Zacarias 5 - Chol: I T’an Dios

Bʌlʌl bʌ jun woli bʌ ti wejlel

¹ Tsac cha' letsa c wut. Tsaj q'uele jumbʌjl jun woli bʌ ti wejlel.

² Tsi' subeyon: ¿Chuqui woli a q'uel? che'en. Tsac sube wolij q'uel jumbʌjl jun woli bʌ ti wejlel, lujump'ejl metro i tamlel yic'ot jo'p'ejl metro i xujc, cho'on.

³ Tsi' subeyon: Ili jun i yejtalʌch wocol tilem bʌ ti Dios mu' bʌ caj i ñumel ti pejtelel pañimil. Ts'ijbubil ili t'an: “Dios tsa'ix i mele pejtel xujch'ob yic'ot pejtel xlotob. Mi caj i laj jisʌntelob.

⁴ Wolic choc majlel ili t'an ti' yotot jujuntiquil xujch' yic'ot jujuntiquil mu' bʌ i c'ʌn j c'aba' ti jop't'an. Jini wocol mi' caj ti jalijel ya' ti' yotot jinto mi' laj jisan”. Che' tsi' yʌlʌ i Yum Panchan yic'ot Pañimil, che'en jini ángel.

Jini x'ixic am bʌ ti chiquib

⁵ Che' jini tsa' poj loq'ui majlel jini ángel woli bʌ ti t'an quic'ot. Pero tsa' cha' tili i subeñon: Q'uele jini woli bʌ ti wejlel tilel, che'en.

⁶ Che' jini tsaj c'ajtibe: ¿Chuqui jini? cho'on. Tsi' jac'beyon: Jiñʌch jump'ejl colem chiquib but'ul bʌ ti mulil am bʌ ti pejtelel pañimil, che'en.

⁷ Che' jini tsa' jambenti i majc jini colem chiquib. Awilan ya' buchul juntiquil x'ixic ya' ti' mal jini chiquib.

⁸ Jini ángel tsi' subeyon: Jiñʌch i yejtal mulil, che'en. Che' jini tsi' cha' otsa ya' ti mal jini colem chiquib. Tsi' cha' ñup'be i majc.

⁹ Tsaj q'uele, awilan woli' wejlel tilel cha'tiquil x'ixicob. Lajalob i wich' che' bajche' i wich' ja'al pech. Tsa' caji i ch'uyob majlel jini chiquib.

¹⁰ Tsaj c'ajtibe jini ángel: ¿Baqui mi caj i ch'ʌmob majlel jini chiquib yic'ot x'ixic? cho'on.

¹¹ Tsi' jac'beyon: Woli' ch'uyob majlel ti cʌjchel ya' ti Babilonia come ya' tilem. Ya' yom mi' cʌytʌl, che'en.