Zacarias 6 - Chol: I T’an Dios

Jini chʌncojt carreta cha'an meloñel

¹ Che' bʌ tsac cha' letsa c wut, tsaj q'uele woli' loq'uel tilel chʌncojt carreta ti' yojlil cha'p'ejl wits, puro bronce jini wits tac.

² Ya' ti ñaxan bʌ carreta ya' cʌchʌl chʌchʌc tac bʌ caballo. Ya' ti cha'p'ejlel cʌchʌl i'ic' tac bʌ caballo.

³ Ya' ti' yuxp'ejlel carreta cʌchʌl jini sʌsʌc tac bʌ caballo. Ya' ti' chʌncojtlel carreta cʌchʌl jini caballo xyʌxem tac bʌ yic'ot yʌxmulan bʌ i tsutsel.

⁴ Tsaj c'ajtibe jini ángel: C yum, ¿chuqui jini? cho'on.

⁵ Tsi' jac'beyon: Ili woli bʌ a q'uel jiñʌch i wentʌjlel chʌntiquil espíritujob tilem bʌ ti panchan, mu' bʌ i loq'uelob tilel che' ujtem i pejcañob jini Yumʌl ti pejtelel pañimil.

⁶ Jini carreta tujc'ʌbil bʌ ti i'ic' bʌ caballo mi caj i majlel ya' ti' tojel norte. Jini sʌsʌc bʌ caballo mi caj i tsʌclen majlel. Jini xyʌxem tac bʌ mi caj i majlel ti sur, che'en.

⁷ Lut'lut'ña jini chʌchʌc tac bʌ cha'an mi' pam ñumel i q'uel i joytʌlel pañimil. Lac Yum tsi' yʌlʌ: Cucula, joy xʌñʌ pejtelel pañimil, che'en. Jini cha'an tsi' pam cha'leyob xʌmbal ti pejtelel pañimil.

⁸ Lac Yum tsi' pʌyʌyon tilel. Tsi' subeyon: Q'uele jini woli bʌ majlelob ti' tojel norte. Tsac chocoyob majlel ti meloñel cha'an mi cʌq'ueñob i toj i mul ya' ti norte cha'an mi' lajmel c mich'ajel, che'en.

Tsa' aq'uenti i ñuclel Josué

⁹ Tsa' caji i cha' pejcañon lac Yum. Tsi' subeyon:

^10-11 Jini judíojob tsa' bʌ cʌjchiyob majlel ti Babilonia woli' chocbeñet tilel majtañʌl melbil bʌ ti sʌsʌc taq'uin yic'ot oro. Tal Heldai yic'ot Tobías yic'ot Jedaías cha'an mi' yʌq'ueñet. Che' mi' julelob ti' yotot Josías (i yalobil Sofonías) ba' mi caj i jijlelob, yom ma' majlel a tajob. Yom ma' ch'ʌm a majtan, oro yic'ot plata, cha'an ma' mel corona. C'ʌcchocon ti' jol jini ñuc bʌ motomaj Josué (i yalobil Josadac).

¹² Suben: “I Yum Panchan yic'ot Pañimil woli' yʌl: I wentajet jini Winic mu' bʌ caj i tilel, i c'aba' Buts, mu' bʌ caj i pasel ya' ba' chucul i wi'. Mi caj i wa'chocoben i Templo lac Yum.

¹³ Mi caj i q'uejlel ti ñuc cha'an cha'chajp i ye'tel ti' tojlel winicob. Mi caj i cha'len i ye'tel Rey yic'ot i ye'tel Motomaj, come lu' an ti' wenta”. Che' yom ma' suben.

¹⁴ Yom ma' wotsan jini corona ti' Templo lac Yum cha'an i ña'tʌntel Helem, yic'ot Tobías, yic'ot Jedaías, yic'ot Hen (i yalobil Sofonías) tsa' bʌ i yʌc'ʌyob.

¹⁵ Jini ñajt bʌ ch'oyolob mi caj i tilelob che' bajche' ili uxtiquilob cha'an mi' cha' melob i Templo lac Yum. Che' mi' yujtel mi caj a ña'tan tilem c t'an ti' Yum Panchan yic'ot Pañimil. Che'ʌch mi caj i yujtel mi xuc'ul ma' jac'ben i t'an a Yum Dios. Che' tsi' yʌlʌ lac Yum.