Salmos 94 - Chol: I T’an Dios

I jisʌntel jontolo' bʌ

¹ C Yum Dios, jatet mu' bʌ a q'uextan jontolil, pʌsʌ a bʌ.

² Wa'i' ti meloñel come an ti a wenta jini pañimil. Yom ma' wʌq'ueñob i toj i mul mu' bʌ i chañ'esañob i bʌ.

³ C Yum, ¿jayp'ejl to q'uin mi caj i chʌn chañ'esañob i bʌ xmulilob?

⁴ Ch'ejlob i t'an. Mi' chañ'esañob i bʌ. Pejtel mu' bʌ i cha'leñob mulil mi' lon subob i bʌ ti ñuc.

⁵ Mi' t'uchtañob a cha'año' bʌ, c Yum. Mi' tic'lañob.

⁶ Mi' tsʌnsañob meba' x'ixicob yic'ot meba' alʌlob yic'ot jini ch'oyolo' bʌ ti yambʌ lum tac.

⁷ Mi' yʌlob: Lac Yum ma'anic mi' q'uelon lojon. Ma'anic mi' c'otel i wut i Dios Jacob, che'ob.

⁸ Tontojet bʌ la, p'isila ti wenta ili c t'an. ¿Jala to mi caj la' taj la' ña'tʌbal?

⁹ Jini tsa' bʌ i mele lac chiquin, ¿xcojc ba? Jini tsa' bʌ i mele lac wut, ¿xpots' ba?

¹⁰ Jini mu' bʌ i yʌq'ueñob winicob x'ixicob i tojob i mul ti mojt ti mojt, ¿Mach ba anic mi caj i ju'sʌbeñetla la' pusic'al? Ña'tʌbil i cha'an Dios pejtel chuqui mi' yujtel. ¿Mach ba yujilic chuqui woli la' mel?

¹¹ Cʌmbil i cha'an lac Yum ic' jach chuqui mi' lon ña'tañob winicob.

¹² Tijicña jini winic ju'sʌbil bʌ i pusic'al a cha'an, Jini cʌntesʌbil bʌ ti a mandar, c Yum.

¹³ Mi' taj i ñʌch'tilel i pusic'al che' an i tic'lʌntel, C'ʌlʌl mi' chajpʌbentelob ch'en jini jontolo' bʌ ba' mi caj i yochelob i toj i mul.

¹⁴ Come lac Yum ma'anic mi caj i choc i cha'año' bʌ. Ma'anic mi caj i cʌyob.

¹⁵ Jini tojo' bʌ mi caj i q'uejlelob ti toj. Pejtel jini tojo' bʌ i pusic'al tijicña mi caj i q'uelob.

¹⁶ ¿Majqui mi caj i coltañon ti contra jini jontolo' bʌ? ¿Majqui mi caj i wa'chocon i bʌ quic'ot, ti' contra jini mu' bʌ i cha'leñob jontolil?

¹⁷ Machic tsi' coltayon c Yum Ora tsa' ñʌjch'iyon ti mucoñibʌl.

¹⁸ Che' bʌ tsa cʌlʌ: Woli' tʌjts'el coc cha'an mulil, cho'on, Tsa' bʌc' chucuyon letsel, c Yum, cha'an c'ux ma' wubiñon.

¹⁹ Che' woliyon ti tsic pusic'al cha'an cabʌl chuqui mic ña'tan, Ma' ñuq'uesʌbeñon c pusic'al.

²⁰ Jini jontolo' bʌ año' bʌ i ye'tel, ¿mejl ba i cha'leñob i ye'tel a wic'ot? Mach a pi'ʌlobic mu' bʌ i c'ʌñob a mandar cha'an mi' tic'lañob winicob.

²¹ Mi' temob i t'an cha'an mi' tsʌnsañob jini toj bʌ. Mi' yʌc'ob ti chʌmel jini mach bʌ añobic i mul.

²² Pero lac Yum jiñʌch chan bʌ ts'ajc ba' mi cochel. C Dios, jiñʌch ch'entun ba' xuc'ulon ti' tojlel j contrajob.

²³ Dios mi caj i q'uextʌbeñob i mul. Mi caj i jisañob cha'an i jontolil. Lac Yum Dios mi caj i jisañob.