Apocalipsis 1 - Kuna San Blas

1. GEBE-SIKWAS-SOGLENAID (1:1-8) Jesucristo, yoo-ibmar-guoed oyosad

¹ We-yoedse-ibmar-guoed-oyolesadi, Jesucristoʼgadid. Bab-Dummad Jesucristoʼga we-yoedse-ibmar-gumaloed oyosad. Jesucristo, na e-maigan we-ibmar-emissaar-gumaloed-wisgumalaga oyosad. Wisgumalagala, Jesucristo na e-baliwitur e-mai-Juanʼse barmialid.

² We-Juan, na e-sunnad-daksadbali, Bab-Dummad-bela-ega-sogsadba, degine, Jesucristo-bela-ega-oyosbalidba, narmaknonikid.

³ Dule-we-garda-absomaladga, yoo-ibmar-guoed-itomarbalidga, degine, bela narmakar-naidba-eba-damaladga ibnuedga gued. Ar we-ibmar-guoed-ibagan emiskwaa deyob gunonikoed.

Juan, Jesúsʼba-nanaimalad-sogagugledga (7) nued-sogeye sogsiid

⁴ Ani Juan, Jesúsʼba-nanaimalad Asiaʼgi-bukmalad-sogagugledse (7) an we-garda narmaksiid. Bab-Dummad-Dula-Maidi, gusgu-danikidi, degisadegu-mai-guoedi, degi, burbamar-walagugle (7) Bab-Dummad-ologana-asabin-bukwamaladi, degine, Jesucristoʼmala, bemargi nued binsasun, degine, ulubgi bogidik bemar-itogega-imakbarsun.

⁵ Ar Jesucristo we-ibmar-napiragwad-daksadid, e-inse-durgusadid, reymar-napneggi-negsemamaid-e-dummadid. We-Jesucristo anmar-sabgusadid, e-abegi anmar-isgued-osulononikid.

⁶ E-Bab-Dummadga reymarga-guega anmar-imaksad, dule-irwa-Bab-Dummadse-gormaladga-guega anmar-imaknonikid. A-Jesucristo-nug odummolesun, e-gangued degisadegu odummomarsun. Ar deyob gusun.

⁷ Bela-dulemar Jesús-mogir-imbaba-aidedani dakmaloed. Dulemar-Jesús-ewarismalad amba dakmogoed. Bela-dulemar-baid-baid-we-napneggi-danar-danar-bukmalad Jesús-dani-dakdagogu, bodmaloed. Eye, deyob gusun.

⁸ Bab-Dummad-Bur-Birigined weyob soged: Ani an Gebesailaginedid, (Alfa). Ani an Napisoladbalid, (Omega). Ani an Bela-Gangued-Nikad, gudiid, ani an Bela-Gangued-Nikad, gudigusad, ani an Bela-Gangued-Nikad, gudigubaloed.

2. IGLESIA-SOGAGUGLEDGA (7) SUNMAKSAD (1:9–3:22) Juan negburgan-daksadgi Jesús-daksad

⁹ Ani Juan bemar-gwenad, bemar-sunnaa wiledimogad. Bemar-sunnaa Bab-Dummad negdakmaidgi dogarmogad, degi, bemar-sunnaa binnalegwadgi Bab-Jesús-igargi alamaknaimogad-duled. An Bab-Dummad-gayaburba-barsogdiid-ular, degi, Jesucristoʼgi-sunmakdiid-ular, an Patmos-dupgi odurdaklesiid.

¹⁰ Bab-itoged-ibagi Bab-Dummad-Burba-Isligwaled bela-bela angi nonikid, an-yarganba gar-trompeta-goleyob binnasur gayaburba gornonikid,

¹¹ sognonikid: “[Ani an Gebesailaginedid (Alfa), ani an Napisoladbalid (Omega)]. We-ibmar be dakedi, gardagi be narmake. Jesúsʼba-nanaimalad-Asia-yargi-bukmalad-sogagugledse (7) be we-garda barmide: Éfesoʼgi-bukmaladse, Esmirnaʼgi-bukmaladse, Pérgamoʼgi-bukmaladse, Tiatiraʼgi-bukmaladse, Sardisʼgi-bukmaladse, Filadelfiaʼgi-bukmaladse, degi, Laodiceaʼgi-bukmaladse.”

¹² Dule-anga-sunmaknaid-dakega an aibirided. An aibirisgu, gwallu-sied-orbiid gwagugle (7) gwichi an dakalid.

¹³ We gwallu-sied-gwagugled-abargi, Dule-Machi-sunnaa gwichi an daksad, mola-suid naga-dukuse-yoi an daksad. E-binasgargi-molidubyob-ebirnai olo-sunnabi-nai an daksabalid.

¹⁴ E-nonodi, degi, e-sailagiadi, bela dagudik, sibad-wawaad-e-absar-sibudikidyob an daksabalid, dambed-bated-sibudikidyobid. E-ibyadi, sooyob-gae an daksabalid.

¹⁵ Degine, e-nagmar, igi esgordikid-soo-yagi-dulenair dakarmake, ayob gaed. E-sunmaked suke-dummad-aryomaidyob goled.

¹⁶ E-argan-nuedsik niisgwa-gwagugle (7) ganibalid, e-gaya-yaba es-suid isedar-swiswimakaled nugar-abinbela-nikad nogwichid. E-wagar, dad-ibe isedar-daarmakar-gaedyob dakleged.

¹⁷ A-dule deyob an dakargu, burgwisayob an e-nag-naba aimukuded. We-dule, e-argan-nued an-birgi-mesisgu, anga sogded: “Mer dobgu, ani an Gebesailaginedid, ani an Napisoladbalid.

¹⁸ An dula gudiid. Ani an burgwis gusadid. Emigindi, degisadegu an dula gudiid. Ar napiragwad. Deginbali, ani an burgwed-yabe, degine, burgwarmalad-e-neg-Hadesʼye-nugad-yabe an ganikidbalid.

¹⁹ ”Be ibmarmar-daksad narmake, be ibmar-daked narmakbalo, we-sorba-ibmar-gumaloed-dakoed be narmakbalo.

²⁰ Niisgwa-gwagugle (7) an-argan-nuedsik-gani be an-daksadi, degine, gwallu-sied-gwagugled-olobiid be daksabalidi, ¿wede ibu obarilesunna? Niisgwamar-gwagugle (7) be daksadi, wemar Jesúsʼba-nanaimalad-bukmalad-sogagugled-e-baliwiturmalad. Gwallu-sied-gwagugled (7) be daksabalidi, wemar Jesúsʼba-nanaimalad-sogagugledid.”