Salmos 95 - Chol: I T’an Dios

Mi' sujbel i ñuclel Dios

¹ Conla, la' lac cha'len c'ay ti' tojlel lac Yum. La' lac pejcan Dios, tijicña lac pusic'al. Jiñʌch p'ʌtʌl bʌ xajlel mu' bʌ i coltañonla.

² La' ochiconla ti' tojlel cha'an mi lac suben wocolix i yʌlʌ. Yom tijicña lac pusic'al mi laj c'ʌyin lac Yum ti salmo.

³ Come ñucʌch Dios lac Yum. Jiñʌch ñuc bʌ Rey ti' tojlel pejtelel diosob.

⁴ I tamlel jini lum an ti' wenta. I cha'añʌch i ñi' chan bʌ wits.

⁵ I cha'añʌch jini colem ñajb, come jini tsi' mele. Tsi' mele jini lum ti' p'ʌtʌlel.

⁶ La' lac ch'ujutesan lac Yum. La' lac ñocchocon lac bʌ ti' tojlel jini tsa' bʌ i meleyonla.

⁷ Come lac Diosʌch. I winiconla. Mi' cʌntañonla che' bajche' xcʌnta tiñʌme'. Uts'at muq'uic a wubiben i t'an wʌle:

⁸ Mach tsʌts'ac la' pusic'al che' bajche' ya' ti Meriba yic'ot Masa ya' ti tiquin lum, Che' bʌ tsi' subeyob Moisés: “Mach wʌ'ic an Dios quic'ot lojon ila ti tiquin lum”, che'ob.

⁹ Tsi' yilʌbeyoñob c pusic'al la' ñojte'elob. Ma'anic tsi' ñopoyoñob Anquese cabʌl tsi' q'ueleyob uts'at bʌ c melbal.

¹⁰ Cha'c'al jab tsac mele c pusic'al cha'añob. Tsa cʌlʌ: Cabʌl mi' tajob i sajtemal jini winicob x'ixicob. Mach i cʌñʌyobic c bijlel, cho'on.

¹¹ Jini cha'an mich'on tsa cʌc'ʌ c t'an. Ma'anic mi caj cʌq'ueñob i c'aj i yo. Che' tsi' yʌlʌ Dios.