Esdras 1 - Kuna San Blas

1. ISRAEL-DULEMAR GANNAR E-YARSE-NADMALAD (1:1–2:70) Rey-Ciro-igar-uksad

¹ Rey-Ciro, Persia-yar-e-reyga maigusad. Ciro-gebe-reyga-megided-birgagi, Bab-Jehová, Rey-Ciro-e-gwage ebusad, adi, bela e-yar-dakmaidgi igar-mesegar. Adi, we-igar-megoedba, nabir Bab-Jehová Jeremíasʼba gayaburba-sogsadba guegar. Degine, Rey-Ciro bela yar-ganikidgi igar-mesisad sogsa gusad, degi, gardagi-narmakar imaksabalid. Weyob sogsad:

² “Persia-rey-Ciro weyob soged: ” ‘Bab-Dummad-Jehová-Nibneggi-Maidi, anga we-napneg-dirbir-naidgi bela yarmar-nanaid uksad. Degi, anga sogsabalid, Judá-yargi Jerusalén-neggwebur-siidgi ese-goled-neg ega soboye.

³ Degisoggu, anmar-abargi-Judá-dulemar-gudimalad Jerusalén-neggweburse be namar. Israel-dulemar-e-Bab-Dummad-Jehováʼga ese-goled-neg be sobnamar. We-Bab-Dummadde, Jerusalénʼgi maid. Degi, a-Bab-Dummad bemarba naena gadin.

⁴ A-ukinbali, an igar-ukbardo, dule-bamaladi Judío-dulemar-amba-gudidimalad-bendakega we-ibmar ukmalo: Mani, olo, ibmar-nuegan, degi, e-ibmar-durgan ukmalo. De-ukinbali, dulemar Bab-Dummadga-ibmar-ukleged e-binsaedba Bab-Dummadse-goled-negga ukbalo.’ ”

Israel-dulemar gannar e-yarse nonimalad

⁵ Degidgine, Judá-wagan-e-dummagan-neguya-sedimalad, Benjamín-wagan-e-dummagan-neguya-sedimalad, dule-irwa-Bab-Dummadse-gormalad, degi, Levita-dulemar, degi, Bab-Dummad bela dule-gwenna-gwenna-e-gwage-ebusmaladmala, amar Jerusalén-neggweburse Bab-Dummadse-goled-neg-sobnaega guakwaa ambikusmalad.

⁶ Bela dulemar e-neg-nagaba-mamaimalad bendaksamarmogad. We-ibmarmar ega uksamalad: Mani, or, ibmar-nuegan, ibmar-durgan, degi, ibmar-gargerbamalad ega uksamalad. Deginbali, dulemar, bela ibmarmar-akar-akar e-binsaedba Bab-Dummadse-goled-negga uksamarbalid.

⁷ Epenne, Jerusalénʼgi Bab-Jehováʼse-goled-neggi-ibmar-ebulemalad, Nabucodonosor Babiloniaʼse sear gusad. Geb e-bab-dummadse-goled-negse urbenoni gusad. Emide, a-ibmarmar Persa-rey-Ciro onisad.

⁸ Degi, Persia-rey-Ciro, e-mani-daked-Mitrídatesʼga ibmar-onilesmalad uksad, adi, ebisegar. Bela ebichisgu, Judá-dulemar-e-dummad-Sesbasarʼga we-ibmarmar uksad.

⁹ Ar ibmar-ebislesmalad, wemalad: Bate-dummagan-orbiid, gwadulagwen-gakambe (30). Bate-dummagan-manibiid, miligwen (1,000). Estin, gadulagwen-gakabakebak (29).

¹⁰ Nog-orbiid, gwadulagwen-gakambe (30). Nog-manibiid, gwadulataled-ilabake gakambe (410). Degi, ibmar-baigan-ebulemalad, miligwenba (1,000).

¹¹ Ibmar-ebulemalad-orbiid, degi, manibiid, bela miliatar gaka dulataled-ilabake-mergu (5,400) daklealid. Bela we-ibmarmar Sesbasar gannar Jerusalén-neggweburse sesa gusad, deun Judá-dulemarga soglesgu, bemar gannar Babilonia-neggweburgi-bukwad Jerusalén-neggweburse namaloye.