Hibulu 8 - Kiŋwakti ki Nyɔ Miŋkaiŋ Mifiaŋ

Jisɔs kɔ fwu wi bətii mfə gia wi miŋkaiŋ mimfiaŋ

¹ Fwu wi gia wə bukumbɛiŋ dzakaki kɔm wi kɔ a, bukumbɛiŋ kaŋaki lə ŋkaiŋni wi fwu wi bətii mfə gia widɔkɔ a num mi wə wi shinum i tsɛiŋ yiləkəli yi kiŋkii ki Nyɔ wi Kiŋkɔkni i bɛiŋ.

² Wi kɔ mi wi nɔm i di biə Nyɔ kɔ, wi nɔm i nɔni ki Nyɔ kə ki kɔ na kintaŋ ki ŋkɔŋ ki Nyɔ, maka a kɛiŋsi bəni. A kɛiŋsi Bah Nyɔ kintaŋ kiwɔ.

³ Na winaiŋ fwu wi bətii mfə gia kɔ num Nyɔ si ba jiə, a wi nyâki binya chu fə̂ tə bimfə gia i Nyɔ. Ayakadəiŋ, yi ndzɔŋ tə a tii mfə gia wələ kâŋaki lə tə fiɛŋ fiə wi kɔ i nya i Nyɔ.

⁴ Asi kɔ a wi numki fa kuku, ma wi kɔkə na tii mfə gia, kɔm bətii mfə gia si num lɔ fɛiŋ bə̀ bɔ nyaki binya biəli si nchi wi Muses nəŋki.

⁵ Nɔm wə bə nɔmki fa kuku kɔ a kimbwɔsi bəh kinjəŋnjəŋ ki nɔm wə wi kɔ i nɔni ki Nyɔ wə i bɛiŋ. Akɔ gia yə yi nì kɔ jɔbi wə Muses nì nəŋki i maa kintaŋ ki Nyɔ i fa kuku, wi Nyɔ nì təfi wi dzaka a tɔkni, “Yɛ̂iŋ a wɔ fə̂ biɛiŋ bichi bi num a liŋ, ka biə mih nì chusi i wɔ i ŋkwuŋ bɛiŋ.”

⁶ Ayakalə, Jisɔs kɔ num bə nya nɔm i wi, wi kɔkni tsə wi bətii mfə gia bə ninshiŋ a liŋ si miŋkaiŋ mə wi num i fintəŋ fintəŋ i Nyɔ nshiŋ bəh mi wiwɔm, mɔ kɔkniki lə tə tsə mikpu. Mɔ tsəki kɔm mɔ biəliki biŋkaka biə bi tsəki bi ninshiŋ.

⁷ A kabə num a miŋkaiŋ mi ninshiŋ mələ nì kaŋaki kə ŋgəkə widɔkɔ, ma ŋgəkə chu mɔŋ i nəŋki bidɔkɔ.

⁸ Nyɔ nì kɔ wi yɛiŋ a ŋgəkə kɔlə bəh bəni, wi ka dzaka a, “Mih Bah dzakaki a chɔkɔ dzəki lə biə mih bi dzi Miŋkaiŋ Mimfiaŋ, bəh juŋ yi Islae bəh yi Juda.

⁹ Ayaka miŋkaiŋ mələ kɔkə ka mə mih nì dzi buku bətii tii bəbɔ, chɔkɔ biə mih nì kaŋa bɔ i tsɛiŋ wə, dzɔ buku bəh bɔ i tumi ki Ijib wə. Bɔ nì ka num baaŋ dəkə a miŋkaiŋ mələ bɛiŋ. Ayakadəiŋ, mih ka nyɔkɔ jum yiŋ i bɔ. Yələ dzakaki mih Bah.

¹⁰ Bah Nyɔ dzakaki a, akɔ miŋkaiŋ mələ, mih bi dzi buku bɔ i kaŋ yiwɔ jum, mih bi jiə bənchi bəŋ i shɔ́m yibɔ mə, mih chu nyaka yi i biŋkwaka bibɔ wə. Mih bi numki Nyɔ wibɔ, bɔ num bəni mbəŋ.

¹¹ Mi bi chu lani kə mi wi wi kwili widɔkɔ lanini nabə waiŋnih wi, dzaka a wi kîə Bah Nyɔ, kɔm mi wichi bi kiə lə mih i yisi i mi wi nchiŋ i tsə buku i wimbum.

¹² Mih ni kwasi lə nshɛiŋ i bɔ, mih dalinya gia yibɔ yichu. Mih bi chu kwaka kə chu bibɔ.”

¹³ Si Nyɔ nì dzaka a miŋkaiŋ mimfiaŋ bi numki lə, yaka wi nì kɔ wi yɛiŋ lɔ a miŋkaiŋ mi ninshiŋ mə kɔ fiɛŋ fikpu. Ayaka fiɛŋ ka numki fikpu nabə a fi jwiŋ, yaka fi baaŋ a twɛsi i laka i bəni nshiŋ.