Eclesiastés 4 - Kuna San Blas

Dulemar-mesagwar-imakledimalad

¹ An dakdebalid, we-napneggine, dule-mesagwar-imakledimalad yaisulid. Dule-mesagwar-gudimaladi bodidii an daksad, dule-gadi-gadi-e-gwage-imakedi sate gudimalad. Dule-mesagwar-gudimaladi, dule-gadi-gadi-e-gwage-imakedi sate gudimalad. Dule-wemar-mesagwar-imakdimaladi, gangued nikamalad.

² Degidbali an binsaded, dule-burgwismaladi, dula-gudimaladba bur weligwar gumalad.

³ Ar degi-inigwele, amba yoo-gwalulemaladdi, bur bule wemarba weligwar gumalad. Ar ade, we-napneggi ibmar-isgana-imaklemalad amba yoo dakmalad.

⁴ An daksabalid, arbaed-dummad-imakedi, degi, ibmar-imakedba-nasgumaiguedi, nobed uked. Wedi binsarsunna imaklebalid, gwage-nunmaked ukbalid.

⁵ Dule-binsaedsulid, gwen arbasuli ukudmaad burgwidoed.

⁶ Sikwas-obunnolegedi, doggus-obicha-arbaedba bur nuedid. Ar doggus-arbaedi, gwage-nunmaked uked.

Bulakwaa-arbaed gargangued uked

⁷ We-napneggi, ibmar-binsarsunna-imakleged-baid an dakdebalid:

⁸ Dule-wargwenad mimmigansuli gudiid, degi, gwenadgansuli gudibalid, bipisaar arbaed indakdisulid. Bato-ibmar-nikadi amba yeer-itosulid, bur bule ibmar nikubied. Gwen binsasurbalid, doaga ede alamaknai. Gwen werguedgi binsasurbalid. Wedi binsarsunna imaklebalid, arbaed-dummad gued.

⁹ Dule-ebogwad, dule-wargwenadba bur nuedid. Ar na e-arbadiidgi bur bule ibmar-nuegan nikumalad.

¹⁰ Ar gwensak aimukudele, baid ogwichoed. Ar dule walagwen-gudiiddi, aimukudele, dummad-wilegoed, ar dule-baid-e-ogwisgued sateoed.

¹¹ Ar dule-ebogwad na walikaa megmalale, na muchub-muchub uee imakmaloed. Ar dule walagwen-megerdi, ¿igi na uee itogoe?

¹² Dule walagwenale, sunna dule-baidse galakued. Ar ebogwardina, sunna dule-baid-abin ganna gwisgumalad. Dub-giapaa-bipirmakaledi, irgwensuli itirsulid.

Sapingwa-gued, binsaed-nikagued

¹³ Sapingwa-wilesakwagwad binsaed-ibed-gudiid, bur nuedid, rey-sered binsaedsuli-gudiidba. Ar we-reyde, dule-ega-binsaed-uked bar abesulid.

¹⁴ Ar we-sapingwa, esgaryagi-mellesii gusdibe, e-yargine wilesakwaa gwalulesdibe,

¹⁵ degi-inigwele, we-napneggine an daksad, we-sapingwa rey-sorba reyga-megnonikile, dulemala eba nanai damalad.

¹⁶ Ar amba dule-bukidar we-sapingwa-gebe-reyga-megidedgi eba nagusdamar-inigwele, degite, dule-danimarmogoedi amba we-rey gwen yeer dakosurmarmogad. Amba we-ibmala binsarsunna imaklebalid, gwage-nunmaked ukbalid.