Zacarias 3 - Chol: I T’an Dios

Jini motomaj Josué

¹ Jini ángel tsi' pʌsbeyon jini ñuc bʌ motomaj i c'aba' Josué, wa'al bʌ ti' tojel i yAngel lac Yum. Ya' wa'al Satanás ja'el ti' ñoj jini Angel cha'an mi' jop'ben i mul Josué.

² Lac Yum tsi' sube Satanás: Mach comic cubin a t'an, Satanás. Yumʌlon, mi caj c p'untan Jerusalén che' bajche' tsac wʌn ña'ta. Mach mejlic a mʌctañon. Tsa'ix c ña'ta c p'untan Josué yic'ot pejtel i pi'ʌlob ti' lumal. Lajalob bajche' xutunte' mu' bʌ i loc'sʌntel ti c'ajc che' woli ti pulel, che'en lac Yum.

³ Awilan bibi' jax i pislel Josué ya' ba' wa'al ti' tojel i yAngel lac Yum.

⁴ Jini cha'an jini Angel tsi' pejca jini ya' bʌ wa'alob ti' tojel i wut: Jochbenla i pislel, come bibi' jax, che'en. Tsi' sube Josué: Awilan tsa'ix c loc'sʌbeyet a mul. Lʌpʌ wen bʌ a pislel ti a majtan jach. Chejachi woli cʌq'ueñet, che'en.

⁵ Tsac sube: Awocolic aq'uen i ch'ʌjlib i jol ja'el, cho'on. Jini cha'an tsi' c'ʌcchocobeyob wen sʌcleman bʌ i ch'ʌjlib i jol. Tsi' xojbeyob wen bʌ i pislel.

^6-7 Jini Angel i cha'an lac Yum tsi' sube: I Yum Panchan yic'ot Pañimil woli' yʌl: “Mi xuc'ul ma' cha'len xʌmbal tic bijlel, mi uts'at ma' jac' pejtel c mandar, mi caj cʌq'ueñet ñuc bʌ e'tel tic Templo. Yom ma' wen q'uel cha'an ch'ujul mi' yajñel. Mi caj a wajñel tic tojlel yic'ot ili ángelob.

⁸ Jini cha'an yom ma' wen ubin c t'an, Josué, ñuc bʌ motomaj. La' i yubiñob ja'el a pi'ʌlob. I yejtaletla jini uts'at tac bʌ mu' bʌ caj i tilel. Josué i yejtalet c Winic, jiñʌch i Buts te' yilal mu' bʌ caj c choc tilel.

⁹ Jini c Winic mi caj i yochel tic Templo, i wentajʌch ñuc bʌ Xajlel ya' ti' xujc Templo ba' wa'al Josué. Wucyajl mi caj c japun ti xajlel ili ts'ijbujel: Ti jump'ejl jach q'uin mi caj c lajmesʌbeñob i mul ili winicob.

¹⁰ Ti jim bʌ q'uin ñʌch'ʌl mi caj la' wajñel. Laj tijicñayetla yic'ot la' pi'ʌlob ti la' wotot. Che' jini ma'anic chuqui anto yom la' cha'an”. Che' tsi' yʌlʌ i Yum Panchan yic'ot Pañimil, che'en jini Angel.