Eclesiastés 1 - Kuna San Blas

1. DULE-BAB-GAYABURBAGI-SUNMAKED E-SAN-GUSADGI SUNMAKED (1:1–2:26) Bela ibmar binsarsunna imakleged

¹ Odurdaked-Saila David-machi, Jerusalén-neggweburgi-reyga-megisadi, weyob sogsagusad:

² “We-napneggi-ibmar-imaklegedi, binsarsunna imakleged, bela igarga gwen gusulid.”

³ Dule we-napneggi na gandikidba-alamakdiile, ¿ibu-nued egi amioe? Ibmar-nued amiosuli.

⁴ Dulemar gwalulemamaid. Bamaladdi burgwemamaid. Ar napnegdi amba gannar naid.

⁵ Dad-ibeler nakwiardaed, argwatedabalid. Na-bia-nakwiardaedse gannar gwae-gwae naddabalid, gannar nakwidabaligar.

⁶ Burwa-goledi, dad-nakwed-argan-nuedsik gollardaed, geb sorbali, dad-nakwed-argan-sapiledsik aibiliddaed. Deyobi, burwa-goledi, gwen bogigusuli, gannar-gannar bipirmakdiguad.

⁷ Bela diwarmar demarse nomaid, degi-inigwele, demardi gwen engudasulid. Diwarmar na bia gwalulemai, ase gannar aibirsibalid, adi, agi gannar nodagegar.

⁸ Bela we-ibmargi-sunmaklegedi, budar-itoleged uked, gwen egi bar sunmaklebidasulid. Ibya, ibmar-dakedi gwen geggusulid, uaya, ibmar-itogedi gwen geggusulid.

⁹ Bato ibmar-gusadi, gannar gunonibaloed. Bato ibmar-imaklesadi, gannar imaklenonibaloed. We-napneggine, ibmar-gwapid sated.

¹⁰ Dule-gwensak, sokardibe: “Be dakena, wedi ibmar-gwapidid.” Ar we-ibmardi, bato gusgu gudiguad, anmar-idu-gudigusmalad-abargi bato gudiguad.

¹¹ Ibmar-epenne-gusmaladi, bela ielesad. Dule-yoedse-gwalulemaloedi, bela ibmar-yoedse-guoedi, iemarmogoed.

Dule-Sunmakedi, e-san-gusadgi sunmaked

¹² Ani, an emar-odurdakedid, an Israel-yargi, Jerusalén-neggweburgi reyga mai gusad.

¹³ An nue-binsaed-nikadba bela we-napneggi-ibmar-imakleged-e-burba-baraminai, degi, egi nergunai an gusad. Bab-Dummad dulemarga we-arbaed-dummad uksad, adi, egi arbadii gumalagar.

¹⁴ Bela we-napneggi ibmar-imaklegedi, an daksad. Bela a-ibmarmar binsarsunna imakleged, gwage-nunmaked ukbalid.

¹⁵ Ibmar-doperegwadi, geg bar gannar innikii gued. Ibmar-satedi, geg ebisleged.

¹⁶ An binsadii gualid: “Emide, an wegi dule-nug-nikadga gunonikid. Jerusalén-neggweburgi an-idu-dummagan-megismaladba an bur nue-binsaed-nikaa gued. Anyobi, dule-baid bela-bela nue-binsaed-nikaa, bela ibmar-wisi megdisulid.

¹⁷ ”An ulubgi bela-bela wisgubigualid, nue-binsaed-nikaguedi, wede ibi obarleye. Deginbali, an magar-itobiguarbalid, binsaedsuli-ibmar-imaklegedi, wede ibi obarlebarye, degi, yogasaar-sunmaklegedi, ibi obarlebarye. ”Geb an wisgunonikid, amba we-ibmarse-bakale, gwage-nunmaked ukbalid.

¹⁸ Napiragwa, ar bela-bela nue-binsaed-nikaguedi, bur bule bonigan ukbalid. Ar dule bur bule ibmar-wisguedi, bur bule naibid itobalid.”