Esdras 10 - Kuna San Blas

Israel-dulemar na e-isgued barsogsamalad

¹ Esdras Bab-Dummadse-goled-neg-asabin, Israel-dulemar-isgusad-ular, ise-boale, degi, yokorgi-sindigar, Bab-Dummadse gorsiidgine, bukidar Israel-dulemar: Machergan, omegan, mimmiganse-bakale, ese ambikunonikid. A-dulemar, bela ise-boedbimarmogad.

² Geb degine, Jehiel-machi-Secanías, Elam-wagangi-danikid, Esdrasʼse aligusad. Geb weyob ega sogded: “Anmar, omegan-Israel-dulesurmalad nikus-nanasoggu, anmar-Bab-Dummadgi nue-nosad. Degi-inigwele, amba sunna anmar bendakleged.

³ Degisoggu, anmar, anmar-Bab-Dummadbo, igar mesmardo. Emi, bela we-omegan-Israel-dulesurmalad anmar metemaloye, mimmigangi bangumarbaloye, be anmargala binsaed-uksadba, deyob anmar imakodo. Degi, dule-Bab-Dummad-Igar-Maidba-nanadimalad-sogsamogadba, deyob anmar imakodo.” Degisoggu, Bab-Dummad-Igar-Maidba imaklesundo.

⁴ Geb degi, Esdrasʼga sogdemalad: “Gwichibin be imake, ar we-igarde be imakergebed, ar anmar be-bendakmogoed, gandik be-sae, be ibmar imake.”

⁵ Degidgine, Esdras gwichibin imaksad. Geb Esdras, dule-irwa-Bab-Dummadse-gormalad-e-dummagan, Levita-dulemala, bela Israel-dulemala ibmar-sogsamaladba-ise-sogar-imakega, imaksad. Degisoggu, Israel-dulemala ise-sogar eyeye na sogsamalad, deyob imakmaloye.

⁶ Geb agi, Esdras, Bab-Dummadse-goled-neg-asabin-sii nadsunnad. Geb Johanán-e-gabednegse naded. Johanánʼde, Eliasib-machid. Agine, dulemar-galesgusmalad-gannar-nonimalad-e-isgusadba, Esdras, nue bukib-binsaedba, gwen gobsasuli, mas-guchasuli, gabided.

⁷ Geb sorbali, dulemar-galesgusmalad-nonimaladse gorlesad. We-dulemarse gorlesad: Judá-yalagi-bukmaladse, degi, Jerusalénʼgi-bukmaladse. Ega weyob soglesad: “Jerusalén-neggweburse ambikunonimaloye.”

⁸ Degi, ega soglesbalid: “Dule ibapaagwadgi nonisulile, bela ei e-nainumar-nikadi sulegoye. Ar igi-dummagan, degi, Judío-girmar-dummagan igar-mesisa, deyob guoye. Degi, dulemar-galesgusmalad-nonimalad-imbagi, bemar-ononnolegoye,” ega soglesad.

⁹ Geb degine, a-ibapaagwadgi, bela machergan Judá-yarginmalad, degi, Benjamín-yarginmalad, Jerusalén-neggweburse ambikunonimalad. Deunni, nii-walabakebakgi, e-iba-durgwengi, bela dulemar Bab-Dummadse-goled-neggi ambikued-neg-naidgi ambikusmalad. Degi, weyob ibmar-soglesadba, nue dobee itodmalad. De-ukinbali, dii nue-winaibarsoggu, a-bakas bela-belad wawanmakbukwad.

¹⁰ Geb degi, dule-irwa-Bab-Dummadse-goled-Esdras gwichibin imaksad. Geb amarga weyob sogded: —Bemar, bela-belad Bab-Dummadgi nue isgusad, omegan-Israel-dulemarsurmalad be nikusmalad. Degidbali, bela-belad Israel-dulemar-isguega be imaksamalad.

¹¹ Emi, anmar-dadgan-e-Bab-Dummad-Jehová-asabin, be-isgusmalad be barsogmarsun. Bab-Jehová-ibmar-abegedba be imakmalo. Degine, dule-Bab-Jehová-wissurmaladgi be bangumalo, omegan-be-dulamarsulid be metemalo.

¹² Geb, bela dulemar gandikidba, Esdras-abin sogdemalad: —Ar deyobdo. Degiirdi nabir, be-sogedba anmar imako.

¹³ Degi-inigwele, anmar bukidarsoggu, degine, diide nue-winaibarsoggu, anmar geg weyob magaba bukwa gued. Ar we-igarde binsa ibagwenadye, degi, ibabogwadye soglesulid, ar ade, anmar bukidar na we-igargi isgusmaladbiid.

