Salmos 92 - Chol: I T’an Dios

Xuc'ulʌch Dios

¹ C Yum, la' subentiquet wocolix a wʌlʌ come che'ʌch yom. I t'ojol jax che' mi' c'ʌyintel i ñuclel a c'aba', come c'ax ñuquet.

² I t'ojol jax che' mi' sujbel a wutslel ti sʌc'ajel, Yic'ot i xuc'tilel a pusic'al che' ac'ʌlelix.

³ La' sujbic ti música am bʌ lujunt'ujm i ch'ajñal, yic'ot ti salterio, yic'ot ti' t'an arpa.

⁴ C Yum, tsa'ix a ñuq'uesʌbeyon c pusic'al cha'an a melbal. Tijicña jax c pusic'al mic cha'len c'ay come uts'atax a melbal.

⁵ C Yum, wen ñuc a melbal. Ya' lotol ti a pusic'al ma' ña'tan chuqui yom.

⁶ Jini tonto bʌ mach mejlic i ch'ʌmben isujm. Ma'anic mi' cʌn iliyi:

⁷ Anquese mi' p'ojlelob jini jontolo' bʌ che' bajche' mi' pasel jam, lolom jach. Come mux i jisʌntelob. Mach colicob ti pejtelel ora.

⁸ Pero jatet c Yum, wen ñuquet ti pejtelel ora.

⁹ Q'uele a contrajob, c Yum. Mux i jisʌntelob. Pejtel mu' bʌ i cha'leñob jontolil mi caj i pam pujquelob.

¹⁰ Tsa'ix a wʌq'ueyon c p'ʌtʌlel cha'an mi mʌjlel c cha'an. Mulbilonix yubil ti tsiji' bʌ aceite.

¹¹ Tsa'ix cubi bajche' tsa' chʌmiyob jini jontolo' bʌ. Tsa'ix j q'uele i jilibalob.

¹² Mi caj i tsictiyel i wenlel jini toj bʌ winic che' bajche' jini xan. Mi caj i p'ʌt'an che' bajche' ch'ujte' am bʌ ti Líbano.

¹³ Che'ʌch yilalob pejtel año' bʌ i wi' ti' yotot lac Yum. Cabʌl mi' cha'leñob nich, cabʌl mi' yʌc'ob i wut.

¹⁴ C'ʌlʌl che' ñoxobix mi caj i chʌn ac'ob i wut. Che'ʌch añob bajche' wen yʌx bʌ te' am bʌ i yetsel. Cabʌl i yopol.

¹⁵ Mi caj i yʌc'ob ti cʌjñel lac Yum cha'an tojʌch. Jiñʌch c xajlel ba' mic taj c xuc'tilel. Ma'anic i sajtemal lac Yum.