Zacarias 12 - Chol: I T’an Dios

I coltʌntel Jerusalén ti wi'il bʌ q'uin

¹ Jiñʌch i t'an lac Yum ti' contra Israel. Jiñʌch lac Yum tsa' bʌ i mele panchan yic'ot pañimil, tsa' bʌ i yʌq'ueyob i cuxtilel winicob.

² Lac Yum tsi' yʌlʌ: Awilan mi caj cʌc' Jerusalén yic'ot Judá che' bajche' veneno ti' tojlel i contrajob che' mi' c'otel i contrajiñob.

³ Ti jim bʌ ora lajal Jerusalén bajche' colem xajlel wen al bʌ, joyol bʌ ti yan tac bʌ tejclum. Pejtelob mu' bʌ i ñijcañob mi caj i c'ʌscujelob. Mi caj i temob i t'an pejtel winicob cha'an mi' contrajiñob.

⁴ Che' mi' tilelob ti guerra mi caj c bʌc'tesan i caballo. Mi caj c socben i jol jini c'ʌchʌlo' bʌ. Pero mi caj c wen q'uel Judá. Mi caj c yʌpben i wut i contrajob.

⁵ Jini yumʌlob ti Judá mi caj i yʌlob ti' pusic'al: “Jini winicob ti Jerusalén tsa'ix i tajayob i p'ʌtʌlel ti' Dios, i Yum Panchan yic'ot Pañimil”, che'ob.

⁶ Ti jim bʌ ora mi caj cʌc' i yumob Judá ti' tojlel i contrajob che' bajche' nich c'ajc woli bʌ ti lejmel ti' yojlil cholel che' tiquinix. Mi caj i lu' jisañob yambʌ tejclum tac ti jujunwejl, pero uts'at mi caj i chʌn ajñel Jerusalén.

⁷ Che' ti ñaxan lac Yum mi caj i coltan jini xchumtʌlob ti Judá ame mi' chañ'esañob i bʌ jini xchumtʌlob ti Jerusalén yic'ot i p'olbal jini rey David.

⁸ Ti jim bʌ ora joñon mi caj j coltan jini xchumtʌlob ti Jerusalén. Jini c'uño' bʌ mi caj i ch'ejl'añob che' bajche' jini rey David. I p'olbal David mi caj i yajñel che' bajche' Dios, che' bajche' i yAngel lac Yum am bʌ ti' tojlelob.

⁹ Ti jim bʌ q'uin joñon mi caj c laj jisan jini winicob tsa' bʌ tiliyob ti' contra Jerusalén.

¹⁰ Che' jini mi caj cʌq'ueñob quEspíritu jini año' bʌ ti Jerusalén cha'an mi' cʌñob i yutslel c pusic'al yic'ot cha'an mi' c'ajtibeñoñob i coltʌntel. Mi caj i q'uelob jini jec'bil bʌ i cha'añob. Mi caj i yuc'tañob che' bajche' winicob mi' yuc'tañob jini yʌx alʌl c'uxbibil bʌ i cha'añob, che' bajche' mi' yuc'tañob jini ascuñʌl bʌ i yalobil.

¹¹ Ti jim bʌ q'uin mi' cajelob ti cabʌl uq'uel ya' ti Jerusalén ñumen bajche' tsi' cha'leyob che' bʌ tsa' tsʌnsʌnti Josías ti jini joctʌl Meguido.

^12-14 Pejtel año' bʌ ti Israel mi' cajelob ti wo'wo' uq'uel ti mojt ti mojt, parte jini rey yic'ot i pi'ʌlob, parte jini x'alt'añob yic'ot i pi'ʌlob, parte jini motomajob yic'ot i pi'ʌlob. Ti jujump'ejl otot mi caj i tem cha'leñob uq'uel jini winicob. Parte mi' cajelob ti uq'uel x'ixicob. Ch'ijiyem jax i pusic'alob ti pejtelelob, che'en lac Yum.