Salmos 96 - Chol: I T’an Dios

I ñuclel lac Yum

¹ C'ʌyiben lac Yum tsiji' bʌ c'ay. C'ʌyin lac Yum ti pejtelel pañimil.

² C'ʌyin lac Yum. Ch'ujutesanla i c'aba'. Subula ti jujump'ejl q'uin woli' coltañonla.

³ Subula i ñuclel lac Yum ti' lumalob pejtelel winicob x'ixicob. Subula uts'at bʌ i melbal ti' tojlel pejtel tejclumob.

⁴ Come ñucʌch lac Yum. La' wen sujbic i ñuclel. Yom mi lac bʌc'ñan Dios ti pejtelel lac pusic'al. Jini jach yom bʌc'ñʌñtel ti' tojlel jini diosob.

⁵ Come dioste' jach pejtelel i diosob winicob x'ixicob mach bʌ i cʌñʌyobic Dios. Pero lac Yum tsi' mele jini panchan.

⁶ Cabʌlʌch i c'uxbintel yic'ot i ñuclel jini año' bʌ ti' tojel i wut. I t'ojol jax jini ch'ujul bʌ i yajñib ba' mi' pʌs i p'ʌtʌlel.

⁷ Ch'ujutesan lac Yum winicob x'ixicob ti mojt ti mojt. Subenla i ñuclel yic'ot i p'ʌtʌlel.

⁸ Subenla i ñuclel i c'aba' lac Yum come che'ʌch yom. Ch'ʌmbenla tilel i majtan. Ochenla ti' pam i yotot.

⁹ Ch'ujutesan lac Yum ti' sʌclel la' pusic'al. Yom tsiltsilñayetla ti' tojlel lac Yum ti pejtelel pañimil.

¹⁰ Subeñob jini sajtemo' bʌ, woli ti yumʌntel lac Yum. Wa'chocobilix jini pañimil, mach mejlic ti ñijcʌntel. Dios mi caj i mel winicob x'ixicob ti toj.

¹¹ La' i yubin tijicña jini panchan yic'ot pañimil. La' i cha'len c'am bʌ t'an jini colem ñajb yic'ot pejtel i bʌl.

¹² Yom tijicña jini pʌc'ʌbʌl yic'ot pejtel i bʌl. Pejtel jini te'el mi' cajel ti c'ay yilal

¹³ Come tal lac Yum i mel jini año' bʌ ti pañimil. Toj mi caj i mel jini año' bʌ ti pañimil. Mi caj i melob yic'ot i sujmlel.