Cantares 1 - Kuna San Blas

1. NAMAKLEGED-GEBED (1:1–2:7) Ome-abirgin-nikad-e-namaked

¹ Salomón we-namakleged-birigined narmaksad.

Ome-nue-sabgulediid namaked

² ¡Bitigi be an-wagar-usana gadina! Be-sabgued vino-goblegedbali, bur bule yeer itoleged.

³ Be-ina-wawadikid-e-yapannedi, nue-yeer yapanned. Ar be-sunnadi, ina-wawadikidyob gued. ¡Agala, yagana nue-bebina sogmalad!

⁴ ¡Be an-nide! ¡Gwae beba be an-nide! ¡An-rey, be-gabednegse be an-sede! Anmar wergumarsun, anmar yeer-itomarsun. Be-sabguedgi, vino-goblegedbali, bur bule anmar egi wergue. ¡Agala, bebina nue sogmalad!

⁵ ¡Jerusalén-neggwebur-bunamala! An uka sichii gued, an yeer dakleged. Cedar-dulemar-dordoneg-sichigan-bubukwadyob an-uka sichii dakleged. Salomón-mor-dummaganyob an yeer dakleged.

⁶ Mer an-uka-sichigwadgi be atakmala, ar dad-ibeler-gaedba, deyob an gusad. An-susmar anse ulusmalad, e-uva-dub-nainu-akwega an-imaksamalad. A-ulale, an-uva-dub-nainu bar an nue akwissurgusad.

⁷ ¡An-sui-nue-sabesailad! Anga be soge, be-sibadmar-gagangi-omanaegala, ¿bia be omanaddae? ¿Bia yorukudba be obunnogega seddae? ¿Ar ibiga an dule-negsuligudidaeyobi, be-aimar-sibad-bukwad-abargi an be-amidii guoe?

E-aimar bular namaked

⁸ Omegan-yeerdaklemaladba, bur be yeer dakleged. Be-sui-nue-sabesailad-amiegala, sibad-gannarba be nae. Be-sibad-burwigan masgi-omanae, dule-sibad-edarbemalad-e-dordoneg-dikarba be omanae.

Sui-nue-sabgulediid namaked

⁹ Be, an-ome-nue-sabesailadid. Bee be Faraón-ur-ebipimalad-moli-omegan-nuegan-yeerdaklegedyob be gued.

¹⁰ Ibiyob be-wagar yeerdaklege, be-wagar oluamar-abargi yeer dakleged. Ibiyob be-dukar yeerdaklege, wingwamar-naid-abargi yeer be-dukar dakleged.

¹¹ Anmar bega oluamar-olobiid soboed, oluamargi manimar-nanai bega imakoed.

Ome-nue-sabgulediid namaked

¹² Rey e-megedgi yollekwaa megisale, an-ina-wawad, wawadik-oburmakdedaed.

¹³ An-sui, ina-wawadikid binasgargi-atinnar-sagu-bipigi-seledidaedyob, anba gabdiid.

¹⁴ An-sui, Engadiʼye-neg-nugadgi dutu-nuegan-nigwichiyob, anga gued.

Sui-nue-sabgulediid namaked

¹⁵ An-ome-nue-sabesailad, ¡ibiyob be yeer daklege! ¡Doggus nued be dakleged! ¡Be-ibyamar, nuumaryobi gued!

Ome-nue-sabgulediid namaked

¹⁶ ¡An-sui-nue-sabesailad! ¡Ar ibiyob be yeer daklege! ¡Machered-nued be daed! Gaganmar-aramakmamaidi anmar-gabedga guoed,

Sui-nue-sabgulediid namaked

¹⁷ anmar-neg-nagubirmar urwarmar mamaid, anmar-neg-uas ciprés-e-urgomar mamaid.