xRut 4 - Chol: I T’an Dios

Booz tsa' ñujpuñi yic'ot Rut

¹ Booz tsa' letsi majlel ti' ti' tejclum. Tsa' buchle ya'i. Tsa' c'oti winic bʌ i pi'ʌl. Jiñʌch tsa' bʌ i ña'ta Booz che' bʌ tsi' pejca Rut. Booz tsi' sube: Jeyaj, la' c pi'ʌl. Buchi' ilayi, che'en. Tsa' tili ti buchtʌl.

² Booz tsi' pʌyʌ tilel lujuntiquil xñoxob año' bʌ i ye'tel ti tejclum. Tsi' subeyob: Buchi'la ilayi, che'en. Tsa' buchleyob.

³ Booz tsi' sube jini winic bʌ i pi'ʌl: Cha' julemix Noemí tsajni bʌ ti' lumal Moab. Yomix i chomben i lum i ñoxi'al, jiñʌch lac pi'ʌl Elimelec tsa' bʌ chʌmi.

⁴ Jini cha'an tsac ña'ta c subeñet wʌ' ti' tojlel jini buchulo' bʌ yic'ot ti' tojlel jini xñoxob año' bʌ i ye'tel: An ti a wenta cha'an ma' mʌmben i lum lac pi'ʌl tsa' bʌ chʌmi. Mʌñʌ mi a wom. Mi mach a womic a mʌn, subeñon come ma'anic yambʌ mu' bʌ mejlel i mʌn, cojach joñonla, ñaxañet, wi'il joñon, che'en. I pi'ʌl Booz tsi' jac'be: Mux c mʌn joñon, che'en.

⁵ Booz tsi' sube: Ti jini jach bʌ q'uin che' ma' mʌmben i lum Noemí, mi caj a pʌy Rut ja'el jini meba' x'ixic ch'oyol bʌ ti Moab, i yijñam jini tsa' bʌ chʌmi, cha'an mi' tilel i yalobil ame lon jilic i c'aba' i ñox'i'al tsa' bʌ chʌmi. Che' jini i yalobil mi caj i ch'ʌmben i c'aba' jini chʌmen bʌ. Mi caj i yʌq'uentel i lum, che'en.

⁶ Jini i pi'ʌl Booz tsi' sube: Mach mejlic c mʌn joñon ame sajtic lamital c chubʌ'an. Yom ma' mʌñ jatet jini lum am bʌ tic wenta come mach mejlic c mʌn joñon, che'en.

⁷ Jini israelob che'ʌch tsi' meleyob trato ti wajali che' bʌ tsi' cha'leyob mʌñoñel q'uexoñel. I tilel mi' loc'san i xʌñʌb juntiquil winic cha'an mi' yʌq'uen yambʌ winic. Che'i tsi' tsictesayob trato ti' tojlel i pi'ʌlob ti Israel.

⁸ Jini cha'an i pi'ʌl Booz tsi' sube: Mʌñʌ jatet, che'en. Tsi' loc'sa i xʌñʌb.

⁹ Booz tsi' sube xñoxob año' bʌ i ye'tel yic'ot pejtelel ya' bʌ añob: Jatetla testigojetla wʌle. Wolic mʌn pejtel i chubʌ'an c pi'ʌlob tsa' bʌ chʌmiyob: Elimelec yic'ot Quelión yic'ot Mahlón. Woli' chombeñon Noemí.

¹⁰ Wolic mʌn Rut cha'an quijñam, jini ch'oyol bʌ ti Moab. Jiñʌch i yijñam Mahlón tsa' bʌ chʌmi. Wolic mʌn quijñam cha'an mic techben i yalobil ti' c'aba' jini chʌmen bʌ. Che' jini mux i ch'ʌmben i c'aba' jini chʌmen bʌ. Mux i yʌq'uentel i lum cha'an ma'anic mi' jilel i c'aba' jini chʌmen bʌ ti' tojlel i pi'ʌlob yic'ot ti' yotot. Testigojetla wʌle, che'en.

¹¹ Pejtel ya' bʌ tempʌbilob ti' ti' tejclum yic'ot xñoxob año' bʌ i ye'tel tsi' subeyob: Testigojon lojon. La' i yʌq'uen lac Yum i p'olbal jini x'ixic woli bʌ a pʌy ti a wotot. La' ajñic che' bajche' Raquel yic'ot Lea, jini cha'tiquil tsa' bʌ i cosʌbeyob i yalobilob Israel. La' p'ojlic a chubʌ'an ti Efrata. La' tsictiyic a ñuclel ti Belén.

¹² La' tilic a p'olbal lajal bajche' i p'olbal Fares, i yalobil Judá yic'ot jini x'ixic Tamar. Che'ʌch yom mi' yʌq'ueñet a walobil Dios ti ili x'ixic, che'ob.

¹³ Booz tsi' pʌyʌ Rut cha'an i yijñam. Tsi' pi'le. Lac Yum tsi' yʌq'ue i cʌntan i yalobil. Tsi' yʌc'ʌ ti pañimil ch'iton bʌ i yalobil.

¹⁴ Jini x'ixicob tsi' subeyob Noemí: La' lac ch'ujutesan lac Yum come ma'anic tsi' cʌyʌyet ti a bajñelil, come tsa'ix i yʌq'ueyet a buts ti ili q'uin. La' cʌjñic i c'aba' ti Israel.

¹⁵ Mi caj a cha' ch'ejl'an cha'an a buts. Mi caj i ñuq'uesʌbeñet a pusic'al che' ñoxetix, come tsa'ix i yʌc'ʌ ti pañimil a wʌ'lib mu' bʌ i c'uxbiñet. Ñumen mi' c'uxbiñet Rut bajche' wuctiquil la calobil. Ñumen mi' pʌsbeñet i yutslel i pusic'al, che'ob.

^16-17 Noemí tsi' pʌyʌ jini alʌl. Tsa' ochi ti xmec' alʌl. Jini x'ixicob ti tejclum tsi' yʌlʌyob: Tsa'ix i yila pañimil ch'iton bʌ i yalobil Noemí, che'ob. Tsi' yotsʌbeyob i c'aba' Obed. Jiñʌch i tat Isaí. Isaí i tatʌch David.

^18-22 Jiñobʌch i p'olbalob Fares: Fares i tatʌch Hesrón. Hesrón i tatʌch Ram. Ram i tatʌch Aminadab. Aminadab i tatʌch Naasón. Naasón i tatʌch Salmón. Salmón i tatʌch Booz. Booz i tatʌch Obed. Obed i tatʌch Isaí. Isaí i tatʌch David.