¹⁴ ”Degisoggu, anmar sogsundo, dule e-neggweburga-dummadga-gudimalad, e-sordagan-ular, wegi beoye, adi, amar-ular sunmakegar. Geb dulemar-omegan-Israel-dulesulid-nikusmalad iba-sogedba nonimaloed. Wemar dule-dummagan-abargi, dule-igar-nabiromalad-abargi, degi, e-neggwebur-e-neggwebur-iliba wese nonimaloed. Adi, Bab-Dummad anmar egi-isgusad-ular anmarse-urwemaidi, melle bar anmarse urwegar.”

¹⁵ Geb degi, unnila Asael-machi-Jonatán, Ticva-machi-Jahazías, wemar-ebogwad, we-ibmar-sogsamaladgi gwisgusad, degine, Levita-dulemar-ebogwad Mesulam, Sabetai, we-dulemarba nai gusmarmogad.

¹⁶ Dulemar-gales-selesgusmalad-nonimaladdi, na sogedba imaksad. Geb degine, dule-irwa-Bab-Dummadse-goled-Esdras, neguya-gwenna-gwennagi dummadga-gudimalad amisad, adi, dulemar-omegan-Israel-dulesulid-nikusmaladga igar-amiegar. Geb, nii-warambegi, a-ibagwenadgi, dulemar e-neggweburmar-ular dummadga-besmaladi na igar-amidmalad.

¹⁷ Degi, gebe-nii-yolesad-ibagwenadgi, bela-dulemar omegan-Israel-dulemarsulid-nikusmaladga igar-nabiroleged bergusad.

Dulemar-omegan-Israel-dulemarsulid-nikusmalad-e-nugmar

¹⁸ Dule-irwa-Bab-Dummadse-gormalad-e-wagan, omegan-Israel-dulesulid-nikusmalad, wemalad: Josadac-machi-Jesúa, Josadac-wagangi-danikid, degi, e-gwenadgan: Maasías, Eliezer, Jarib, Gedalías.

¹⁹ We-dulemar na nue-ise-sogar sogsamalad, we-omegan-Israel-dulesurmalad anmar metemaloye. Degine, amarde, e-isgued-eliega, Bab-Dummadga sibad-wawaad-machered-wargwen ogumakar uksamarbalid.

²⁰ Imer-wagansikid: Hanani, Zebadías.

²¹ Harim-wagansikid: Maasías, Elías, Semaías, Jehiel, Uzías.

²² Pasur-wagansikid: Elioenai, Maasías, Ismael, Natanael, Jozabad, Elasa.

²³ Levita-wagansikid: Jozabad, Simei, Kelaía. Kelaíaʼde, Kelita-duled. Petaías, Judá, Eliezer.

²⁴ Dule-Namakmalad-e-wagansikid: Eliasib. Dule-yawagak-dakmalad-e-wagansikid: Salum, Telem, Uri.

²⁵ Deginbali, Israel-dulemar-baigansikmalad. Paros-wagansikid: Ramía, Jezías, Malquías, Mijamín, Eleazar, Malquías, Benaía.

²⁶ Elam-wagansikid: Matanías, Zacarías, Jehiel, Abdi, Jeremot, Elías.

²⁷ Zatu-wagansikid: Elioenai, Eliasib, Matanías, Jeremot, Zabad, Aziza.

²⁸ Bebai-wagansikid: Johanán, Hananías, Zabai, Atlai.

²⁹ Bani-wagansikid: Mesulam, Maluc, Adaía, Jasub, Seal, Ramot.

³⁰ Pahat-Moab-wagansikid: Adna, Quelal, Benaía, Maasías, Matanías, Bezaleel, Binúi, Manasés.

³¹ Harim-wagansikid: Eliezer, Isías, Malquías, Semaías, Simeón,

³² Benjamín, Maluc, Semarías.

³³ Hasum-wagansikid: Matenai, Matata, Zabad, Elifelet, Jeremai, Manasés, Simei.

³⁴ Bani-wagansikid: Madai, Amram, Uel,

³⁵ Benaía, Bedías, Quelúhi,

³⁶ Vanías, Meremot, Eliasib,

³⁷ Matanías, Matenai, Jaasai,

³⁸ Bani, Binúi, Simei,

³⁹ Selemías, Natán, Adaía,

⁴⁰ Macnadebai, Sasai, Sarai,

⁴¹ Azareel, Selemías, Semarías,

⁴² Salum, Amarías, José.

⁴³ Nebo-wagansikid: Jeiel, Matatías, Zabad, Zebina, Jadau, Joel, degi, Benaía.

⁴⁴ Bela-wemar, omegan-Israel-dulemarsurmalad-nikusmaladid. Geb degi, na e-omegangi bangudmarsunnad, e-mimmigangi aibatemarsunnad.