1 Crónicas 9 - Kuna San Blas

Judíoʼmar gannar Jerusalénʼse nonimalad

¹ Israel-dulemar-e-nugmar bela e-dadgan-e-dadganba Israel-e-reymar-gardagi ilemakar megisad. Judá-dulemar, Bab-Dummad-sogedba-dasurmaladba, Babilonia-neggweburse gales-selesgusmalad.

² Wemar-inse gannar e-neggweburmarse nonimalad: Israel-dulemar-abala, dule-irwa-Bab-Dummadse-gormalad, Levita-dulemar, degi, Bab-Dummadse-goled-neggi-arbamalad. Wemar-inse e-neggweburse, degi, e-nainumar-nanaidse gannar nonimalad.

³ Amar-abargi, wemar nonimarmogad: Judá-dulemar, Benjamín-dulemar, Efraín-dulemar, degi, Manasés-dulemar. Wemar, Jerusalén-neggweburgi ambikusmalad.

Judá-wagan

⁴ Judá-wagan-nonimaladi, wemalad: Utai, Amiud-e-machi, Amiud, Omri-e-machi, Omri, Imri-e-machi, Imri, Bani-e-machi, Bani, Fares-e-machi, degi, Fares, Judá-e-machi.

⁵ Silo-dulemar-nonimarmogad, wemalad: Asaías, machi-sailagined, degi, e-masmala.

⁶ Zera-dulemar-nonimarmogad, wemalad: Jeuel, degi, e-gwenadgan. Judá-e-wagan bela dulataled-ilanergwa gaka dulabake-gakambe (690) mergu nonimalad.

Benjamín-wagan

⁷ Benjamín-wagan-nonimalad, wemalad: Salú, Mesulam-e-machi, Mesulam, Hodavías-e-machi, Hodavías, Asenúa-e-machi.

⁸ Ibneías, Jeroham-e-machi. Ela, Uzi-e-machi, Micri-e-wagwa. Mesulam, Sefatías-e-machi, Reuel-e-wagwa. Degi, Reuel, Ibnías-e-machi.

⁹ Degi, Benjamín-e-wagan, e-dadgan-gardagi-e-nug-ilemakar-mamaid, bela e-gwenadgan-neguyagi dummaganga gudidimalad. Bela we-dulemar, dulataled-ilabakebak gaka dulabo-gakambe-gakanergwa (956) mergued.

¹⁰ Dule-irwa-Bab-Dummadse-gormalad-nonimalad, wemalad: Jedaías, Joiarib, Jaquín,

¹¹ Azarías, Hilcías-e-machi, Mesulam-e-wagwa. Mesulam, Sadoc-e-machi, Meraiot-e-wagwa. Meraiot, Ahitob-e-machi. Ahitobʼde, Bab-Dummadse-goled-neg-iduedid.

¹² Adaía, Jeroham-e-machi, Pasur-e-wagwa. Pasur, Malquías-e-machi. Masai, Adiel-e-machi, Jazera-e-wagwa. Jazera, Mesulam-e-machi, Mesulam, Mesilemit-e-machi, degi, Mesilemit, Imer-e-machi.

¹³ Wemar, Bab-Dummadse-goled-neggi-arbadimalad, Jerusalén-neggweburse nonimarmogad. We-dulemar, nue-ibmar-wisi ibmar-imakdamalad. Degine, e-gwenadgan-e-dummaganga-gudidimarbalid. Bela e-gwenadgan-gumaladi, miligwen gaka dulataled-ilagugle gaka dulapaa (1,760) mergumalad.

¹⁴ Levita-dulemar-nonimalad, wemalad: Semaías, Hasub-e-machi. Hasub, Azricam-e-machi. Azricam, Hasabías-e-machi. Hasabíasʼde, Merari-wagansikidid.

¹⁵ Bacbacar, Heres, Galal, Matanías, Micaía-e-machi. Micaía, Zicri-e-machi. Zicri, Asaf-e-machi.

¹⁶ Obadías, Semaías-e-machi. Semaías, Galal-e-machi. Galal, Jedutún-e-machi. Berequías, Asa-e-machi. Degine, Asa, Elcana-e-machi. We-Elcana, Netofa-dulemar-e-neggwebur-burwigangi maigusad.

¹⁷ Dule-yawagak-dakmalad, Jerusalén-neggweburse-nonimarmogad, wemalad: Salum, Acub, Talmón, Ahimán, degi, e-gwenadgan. Salumʼde, wemar-e-dummadga gusad.

¹⁸ We-Leví-e-wagan, we-garda-narmaklenaidse, Rey-Yawagakye-nugad dad-nakwedsik-siidgi nakulemalaga gudimalad.

¹⁹ Deginbali, yawagak-dakmalad-baigan-nonimarmogad, wemalad: Salum, Coré-e-machi. Coré, Ebiasaf-e-machi. Ebiasaf, Coré-e-machi. Degine, Coré-e-gwenadgan. Wemar, Bab-Dummad-dulemarbo-ambikued-neg-yawagak-dakmaladid. Igi-epenne, e-babgan, Bab-Jehováʼse-goled-neg-e-yawagak-dakega gudii damarmoga, deyob yawagak-dakmarmogadid.

²⁰ Wemar-iduale, Eleazar-machi-Finees, yawagak-dakmalad-e-iduedga gudii gusad. Degine, Bab-Jehová eba-gudii gusad.

²¹ Meselemías-machi-Zacarías, Bab-Dummad-dulemarbo-ambikued-neg-yawagak-dakedid.

