Eclesiastés 11 - Kuna San Blas

Binsaed-nikadgi-itoakwaa-ibmar-imakleged ibnuedid

¹ Diaki be-madu be mete, yoedsega be gannar amioed.

² Be-ibmar-nikad, dule-walaguglega (7) be uke, dule-walabaabakadse (8) ega be ukodibe. Ar yoedsega we-napneggi bonigan-gwisgunonikoed be wissulid.

³ Mogirmar gudure-naddibe, dii wiardaed. Sapi dad-nakwed-argan-sapiledsik ailaddibe, dad-nakwed-argan-nuedsik ailaddibe, ar agi megodo.

⁴ Dule unnila burwa-goledginbi atakdidibe, ibmar-gwag digosurguoed. Dule mogirmarginbi atakdidibe, ibmar-gwag weosurguoed.

⁵ Ar be wissulid, bia burwamar naddae. Be wissurbalid, igi mimmi sapidukugi-mege, degi, igi dungumaidabali. Degisoggu, ar bela Bab-Dummad-e-ibmar-imaked-bursunna, igi be wisguosunna. Geg be wisgued.

⁶ Wakudaryala ibmar-gwag be digo, sedogidbali, be baid digbalo. Ar be wissulid, biti bur bega nabir igarga gudoe, wakudaryala-diglesaddibe, sedo-diglesaddibe. Ar wisgulesulid, biti nabir igarga gudodibe. Ar ebobela sanmakdebalodibe.

⁷ Neg-meegwadi yeer emar-imaked. Dad-ibeler-gaedi weligwar emar-imaked.

⁸ Amba dule undar seredi-megye-sogele, degine, e-ibagangi wergudigus-inigwele, ebinsao, ibagan-bulegan-bukidar itodii gubaloed. Deginbali, bela ibmar-danikoedi, gwen nabirsulid.

Be-Bab-Dummad-be-obinnisad be ebinsao

⁹ Machi-sapin, sapingwa-guedgi gatik be werguo. Nuchukwagwadgi na be yeer-itodii imako. Be-gwage-itogedba na be ibmar imako, be-ibyagwar-neg-dakdiidba na be ibmar-imakbiedba imako. Degi-inigwele, be ebinsao, Bab-Dummad ar bela be ibmar-imaked, wilubdaknonikoed.

¹⁰ Degisoggu, urwed be iego, ibmar-isgana-imaked be iebalo. Be ebinsao, ar sapingudanikidgine, degi, sapingwagwadgine, amba aku neg-itoleged-ibaganad. Ar we-igar gwen-nabirsulid.