Sofonias 3 - Chol: I T’an Dios

I wocol Jerusalén

¹ Mi caj la' toj la' mul añet bʌ la ti Jerusalén. Pʌjq'uemetla ti mulil.

² Tsa' la' tic'la la' pi'ʌlob. Ma'anic tsa' la' ñich'ta jini t'an. Ma'anic tsa' la' wubi la' tic'ol. Ma'anic tsa' la' bʌc'ña lac Yum. Ma'anic tsa' la' lʌc'tesa la' bʌ ba'an Dios.

³ Come jini yumʌlob chan tsi' meleyob i bʌ che' bajche' wen bʌbʌq'uen bʌ bajlum. Jini juezob ti mucul jach mi' melob winicob che' bajche' bʌte'el ts'i' mu' bʌ i lu' jisan i colojm. Che' ti yijc'ʌlal ma'anix tsiquil baqui tsi' cʌyʌ i bʌquel.

⁴ Jini x'alt'añob la' cha'an wen mañʌjax bajche' mi' melob. Wen yujilob lotiya. Jini motomajob ja'el mi' bib'esañob jini Templo. Mi' socbeñob i sujmlel jini mandar.

⁵ Pero ya'an lac Yum ti yojlil tejclum. Ma'anic mi' mel jontolil. Ti jujump'ejl sʌc'ajel toj mi' melonla. Mi' pʌsbeñonla chuqui toj. Mi' ts'ʌctesan i t'an. Pero jini xmulil mach yujilic quisin.

⁶ Tsi' yʌlʌ lac Yum: Tsac jisa cabʌl tejclumob. Jocholix i chumlibob. Pim i bijlel. Ma'anix majch mi' ñumel ti calle. Ch'ijiyem jax tsa' cʌle tac tejclum. Ma'anix i yum otot.

⁷ Tsa cʌlʌ mi caj i bʌc'ñañoñob. Mi caj i jac'ob i tic'ol. Che' jini ma'anic mic junyajlel jisañob yic'ot pejtel i lumal. Pero wersa tsac jisayob. Tsa' utsi caji i socob i bʌ. Leco jax i melbalob.

Tal i coltʌntel

⁸ Jini cha'an ña'tanla tal jini q'uin che' mi caj c melob. Pijtanla come tsa cʌc'ʌ c t'an cha'an mic tempan tilel winicob ti pejtelel pañimil parte tac bʌ i lumal, cha'an mi cʌq'ueñob i toj i mul. Mi caj i yubiñob c mich'ajel. Mi caj i laj jilelob ti pejtelel pañimil cha'an cʌlʌx jax c mich'ajel. Woli ti pulel che' bajche' c'ajc.

⁹ Ti jim bʌ q'uin mi caj cʌq'ueñob c winicob jump'ejl jach bʌ t'an cha'an mi' laj pejcañoñob ti' Yum, cha'an comol mi' ch'ujutesañoñob.

¹⁰ Jini ch'oyolo' bʌ ti ñajtʌl c'ʌlʌl ti' ti' ja' ti Etiopía mi caj i pi'leñob tilel c winicob mu' bʌ i pejcañoñob. Jini pam pujquemo' bʌ c winicob mi caj i ch'ʌmbeñoñob tilel c majtan.

¹¹ Ti jim bʌ q'uin ma'anix mi caj la' wubin quisin cha'an pejtel chuqui tsa' la' mele che' bʌ tsa' la' contrajiyon. Ti jim bʌ ora mi caj c jisan jini chan bʌ mi' melob i bʌ. Che' jini ma'anix ti la' tojlel majqui mi' chañ'esan i bʌ ti ch'ujul bʌ c wits.

¹² Pero jini utso' bʌ i pusic'al yic'ot p'ump'uño' bʌ mu' bʌ i ñopoñob mi caj c p'untañob come i Yumon.

¹³ Jini i colojbal israelob ma'anix mi caj i chʌn cha'leñob jontolil mi lot. Ma'anix mi caj i chʌn c'ʌñob i yac' ti lotiya. Mi caj i cʌntʌntelob che' bajche' tiñʌme'. Tijicñayob mi caj i c'ajob i yo. Ma'anix majqui mi caj i chʌn bʌc'tesañob. Che' tsi' yʌlʌ lac Yum.

¹⁴ C'ʌyin lac Yum, i yalobilet bʌ Sion. Subu i ñuclel lac Yum, Israel. Yom tijicñayet. La' ñuc'ac a pusic'al añet bʌ ti Jerusalén.

¹⁵ Come lac Yum tsa'ix ujti i melet. Tsa'ix i choco loq'uel a contrajob. I Rey Israel jiñʌch lac Yum. Wolix i yajñel ti a tojlel. Mach chʌn talix wocol. Ma'anix mi caj a cha'len bʌq'uen.

¹⁶ Ti jim bʌ q'uin mi caj i subentelob jini año' bʌ ti Jerusalén: Mach ma' cha'len bʌq'uen, añet bʌ ti Sion, p'ʌtesan a bʌ.

¹⁷ Come lac Yum an a wic'ot. Jini P'ʌtʌl Bʌ mi caj i coltañet. Tijicña mi caj i yubin yic'otet. Mi caj i yʌq'ueñet a c'aj a wo. Mi caj i c'uxbiñet. Mi caj i cha'len c'ay come tijicña mi' q'uelet.

¹⁸ Joñon mi caj c tempan tilel c cha'año' bʌ tsa'ix bʌ c'ojyiyob ti uq'uel ya' ba' tsi' cuchuyob wocol ba' pujquemob. Mi caj c jisan la' contrajob tsa' bʌ i ts'a'leyetla.

¹⁹ Mi caj cʌq'ueñob i toj i mul jini xjontolilob tsa' bʌ i tic'layetla. Mi caj j coltan jini mach bʌ wenic i yoc. Mi caj c pʌy tilel jini sajtemo' bʌ ti jujuntiquil. Mi caj cʌq'ueñob i ñuclel ti' tojlel pejtelel pañimil ba' tsa' a'lentiyob.

²⁰ Ti jim bʌ q'uin che' mic much'quiñetla mi caj cʌq'ueñetla la' ñuclel ti' tojlel pejtel winicob. Mi caj i c'uxbiñetla ti pejtelel pañimil. Mi caj i subob la' ñuclel che' mic cha' pʌyetla tilel ti la' lumal, che' mi cʌq'ueñetla la' wenlel. Tijicña mi caj la' q'uel che' mi' yujtel, che'en lac Yum.