²² Belagwable we-dulemar, yawagakgi-nakulegega-sulesmaladi, dulataled-ilabo gakambe-gakabo (212) mergu daklealid. E-neggwebur-burwiganagi, e-nugmar gardagi-ilemakar-mamaid. David, degi, dule-negburgan-daked-Samuelʼbogwa, nakulegega we-dulemar-nug-imaksa gusad.

²³ We-dulemar-yawagakgi-nakulemaladi, degi, e-waganmar, Bab-Jehováʼse-goled-dordoneg-e-yawagakgi nakulemalaga, muchub-muchub ambikudamalad.

²⁴ Dule-yawagakgi-nakulemaladi, Bab-Dummadse-goled-dordoneggi nakulebuk nanaed: Bab-Dummadse-goled-dordoneg-e-dikar-dad-nakwedsik, Bab-Dummadse-goled-dordoneg-e-dikar-dad-argwanedsik, Bab-Dummadse-goled-dordoneg-e-dikar-dad-nakwed-argan-sapiledsik, degi, Bab-Dummadse-goled-dordoneg-e-dikar-dad-nakwed-argan-nuedsik, nakulebuk nanaed.

²⁵ Degine, e-gwenadgan-neggwebur-burwigangi-mamaid, yawagak-nakulegedgi-bendakegala, ibagugle-ibaguglegi (7-7) muchub-muchub gwagbukwad.

²⁶ Dule-yawagak-nakulemalad-e-dummagandina, Levita-dulemar-nanaed. A-dulemardina gusgu nakulebukumalad, ambikumalad-neg dakedid, degi, Bab-Dummadse-goled-neggi-ibmar-gargemalad-bukwadgi nakulemarbalidid.

²⁷ We-dulemar, neg-mutik Bab-Dummadse-goled-neg-naba nakulemalad. Neg-oibosale, bane-bane wakudaradba yawagak-egaar damarbalid.

²⁸ We-Levita-dulemar-gwen-gwen, Bab-Dummadse-goled-neggi-ibmar-ebulemalad-dakmarbalidid. We-dulemar, a-ibmar-ebulemalad-onilealir, abin ebisdamalad, degi, gannar-oubolealir, abin ebisdamarbalid.

²⁹ Levita-dulemar-baigan, Bab-Dummadse-goled-neggi-ibmarmar-bukwad-dakega nug-imaklesmalad. We-ibmarmar-dakegar: Madubur, vino, olivo-gwallu, ina-wawadikid, gwallu-wawadmar, degi, bela-ibmar-ebulemalad.

³⁰ Dule-irwa-Bab-Dummadse-gormalad-gwenna-gwenna we-gwallu-wawadmar-oburedgi arbamalad.

³¹ Levita-dule-Matatíasʼye-nugad, Coré-wagwa-Salum-machi-sailagined, madu-ologana bane-bane-Bab-Dummadga-ukleged-sobedgi arbaed.

³² Degi, gwen-gwen-e-gwenadganmar-Coat-dulemar, obunnoged-iba-irba Bab-Dummadga-madu-ukleged, guakwaa urbisdamalad.

³³ Deginbali, dule-namakmalad, Levita-dulemar-e-dummagan-naed. A-dulemar, Bab-Dummadse-goled-neggi gabedneg-bubukwadgi mamaid. We-dulemar mutikidba, degi, ibginedba, e-arbaedginbi arbananai damalad. Degisoggu, arbaed-baigan imaksurmalad.

³⁴ We-dulemar Levita-dulemar-e-dadgan-e-dadganba gardagi-ilemakar-maidgi maid. Wemar Levita-e-gwenadgan-e-dummaganga gusmaladid. Jerusalén-neggweburgi maigusmalad.

Saúl-e-dadgan, degi, e-wagan-nug-ilemakar-maid

³⁵ Gabaón-neg-nugadgi, Jehiel maigusad. Jehiel, Gabaón-e-babad. E-ome, Maacaʼye-nugad.

³⁶ Jehiel-e-masmala, wemalad: Abdón, e-machi-sailagined. E-urbamar-sorba-gwalulesmalad, wemalad: Zur, Quis, Baal, Ner, Nadab,

³⁷ Gedor, Ahío, Zacarías, degi, Miclot.

³⁸ Miclotʼde, machi-Simeam-nikusad. Wemar, e-gwenadganmar-abargi, Jerusalén-neggweburgi gudii gusmarmogad.

³⁹ Ner, machi-Quis-nikusad. Quisʼdi, machi-Saúl-nikusad. Saúl, masmala-nikusmogad, wemalad: Jonatán, Malquisúa, Abinadab, degi, Es-Baal.

⁴⁰ Jonatán-e-machidi, Merib-Baalʼye nugad. Merib-Baalʼdi, machi-Micaía-nikusad.

⁴¹ Micaía-e-masmaladi, wemarmogad: Pitón, Melec, Tarea, degi, Acaz.

⁴² Acazʼdi, machi-Jara-nikusad. Jaraʼdi, masmala-baksamogad. E-masmaladi, wemalad: Alemet, Azmavet, degi, Zimri. Zimri machigwa-Mosaʼye-nugad nikusad.

⁴³ Mosa-e-wagan, wemalad: Bina, Refaías-e-babad. Refaíasʼdi, Elasa-e-babad. Degi, Elasaʼdi, Azel-e-babad.

⁴⁴ Azel masmala walanergwa (6) nikusad. E-nugmar, wemalad: Azricam, Bocru, Ismael, Searías, Obadías, degi, Hanán. Wemar, Azel-e-masmala nanaed.