Amós 3 - Kuna San Blas

3. BAB-JEHOVÁ, ISRAEL-DULEMARGI SABSUR-SUNMAKNAID (3:1–6:14) Amós Israel-dulemarga ibmar-sognaid

¹ ¡Israel-dulemar, we-gayaburba be nue itomalo! Bab-Jehová bemar-annik, degi, bela Egipto-yargi dulemar-noargusmalad-annik weyob soged:

² “Bela-dulemar-napneggi-bukwad-abargi unnila bemarbi an be-susad. Degi-inigwele, bela-bemar-ibmar-isgana-imaksadbali, an sabsur-bemar-odurdakoed.”

³ ¿Dule na ebo igar-amisulile, sunna ebo-nued-gudiguo be ebinsae? Suli.

⁴ ¿Achumigur san ganisulile, uurmako be ebinsae? Suli. ¿Achumigur-sapingwa, e-gubya-yaba san ganisuli-maile, uurmako be ebinsae? Suli.

⁵ ¿Nuu-galu-yaba mas-sisulir, nuu galego be ebinsae? Suli. ¿Nuu-galu walagwengi ibmar-galesuli atido be ebinsae? Suli.

⁶ ¿Neggweburgi gar-trompeta gollalile, dulemar dobedba oimakardasur be ebinsae? Eye. ¿Neggweburgi boni-dummadgan-noedi, Bab-Jehová imaksur be ebinsae? Eye.

⁷ Ar napiragwad, Bab-Jehová-Bur-Gandik-Maidi, e-gayaburba-barsogmaladga ibmar-sogsasuli geg ibmar imaked.

⁸ Ar achumigur uurmakalile, ¿doa dobguosur be ebinsae? Bab-Jehová-Bur-Gandik-Maid sunmakele, ¿doa e-gayaburba barsogosur be ebinsamoga?

Israel-yala sabsur-odurdaklegoed

⁹ Asdod-e-neggandikmaladgi binnasur be sogmalo, Egipto-yar-neg-gandikmaladgi binnasur be sogmarbalo. Weyob be sogmalo: “Samaria-yar-birse be ambikudamar, agi dobed-dummad-naid be dakdamar, agi sabsur-wilenanaid be dakdamar.”

¹⁰ Bab-Jehová soged: “Bemar, igar-innikigwadba geg nanamalad: Ar bemar sabsur-urwedgi-ibmar-sumaladid, reyneggi a-ibmar sabomaladid.”

¹¹ A-ulale, Bab-Jehová-Bur-Gandik-Maid weyob soged: “Be-isdarmalad-wargwen gandikidgi be-yar sunonikoed. Be-neggandikmaladi bela bei earmaloed. Be-reynegmargi-ibmar-nuegan-bukwad bela bei sumaloed.”

¹² Bab-Jehová weyob soged: “Igi-sibad-wawaad-edarbedi, e-sibad-wawaad achumigurse-galealile, aisaar na bendaknaidae, degi-inigwele, unnila e-malibi, e-uayadukubidibe na gadapdae, deyobi, wis Israel-dorgan-Samariaʼgi-bukwadi san-onogoed. Deyobi, wis Israel-dorgan-Damasco-neggweburgi gan-mua-muadgi-sigmaladi, san-onogoed.”

¹³ Bab-Dummad-Jehová-Bela-Gangued-Nika-Maid weyob soged: “Nuekwa be an-itomalo. Jacob-dulemarga iduakwaa be ibmar sogmarmogo.

¹⁴ ”Israel-dorgan e-ibmar-isgana-imaksad-ulale, an sabsur-odurdakoed-ibagine, Betelʼgi e-ibmar-ogumakar-ukleged-ailamar an obelogoed. Ibmar-ogumakar-ukleged-ailagi moli-bebegiid-bukwad an bibisgoed, bela napagi an mioed.

¹⁵ Dii-wied-ibagi-obunnoged-negmar bela an bibisgoed, yorgi-obunnoged-negmar bela an eyaroed. Akwa-marfilʼye-nugadgi negmar-sobarmalad bela an osulogoed. Bukidar nega-dummagan-bubukwadi an eyaroed. Ani an Bab-Jehová-guedi we-ibmar soged.”