Eclesiastés 10 - Kuna San Blas

Binsaed-nikagued sunmaknaid

¹ Gukur-burgwaled neg-nunu-yapanne imaked, degidbali, ina-wawa-sobed-ibe ina-wawadikid oichoged. Deyobi, gaya-isgana-sunmakleged, bela dule-binsaed-ibed-e-sunmaked oichoged, e-nug-nued oichobalid.

² Dule-binsaed-ibed-e-gwage ibmar-nued-imakedgi binsaed. Dule-binsaedsulidaed-e-gwagedina, ibmar-isgana-imakedgi binsaed.

³ Dule-binsaedsulidaed, ar ibu imakalile, e-ibmar-imakedgi magasar na oyoged, ede, dule-binsaedsulidye.

⁴ Dule-sapin-dummad-negsemaid bese ulualile, mer be abin-imakdebin sao. Ar san-bargaagwar-imaklegedi, bukidar ibmar-noar-imakleged bargaed.

⁵ We-napneggi-gudiidgine, an daksabalid, sapin-dummagan-negsemamaidi, weyob ibmar noar-imakdimalad:

⁶ Dule-binsaedsulidaedgala, aka arbaed-nuegan ukleged. Ar dule-bur-nabir-binsamaladgardina, arbaed-baisulid ega ukleged.

⁷ An daksabalid, dule-maiga-gudimaladi, moli-birgi-sii gudidamalad. Ar dule-nuga-nikamaladdina, maiga-gudiiyob nagab galitodidamalad.

⁸ Dule yaa-matusur-akwisdibe, sunna egi argwaned. Dule gagan-matusulid-eminaidibe, sunna dubgi warmaked.

⁹ Dule, akwa mamarye-sogdibe, sunna akwagi nailikgued. Dule sapan mamarye-sogdibe, sunna e-dargagi makleged.

¹⁰ Ar akan e-nugar-berguddibe, e-nugar ebillesurbardibe, ibmar-sikegala, sabsur achiklegergebed. Binsaed-nikaguedgi ibmar-imaklegedi, nuekwagwadgi-ibmar-imaklegedi, ibmar-nued amileged.

¹¹ Ar naibe gar-ogoledba-ododoleged-iduar, dule-ega-gar-ogoledgi warmaksadibe, dule gwen egi bar mani amiosulid.

¹² Dule-binsaed-ibed-e-sunmaked yeer itoledaed, dule-binsaedsulidaed-e-sunmakeddina, na dukin egi aibined.

¹³ Dule-binsaedsulidaed gebe sunmakdele, e-gaya-miedi, gwen nabir sunmaksulid. Deyob gaya-nuedsuli e-sunmaked obeloddaed.

¹⁴ Degite, sunmaknaigusale, gayaburbamar suli-suli amisulid. Dule neg-guoed gwen wissulid. Yoedse ibmar-danibaloed gwen-wissurbalid. Ar dule, we-ibmar, gwen wisguosulid.

¹⁵ Dule-binsaedsulidaed, arbaedgi baisursunna yegued. Neggweburse-naed-igarbela wissurbalid.

¹⁶ Rey amba nuchukwagwar, neggwebur, wilesdakledaed. Degine, e-sapingan-dummaganmoga, unnila wakdaradba iba-onogedgi arbadidamalad, deyob osedoddamalad.

¹⁷ Neggwebur-e-rey dule-nuga-nikaddibe, we-neggweburgi ise-nued binsalesad. Degine, e-sapin-dummagandina, e-wachiba na mas-gunmalad, deyob na niga-ogannomalad. Mumguega ambikusurmalad.

¹⁸ Wiedba neg-uas-nudaklesulile, neg-uas ayariddaed, degine, wiedgi-neg-soblesadbali, neg maluddaed.

¹⁹ Wergulegegala, masgulleged-iba onoleged, yeer-itolegegala, vino goblebalid. We-ibmar-imakegala, mani abeleged.

²⁰ Reygi mer be ichakwa sunmako, mer egi be ichakwa binsabalo. Deginbali, dule-mani-ibedgine, mer egi be arbakee isdar sunmakbalo. Ar sikwimar-gudidiid sunna be-barsoged, ar sikwimarde sakan-nika nanaed, degisoggu, baisursunna gayamar berbeged.