Sofonias 2 - Chol: I T’an Dios

Yom mi la' cʌy la' mul

¹ Winicob ti pejtelel pañimil, tempan la' bʌ. Ña'tanla xñusa t'añetla. Mach la' wujilic quisin.

² Wʌn mele la' pusic'al che' max to c'otemic i yorajlel tojmulil, come ora mi' ñumel q'uin che' bajche' ic'. Wʌn toj'esan la' bʌ che' maxto anic woli' choc tilel i mich'lel lac Yum cha'an mi' jisañetla.

³ C'ajtiben la' coltʌntel pejtel utso' bʌ la' pusic'al tsa' bʌ la' ñopbe i t'an. Yom mi la' sajcan la' toj'esʌntel yic'ot i yutslel la' pusic'al. Tic'ʌl che' jini mi caj i ñusañet lac Yum che' mi' choc tilel i mich'ajel ti jini bʌc'ñʌbil bʌ q'uin.

Gaza yic'ot jini filisteojob

⁴ Jochol mi caj i cʌytʌl Gaza yic'ot Ascalón. Mi caj i laj jisʌntel Asdod ti jump'ejl jach q'uin. Mi caj i bojquel loq'uel Ecrón.

⁵ ¡P'ump'uñob jax jini chumulo' bʌ ti' ti' ja' ya' ti' tejclum tac Canaán! Come lac Yum tsi' yʌc'ʌ i t'an ti' contra filisteojob: Mi caj c junyajlel jisañetla. Ma'anic majqui mi caj i cʌytʌl, che'en.

⁶ Jini i ti' ja' mi caj i sujtel che' bajche' jamil ba' mi' yajñelob xcʌnta tiñʌme'ob yic'ot i yʌlac'.

⁷ Ya' mi caj i majlelob ti chumtʌl i colojbal i p'olbal Judá. Ya' mi caj i c'ajob i yo ti' yotot tac Ascalón ba' ma'añobix i yum. Come lac Yum mi caj i cha' pʌsbeñob i yutslel. Mi caj i cha' aq'ueñob i wenlel.

Moab yic'ot jini Amón

⁸ Tsi' yʌlʌ lac Yum: Tsa cubibeyob i t'an jini ch'oyolo' bʌ ti Moab yic'ot ti Amón che' mich'ob. Woli' ts'a'leñob c tejclumob. Chan tsi' meleyob i bʌ. Tsa' ochiyob ti' lumal c tejclumob cha'an mi' chilbeñob i chubʌ'an.

⁹ Joñon i Yumon panchan, i Dioson israelob. Jini cha'an mi caj c jisan Moab yic'ot Amón che' bajche' Sodoma yic'ot Gomorra. Ya' ti' lumal mi caj i pasel stsajatun. Mi caj i sujtel jini lum ti ats'am. Jochol mi caj i cʌytʌl ti pejtelel ora. Jini c winicob tsa' bʌ cʌleyob mi caj i tilel i ch'ʌmob la' chubʌ'an, che'en lac Yum.

¹⁰ Pejtel ili wocol mi caj i tajob cha'an tsi' chañ'esayob i bʌ. Mi caj i tojob i mul cha'an tsi' ts'a'leyob c winicob.

¹¹ Mi caj cʌq'ueñob cabʌl wocol. Mi caj i junyajlel jisañob i diosob ti pejtelel pañimil. Ti jujumpejt lum ba' chumulob winicob mi caj i ch'ujutesañon. Che' tsi' yʌlʌ lac Yum.

Etiopía yic'ot Asiria

¹² Jatetla ja'el añet bʌ la ti Etiopía mi caj la' tsʌnsʌntel ti guerra.

¹³ Mi caj i c'otel i mich'ajel lac Yum ti' contra Asiria am bʌ ti norte. Mi caj i jisan. Mi caj i junyajlel jisan Nínive. Jochol mi caj i cʌytʌl che' bajche' i tiquiñal pañimil.

¹⁴ Ya'i mi' cajelob ti buc'bal alʌc'ʌl. Mi caj i melob i yotot bʌte'el yic'ot xwejlel mut ti chajp ti chajp. Ya' ti tocol tac bʌ lum mi' cajelob ti uq'uel jini bʌte'el. Ti' pam i yoyel otot jini te'lemut mi' cajelob ti ch'ijiyem bʌ c'ay, come ma'anix mi ts'ita'ic te' ba' mi' mejlel ti t'uchtʌl tac.

¹⁵ Ti yambʌ ora tijicña jini tejclum. Mach yujilic bʌq'uen. Jini ya' bʌ chumulob tsi' lon alʌyob ti' pusic'al: Ma'anic yambʌ tejclum bajche' iliyi. Wen ñuconla. Ma'anic majqui mi' tic'lañonla. Che' tsi' lon alʌyob. Pero wʌle tsa' sujti jini tejclum ti' yotot bʌte'el. Jini xñumelob mi caj i tujbañob. Mi caj i ts'a'leñob.