Salmos 97 - Chol: I T’an Dios

I yumʌntel lac Yum

¹ Lac Yum woli ti yumʌntel. Yom tijicña jini año' bʌ ti pañimil yic'ot año' bʌ ti' ti' colem ñajb.

² Ti' joytilel lac Yum an tocal yic'ot ic'yoch'an bʌ pañimil. Xuc'ul mi' yajñel ti' buchlib cha'an yujil meloñel ti isujm. Toj mi' mel i ye'tel.

³ Mi' loq'uel c'ajc ti' tojlel, Mi' jisan i contrajob año' bʌ ti' joytilel.

⁴ Mi' choc majlel chajc mu' bʌ i sʌq'uesan pañimil. Tsiltsilñayob mi' q'uelob jini año' bʌ ti pañimil.

⁵ Jini wits mi' yulmʌl che' bajche' ñichim ti' tojlel lac Yum. I Yumch pejtel pañimil.

⁶ Tsiquil ti panchan toj lac Yum. Mi' q'uelbeñob i ñuclel lac Yum ti pejtelel pañimil.

⁷ Mi' cajelob ti quisin pejtel mu' bʌ i ch'ujutesañob dioste' tac, Mu' bʌ i lon chañ'esañob i bʌ cha'an dioste' tac mach bʌ anic i c'ʌjñibal. La' i pʌcchocoñob i bʌ ti' tojel i yoc Dios pejtel diosob.

⁸ Tijicñayob jini año' bʌ ti Sion yic'ot ti' tejclum tac Judá cha'an toj a meloñel, c Yum.

⁹ Come jatet, c Yum, wen ñuquet, c'uxbibilet. Mach ñucobic jini ñuco' bʌ ti pañimil yic'ot pejtelel i diosob.

¹⁰ Jatetla mu' bʌ la' c'uxbin lac Yum, ts'a'lenla jontolil. Lac Yum mi' cʌntan i cha'año' bʌ. Mi' pʌyob loq'uel ti' p'ʌtʌlel jini jontolo' bʌ.

¹¹ Mi' sʌc'an majlel i bijlel jini toj bʌ. Mi' yʌq'uentel i tijicñʌyel jini toj bʌ i pusic'al.

¹² Jatetla tojet bʌ la, yom tijicña la' pusic'al ti lac Yum jini ch'ujul bʌ Dios. Subenla wocolix i yʌlʌ lac Yum.