Zacarias 8 - Chol: I T’an Dios

Mux i cha' wa'chocontel Jerusalén

^1-2 I Yum Panchan yic'ot Pañimil tsi' cha' pejcayon. Tsi' yʌlʌ: Wen mich'on cha'an tsi' tic'layob Jerusalén j contrajob. Tsʌytsʌyña c pusic'al cha'an c'ux mi cubin, che'en lac Yum.

³ Mi caj c cha' sujtel ti Jerusalén cha'an mic chumtʌl ya'i. Che' jini mi caj i pejcʌntel Jerusalén ti xuc'ul bʌ Tejclum, Ch'ujul bʌ Wits, jini Wits i cha'an i Yum Panchan yic'ot Pañimil, che'en.

⁴ Woli' chʌn sub lac Yum: Awilan to, ñʌch'ʌlob mi caj i yajñelob ti Jerusalén jini xñoxob yic'ot la' ña'ob. Mi caj i cha'leñob xʌmbal ya' ti' bijlel tac Jerusalén, c'uchucñayob yic'ot i barate' cha'an i ñoxlel.

⁵ Bajc'ʌl ch'itoñob yic'ot xch'ocob mi' cajelob ti alas ya' ti' bijlel Jerusalén.

⁶ Ma'anic jaytiquiletla tsa' bʌ cʌleyetla. I colojbalet jach bʌla, ch'ijiyemetla. Jini cha'an jiñʌch mero ñuc bʌ ti la' wut, pero joñon mach ñuquic mi cubin.

⁷ Joñon mi caj j coltan c cha'año' bʌ. Mi caj c cha' pʌy tilel jini año' bʌ ti' pasibal q'uin yic'ot ti' bʌjlibal q'uin.

⁸ Mi caj cʌc'ob ti chumtʌl ti' yojlil Jerusalén. Mi caj i yochelob tic cha'an. Joñon mi caj cochel ti' Dios. Mi caj c pʌsbeñob jini toj bʌ c pusic'al ti isujm, che'en.

⁹ I Yum Panchan yic'ot Pañimil woli' chʌn al: Yom mi la' wujtesan jini e'tel, jatetla woli bʌ la' wubin c t'an ti' tojlel jini x'alt'añob. Che' bʌ tsa' la' teche la' mel jini Templo, tsi' subeyetla chuqui tac tijicña mi caj la' taj che' mi' yujtel la' mel.

¹⁰ C'ʌlʌl wʌle ma'anic i tojol la' we'tel. Ma'anic i tojol mula che' mi' c'ʌjñel ti e'tel. Ma'anic i ñʌch'tilel la' pusic'al. Che' mi la' loq'uel ti tejclum bʌbʌq'uen ma'anic mi la' sujtel cha'an cabʌl la' contrajintel. Joñon tsa cʌq'ueyob i contrajiñob i bʌ winicob cha'an ti' caj i mul.

¹¹ Pero mach chʌn che'ix ti' tojlel i colojbal israelob che' bajche' ti yambʌ ora.

¹² Come mi caj cʌq'ueñetla i ñʌch'tilel la' pusic'al. Mi caj i wen ac' i wut pejtel la' pʌc'ʌb. Mi caj i wen tilel ja'al. Tijicñayob jini cuxulob to bʌ mu' bʌ i yajñelob ti jini lum.

¹³ Ti yambʌ ora pam pujquemob i p'olbal Judá yic'ot Israel ti' tojlel yan tac bʌ tejclum tsa' bʌ i p'ajayetla. P'ump'uñetla. Pero wʌle mach chʌn che'ix. Mi caj j coltañetla cha'an mi la' taj pejtel chuqui yom. Jini cha'an mach la' chʌn cha'len bʌq'uen. Chʌn melela jini Templo, che'en lac Yum.

^14-15 I Yum Panchan yic'ot Pañimil woli' chʌn sub: Ti yambʌ ora tsac ña'ta c jisañetla cha'an i mul la' ñojte'elob tsa' bʌ i techbeyoñob c mich'ajel. Tsac mele che' bajche' tsac subeyob. Wʌle tsa'ix c ña'ta j coltan jini año' bʌ ti Jerusalén yic'ot ti Judá come cabʌl i yutslel c pusic'al. Che'ʌch mi caj c mel che' bajche' tsac ña'ta.

¹⁶ Melela che' bajche' wolic subeñetla. Pejcan la' bʌ ti isujm. Cha'lenla meloñel ti toj cha'an ñʌch'ʌl mi la' wajñel yic'ot la' pi'ʌlob.

¹⁷ Mach mi la' jop'ben i mul ti la' pusic'al. Mach mi la' cha'len jop't'an. Mulil pejtel iliyi. Ts'a' mij q'uel, che'en lac Yum.

^18-19 Tsi' cha' pejcayon i Yum Panchan yic'ot Pañimil. Tsi' yʌlʌ: Ma'anix mi caj la' chʌn cha'len ch'ajb che' ti julio yic'ot ti agosto yic'ot ti octubre yic'ot ti enero. Mi caj i q'uextiyel ch'ajb ti q'uiñijel. Cabʌl mi caj la' wubin la' tijicñʌyel. Jini cha'an mulanla chuqui wen yic'ot chuqui toj.

²⁰ Talob ba' añetla cabʌl tejclumob ñajt bʌ ch'oyolob.

²¹ Jini año' bʌ ti jump'ejl tejclum mi caj i subeñob jini chumulo' bʌ ti yambʌ: “Conla ti Jerusalén cha'an mi laj c'ajtiben i yutslel lac Yum, cha'an mi' p'untañonla”, che'ob.

²² Cabʌl ñuc tac bʌ tejclumob mi caj i tilelob ti Jerusalén cha'an mi' sʌclañob lac Yum, cha'an mi' c'ajtibeñob i yutslel.

²³ Ti jim bʌ q'uin lujuntiquil winicob loq'uemo' bʌ ti lujump'ejl colem tejclum mi caj i comol chucbeñob i bujc juntiquil judío. Mi caj i yʌlob: “La'ix ajniconla che' bajche' lac pi'ʌl lac bʌ, come cujil lojon an Dios awic'ot”, che'ob. Che' tsi' yʌlʌ i Yum Panchan yic'ot Pañimil.