Salmos 99 - Chol: I T’an Dios

Xuc'ul lac Yum yic'ot Israel

¹ Mi' cha'len yumʌl lac Yum. Yom tsiltsilñayob i pusic'al winicob x'ixicob. Buchul lac Yum ya' ti' t'ejl jini querubiñob. La' i yujcun i bʌ pañimil.

² Ñuc lac Yum ti Sion ba' woli ti yumʌntel. Ñuc ti' tojlel jujunmojt winicob x'ixicob.

³ La' i subob i ñuclel a c'aba', Come bʌbʌq'uen jax, ch'ujulʌch ja'el.

⁴ Jini Ñuc bʌ Rey mi' c'uxbin toj bʌ meloñel. Tsa'ix i yʌc'ʌ ti melol chuqui tac toj. Tsa'ix i mele chuqui toj yic'ot chuqui isujm ti' tojlel Israel.

⁵ Subula i ñuclel lac Yum Dios. Pʌcchocon la' bʌ ba'an i yoc. Ch'ujul jax lac Yum.

⁶ Lac Yum tsi' pejca Moisés yic'ot Aarón, cha'tiquil i motomajob, Yic'ot Samuel ja'el. Tsi' laj pejcayob lac Yum ti' c'aba'. Che' an chuqui tsi' c'ajtibeyob lac Yum tsi' jac'beyob.

⁷ Ya' ti wa'al bʌ tocal tsi' cʌntesayob. Tsi' jac'beyob i t'an yic'ot jini mandar tsa' bʌ i yʌq'ueyob.

⁸ C Yum lojon Dios, tsa' pejcayob. Tsa' ñusʌbeyob i mul, Pero tsa' wʌq'ueyob i toj che' bʌ tsa' jultesʌbeyob i pusic'al.

⁹ C'uxbinla lac Yum Dios. Pʌcchocon la' bʌ ya' ba'an ch'ujul bʌ wits i cha'an, Come ch'ujulʌch lac Yum Dios.