Ester 5 - Kuna San Blas

Ester, Rey-Asueroʼse naded

¹ Ibapaagine, Ester, rey-omegan-mor-yoed na yosad. Geb Ester reyneg-imbase, Rey-Asuero neg-obunnoged-asabin gwisgudapid. We-neg-obunnogedgi, Rey e-ologangi, yawagak-doged-asabin siid.

² Geb Rey-Asuero, e-ome-Ester neg-imbagi-gwichi-dakargua, yeer itoded. Geb e-olo-gaapoled-ganikid Esterʼsik oyosad. Geb degine, Ester rey-walikaa nonikid, agine, Ester rey-e-olo-gaapoled-e-duku ebusad.

³ Rey-Asuero, Esterʼse egichided: —Ester, ¿Igi be itoge? ¿Ibu be abege? ¡Be anse an-yar-naid-negabar amba egisele, an bega uksaled!

⁴ Geb Ester abin-sogded: —Dummad-Rey, be nabir itodibe, emi an bega masgunned-iba-onosokalidse, be, Amánʼbo be dagbi an be-abedo.

⁵ Geb rey ega-arbamaladga sogded: —Gwae be Amán-aminamala, adi, anmar Ester-masgunned-iba-onosokalidse naegar. Degisoggu, Rey-Asuero, Amánʼbo Ester-masgunned-iba-ononaidse nadmalad.

⁶ Geb Rey-Asuero vino gobsigu, gannar Esterʼse egisded: —Be anga soge, ibu be abege, an bega ukoed. ¿Ibu be egisbie? ¡Be anse an-yar-naid-negabar amba egisele, an bega uksaled!

⁷ Geb Ester rey-abin sogded: —An-ibmar-abeged, an-ibmar-egised unnila wedid:

⁸ Dummad-Rey, ar yeer-ito an be-imaksale, ar an-ibmar-abeged, an-ibmar-egisoed, be anga nuedgi ukbiele, banedse, masgunned-iba-baid an bega onosokalidse be Amánʼbo dago. Geb agi, be-anse-emi-ibmar-egisnaid an bega sogoed.

Amán, Mardoqueo-sae-daked

⁹ A-ibagine, Amán bela-bela weligwar-itogedgi, degi, yeer-itogedgi masgullenaidgi nodegusad. Amán, rey-yawagak-noedgi Mardoqueo gwen e-asabin dulluu imaksuli, gwen e-dobsurbali dakargu, bela-bela sae itoded.

¹⁰ Degi-inigwele, Amán e-sae-itoged bargasad. Geb e-negse naded. Geb Amán e-negse-mosgua, e-aimarse-gornamalaga, degi, e-ome-Zeresʼse-gornaega igar uksad.

¹¹ Geb Amán e-ibmar-nuegan-bukidar-nikadgi, masmala-bukidar-nikadgi sunmaknai gusad. Deginbali, rey, e-nug-odummosgusadgi, degi, rey-sorba-negmar-dakmamaid-birgi, igi rey e-odungusa, degi, dule-reyga-arbamalad-e-dummagan-birgi, igi rey e-odungusbali, agi sunmaknai gusbalid.

¹² Geb Amán sogdebalid: —Rey-ome-Ester, reyga mas-imaksadse-atakdagega unnila ansebi gochad. Deginbali, oibosale, gannar Reyba mas-gunnabaliga unnila ansebi gochabalid.

¹³ Degi-inigwele, we-Judío-dule-Mardoqueo reyneg-yawagakgi-sii an daked-ilibali, dummadga-nugsalessuliyob an itoddaed.

¹⁴ Geb degine, e-ome-Zeres, degi, bela e-aimar Amánʼga sogdemalad: —Suar daliambe-gakabo-gaka-negabar-nibgued (12½) be ogwiso. Geb banedse, be Reyse egisoed, Mardoqueo dukargi edinnar bannu-bannu nasikye. Degidbali, be weligwar Reybo mas-gunnaoed. Weyob ega binsaed-uksamaladi, Amán yeer-itosad. Geb Amán suar-ogwisguega igar-uksad, agi Mardoqueo-e-dukar gaegar.