Zacarias 9 - Chol: I T’an Dios

I castigo yan tac bʌ tejclum

¹ Jiñʌch i t'an lac Yum ti' contra i lum Hadrac yic'ot Damasco, come lac Yum woli' wen q'uel pejtel winicob x'ixicob yic'ot israelob ja'el.

² Mi caj i jilel Hamat yic'ot Tiro yic'ot Sidón, anquese cabʌl i ña'tʌbal.

^3-4 Wen ts'ajquibil Tiro. Cabʌl i chubʌ'an come tsi' much'qui plata yic'ot oro che' bajche' i yonlel c'ojq'uix lum ya' ti bij. Pero lac Yum mi caj i jisan. Mi caj i choc ochel ti colem ñajb pejtel i ts'ajquil. Mi caj i laj pulel jini tejclum.

⁵ Ascalón mi caj i q'uel. Mi' caj ti bʌq'uen. Gaza ja'el mi' caj ti tsiltsilniyel yic'ot Ecrón, come mach yujilic baqui mi caj i taj i coltʌntel che' jisʌbilix Tiro. Mi' caj ti jilel jini rey ti Gaza. Jochol mi caj i cʌytʌl Ascalón.

⁶ Jini ñajt bʌ ch'oyolob mi caj i ch'ʌmob Asdod, i tejclum filisteojob, yic'ot i yonlel i chubʌ'an.

⁷ Mi caj c loc'sʌbeñob ti' yej jini majtañʌl tac mu' bʌ i c'uxob yic'ot i ch'ich'el. Jini mu' bʌ i cʌytʌlob mi caj i ch'ujutesañob Dios. Mi caj i yajñelob che' bajche' jini año' bʌ ti Judá. Jini filisteojob año' bʌ ti Ecrón mi caj i sujtelob che' bajche' jebuseojob.

⁸ Joñon mi caj c joy cʌntan c cha'año' bʌ che' bajche' xcʌntaya. Ma'anix majqui mi caj i tic'lañob. Ti jim bʌ ora mach chʌn talobix xtic'layajob, come joñon mi caj c wen q'uelob.

Jini rey mu' bʌ caj i yochel ti Sion

⁹ Tijicñesan la' pusic'al c tejclumob añet bʌ la ti Sion. C'am yom mi la' cha'len c'ay, añet bʌ la ti Jerusalén, come tal la' Rey, jini Toj bʌ mu' bʌ caj i mʌjlel i cha'an. Pec' mi' mel i bʌ, c'ʌchʌl ti burro, juncojt i yal burro maxto bʌ c'ʌchtʌbilic.

¹⁰ Mi caj i yʌc' ti sʌc jilel carretajob yic'ot caballojob yic'ot e'tijibʌl cha'an guerra ti' tojlel i cha'año' bʌ ya' ti Efraín yic'ot ti Jerusalén. Mi caj i yʌc' ti lajmel guerra ti pejtelel pañimil, c'ʌlʌl ti' ti' ñajb c'ʌlʌl ti' joytilel pañimil.

¹¹ Tsac tajayetla ba' cʌchʌletla ba' woliyetla ti chʌmel cha'an tiquin ti'. Tsaj coltayetla loq'uel cha'an ti' caj jini trato bʌ c t'an am bʌ i sellojlel ti ch'ich'.

¹² La' la pejtel cʌchʌlet bʌ la, come an la' pijtaya ba' mi la' taj la' coltʌntel. Mic subeñetla mi caj j coltañetla. Cha' ñumel mi caj cʌq'ueñetla i tijicñʌyel la' pusic'al cha'an pejtel la' wocol.

¹³ Judá, i wentajet c jalʌjb. Efraín, i wentajet i te'el c jalʌjb. Mi caj j c'ʌñetla ti guerra che' bajche' espada ti' contra Grecia, che'en lac Yum.

¹⁴ Mi caj i ñaxan majlel lac Yum ti guerra ti' tojel i wut i winicob. Mi caj i loq'uel che' bajche' i te'el jalʌjb che' bajche' i xu'il chajc. Lac Yum Dios mi caj i wus trompeta. Mi' caj ti guerra ti' tojlel i contrajob che' bajche' sutujt ic' tilem bʌ ti sur.

¹⁵ I Yum Panchan yic'ot Pañimil mi caj i cʌntan i tejclumob. Jini israelob mi caj i mʌjlel i cha'añob. Mi' cajelob ti oñel che' bajche' xyʌc'ajelob. Cabʌl mi caj i bejq'uel i ch'ich'el i contrajob.

¹⁶ Ti jim bʌ q'uin lac Yum Dios mi caj i coltan i cha'año' bʌ che' bajche' jini xcʌnta tiñʌme' mi' cʌntan i yʌlac'. I t'ojol jax mi caj i q'uejlelob ya' ti' lumal che' bajche' xajlel wen letsem bʌ i tojol am bʌ ti corona.

¹⁷ Ti jim bʌ ora c'ax uts'atax jini pañimil. Wen chumulob ti pejtelelob. I yonlel trigo yic'ot tsijib vino mi caj i tijicñesʌbeñob i pusic'al jini ch'iton winicob yic'ot xch'ocob.