Zacarias 2 - Chol: I T’an Dios

Che' mi' p'istʌl Jerusalén

¹ Che' bʌ tsac letsa c wut, tsaj q'uele winic yic'ot junts'ijt te' chucul bʌ i cha'an, jump'ejl metro i tamlel jini te'.

² Tsaj c'ajtibe: ¿Baqui ma' majlel? cho'on. Tsi' jac'ʌ: Mic majlel c p'is Jerusalén. Com j q'uel mi ñucʌch cha'an mi' yochelob pejtel winicob x'ixicob, che'en.

³ Jini ángel woli bʌ i pejcañon tsa' majli i taj yambʌ ángel woli bʌ i tilel.

⁴ Tsi' sube: La' ti ora. Suben jini ch'iton winic cha'an tal i yorajlel mi caj i bujt'el Jerusalén ti winicob x'ixicob. Mach laj ochicob cha'an cabʌlob yic'ot i yʌlac'. Xuc'ul mi caj i yajñelob.

⁵ Come lac Yum i wentajʌch ts'ajc. Mi caj i joy mʌctañob ti' p'ʌtʌlel yic'ot ti' c'ʌc'al. Lac Yum i ñuclelʌch jini tejclum, che'en jini ángel.

Tsa' pʌjyiyob jini xcʌjchelob

^6-7 Lac Yum tsi' subeyob jini tsa' bʌ cʌjchiyob majlel: La'la ti puts'el. Loq'uenla ti Babilonia ya' ti norte. Tsac pucuyetla ti pejtelel pañimil, pero mi caj c cha' pʌyetla tilel. Cha'lenla wersa cha'an mi la' bʌc' tilel ti Sion, che'en.

⁸ Come i Yum Panchan yic'ot Pañimil tsa'ix i chocoyon tilel cha'an mij contrajiñob jini tsa' bʌ i tic'layetla, come jini mu' bʌ i tic'lañetla mi' tic'lan Dios ja'el.

⁹ Joñon mi caj cʌq'ueñob wocol. Obolob i bʌ cha'an tsi' tic'layob c winicob. Jini tic'lʌbilo' bʌ mi caj i yochelob ti' yumob. Che' jini mi caj la' ña'tan chocbilon tilel cha'an i Yum Panchan yic'ot Pañimil.

¹⁰ C'ʌyinla lac Yum añet bʌ la ti Sion, come tilemon cha'an mi cajñel ti la' tojlel, che'en lac Yum.

¹¹ Ti jim bʌ q'uin cabʌl tejclumob mi caj i sutq'uiñob i bʌ cha'an mi' ñopob lac Yum. Mi caj i yochelob tic cha'an. Mi caj c tem chumtʌl quic'otob. Che' jini mi caj la' ña'tan chocbilon tilel cha'an i Yum Panchan yic'ot Pañimil.

¹² Judá i cha'añʌch lac Yum. Mi caj i sujtel ti Ch'ujul bʌ Lum. Lac Yum mi caj i cha' mulan jini tejclum Jerusalén yajcʌbil bʌ i cha'an.

¹³ Ñʌch'i'la ti' tojlel lac Yum pejtel winicob, come tsa'ix loq'ui ti ch'ujul bʌ i yajñib ti panchan cha'an mi' tilel ti pañimil. Che' tsi' yʌlʌ jini ángel.