dulemar Demar-Ginnidye-nugadgi-bukwad sesa gusad. Nega-dulesulidgan-Shurʼye-nugadse sesad. Agine, ibapaa nanasmalad, gwen dii amissurgusmalad, ar dii sated.

²³ Maraʼye-neg-nugadse modapmargu, agi-dii-nikadi, geg gobe gusmalad, ar ade, dii gagbisailad. A-ulale, a-neg Maraʼye onugsasmalad. Maraʼde sogleged, “gagbisailadye.”

²⁴ Dulemar Moisésʼgi ichakwa sunmakarmalad, sognanai guarmalad: “¿Ar wede ibi anmar goboe?”

²⁵ Geb degine, Moisés Bab-Jehováʼse bendakleged egichided. Agi, Bab-Jehová Moisésʼga sapi-bipi oyosad. A-sapi-bipi Moisés diise meted. Agine, dii sayee naded. Agine, Bab-Jehová Israel-dulemar-wilubdaksad. Deginbali, agi igi-na-nanamaloed-igar ega uksabalid.

²⁶ Bab-Jehová Israel-dulemarga weyob sogded: “Ani an bemar-Bab-Dummad-Jehová gued. Ar bemar, an bemarga-ibmar-soged be nue itomalale, an-ibmar-abegedba be imakele, degi, an igar-bemarga-uksad be imakmalale, degine, an-igar-mamaidba be damalale, Egipto-dulemargi bonigan-dummagan-an-barmialidi, bemargi a-bonigan an barmidagosulid. Ar ade, ani an Bab-Jehová gued. Ar ani an bemar-nudakedid.”

²⁷ Geb a-sorbali, Elimʼye-neg-nugadse modapmalad. Agi ambe-gakabo (12) dian ariomaid, degine, sapi-ogobgi-dakleged dulapaa-gakambe (70) bukwabalid. Agine, Israel-dulemar dii-naba ambikudapmalad.