Zacarias 4 - Chol: I T’an Dios

I yajñib c'ajc yic'ot olivote'

¹ Che' jini tsa' cha' tili i ñijcañon ch'ojyel jini ángel woli bʌ i pejcañon. Wʌyʌlon yilal cha'an muts'ul c wut.

² Tsi' c'ajtibeyon: ¿Chuqui woli a q'uel? che'en. Che' jini tsac jac'be: Wolij q'uel lámpara melbil bʌ ti oro. An wucp'ejl i yajñib tac ba' mi' yotsʌntel aceite olivo. An wucts'ijt i c'ʌb jini lámpara.

³ Ya' ts'ijbubil ti' buchlib lámpara an cha'tejc olivote', juntejc ti' ñoj, juntejc ti' ts'ej, cho'on.

⁴ Tsaj c'ajtibe jini ángel: ¿Chuqui iliyi, c yum? cho'on.

⁵ Jini ángel tsi' subeyon: ¿Mach ba a wujilic chuqui iliyi? che'en. Tsac sube: Mach cujilic, c yum, cho'on.

⁶ Che' jini tsi' yʌlʌ: Jiñʌch i t'an lac Yum tsa' bʌ i sube Zorobabel. Woli' yʌl: “Mach ti' p'ʌtʌlelic winicob, mi ti' ña'tibalic winicob mi caj i mejlel que'tel, pero ti' p'ʌtʌlel quEspíritu”. Che' tsi' yʌlʌ i Yum Panchan yic'ot Pañimil.

⁷ Ma'anic wits mu' bʌ mejlel i mʌctan Zorobabel, come mi caj i sujtel ti joctʌl bʌ lum ti' tojel i wut. Zorobabel mi caj i yujtesan i mel jini Templo ti' tijicñʌyel i pusic'al, come mi caj i ña'tan tsa'ix mejli cha'an jach i yutslel i pusic'al Dios. Ti c'am bʌ t'an mi caj i subeñob Dios wocolix i yʌlʌ, che'en jini ángel.

⁸ Tsa cubi yambʌ t'an tilem bʌ ti lac Yum:

⁹ Zorobabel tsi' mele i c'ʌclib ili Templo. Mi caj i yujtesan. Che' jini mi caj a ña'tan tilem ili t'an ti Dios, i Yum Panchan yic'ot Pañimil.

¹⁰ Mach ma' ts'a'len i tejchibal e'tel che' maxto tsiquilic chuqui woli' mejlel. Tijicña lac Yum che' mi' q'uel jini plomo ti' c'ʌb Zorobabel, come tejchemix jini e'tel. Ili wucp'ejl c'ajc jiñʌch i yejtal tac i wut lac Yum mu' bʌ i c'otel i q'uel pejtel pañimil, che'en.

¹¹ Tsaj c'ajtibe jini ángel: ¿Chuqui i wentajlel jini cha'tejc olivote' am bʌ ti jujunwejl i buchlib lámpara? cho'on.

¹² Tsaj c'ajtibe ja'el: ¿Chuqui i wentajlel jini cha'tejc i c'ʌb olivote' ba' mi' c'axel aceite cha'an mi' yochel ti jini wucts'ijt i yajñib c'ajc melbil bʌ ti oro? cho'on.

¹³ Tsi' subeyon: ¿Mach ba a wujilic chuqui iliyi? che'en. Che' jini tsac sube: C yum, mach cujilic, cho'on.

¹⁴ Tsi' yʌlʌ: Jini cha'tejc i c'ʌb i wentajʌch cha'tiquil winicob yajcʌbilo' bʌ cha'an mi' coltañob i Yum pejtel pañimil, che'en.