Salmos 89 - Chol: I T’an Dios

Dios tsi' yʌq'ue David xuc'ul bʌ i t'an

¹ C Yum, mi caj j c'ʌyibeñet i yutslel a pusic'al ti pejtelel ora. Mi caj cʌq'ueñob i cʌñet calobilob ti jujunlajm, come xuc'ul a pusic'al c'ʌlʌl ti pejtelel ora.

² Tsac sube lac Yum: Xuc'ul i yutslel a pusic'al ti pejtelel ora. Lajal i xuc'tilel a pusic'al bajche' panchan mach bʌ yujilic yʌjñel.

³ Lac Yum tsi' yʌlʌ: Tsa cʌq'ue xuc'ul bʌ c t'an jini yajcʌbil bʌ c cha'an. Tsac wersa sube c winic David

⁴ Cha'an mi caj c wa'chocon i p'olbal cha'an mi' yajñel ti pejtelel ora, Cha'an mi' chʌn cha'len i ye'tel ti pejtelel ora, che'en lac Yum.

⁵ C Yum, ya' ti panchan mi' p'isob ti wenta uts'at bʌ a melbal. Mi' sujbel ti ñuc i xuc'tilel a pusic'al ya' ba' tempʌbilob ch'ujul bʌ ángelob.

⁶ ¿Am ba juntiquil ti panchan lajal bʌ bajche' lac Yum? ¿Am ba ángel ñuc bʌ bajche' lac Yum?

⁷ Jini ángelob año' bʌ i ye'tel mi' bʌc'ñañob Dios. Wen ñuc Dios ya' ti' tojlel pejtel año' bʌ ti' joytilel.

⁸ C Yum Dios, i Yumet bʌ Panchan yic'ot Pañimil, ¿Am ba yambʌ lajal bʌ i p'ʌtʌlel? Baqui jach mi' q'ueletob mi' ña'tañob xuc'ulet.

⁹ Mi' yumañet jini colem ñajb wʌlʌcña bʌ mi' majlel. Che' wen wʌlʌcña mi' letsel ja', jatet ma' ñʌch'chocon.

¹⁰ Jatet tsa' t'uchta egiptojob, tsa' jisayob. Mach chʌn cʌñʌlobix. Tsa' pam pucu a contrajob. Wen p'ʌtʌlet.

¹¹ A cha'añʌch jini panchan, a cha'añʌch pañimil. Tsa'ix a mele jini pañimil yic'ot pejtel i bʌl.

¹² Tsa'ix a mele jini pañimil c'ʌlʌl ti norte c'ʌlʌl ti sur. Jini wits tac Tabor yic'ot Hermón mi' tsictesañob i ñuclel a c'aba'.

¹³ Cabʌlʌch i p'ʌtʌlel a c'ʌb, cabʌlʌch a melbal. Ma'anic i p'isol a p'ʌtʌlel.

¹⁴ Toj ma' cha'len meloñel ti a yumʌntel come tojet. Uts'at pejtelel chuqui ma' mel. Mi' tsictiyel a wutslel yic'ot a sujmlel.

¹⁵ Tijicñayob mu' bʌ i yubiñob i t'an trompeta, Come mi' yajñelob ti a sʌclel.

¹⁶ Tijicña mi' yubiñob ti jujump'ejl q'uin mu' bʌ i cʌñob a c'aba'. Mi' ñuc'añob i pusic'al cha'an tojet.

¹⁷ I ñuclelʌch i p'ʌtʌlel mu' bʌ a wʌq'ueñob. Cha'an ti a wutslel mi caj c p'ʌtan lojon.

¹⁸ Come lac mʌctʌjibʌch lac Yum. Jiñʌch lac Rey, jini Ch'ujul bʌ ti Israel.

¹⁹ Tsa'ix a pejca jini x'alt'an a cha'an ti espíritu. Tsa' sube: Tsa'ix c yajca loq'uel ti' tojlel i pi'ʌlob juntiquil wen p'ʌtʌl bʌ cha'an mi' cha'len yumʌl.

²⁰ Tsa'ix c yajca c winic David. Tsa'ix c boño ti ch'ujul bʌ aceite.

²¹ Mi caj j coltan c winic tic p'ʌtʌlel. Mi caj c p'ʌtesan tij c'ʌb.

²² Mach mʌjlic i cha'an i contra. Jini jontol bʌ ma'anic mi caj i t'uchtan c winic.

²³ Mi caj c t'uchtʌbeñob i contrajob ti' tojel i wut. Mi caj c jats'ob mu' bʌ i ts'a'leñob.

²⁴ Mi caj c pʌsben i xuc'tilel c pusic'al yic'ot cutslel. Mi caj i yʌq'uentel i yumʌntel tij c'aba'.

²⁵ Mi caj cʌq'uen jini lum ya' ti colem ñajb, C'ʌlʌl ti jini colem ja' Eufrates.

²⁶ Mi caj i pejcañon: Jatet c Tatet, C Dioset, c Xajlelet ba' ch'oyol j coltʌntel, che'en.

²⁷ Mi caj cotsan c winic ti ascuñʌl bʌ calobil. Ti' tojlel jini ñuc bʌ reyob ti pañimil ma'anic ñuc bʌ bajche' jini.

²⁸ Mi caj c pʌsben cutslel ti pejtelel ora come c'ux mi cubin. Mach jilic ti pejtelel ora jini xuc'ul bʌ c t'an tsa' bʌ cʌq'ue.

²⁹ Mach jilic i p'olbal ti pejtelel ora. Che' bajche' xuc'ul jini panchan che'ʌch ja'el i buchlib ti' yumʌntel ti pejtelel ora.

³⁰ Mi tsi' cʌyʌyob j cʌntesa i yalobilob, Mi mach yomobic i tsajcan majlel jini toj bʌ c t'an,

³¹ Mi caj c ju'sʌbeñob i pusic'al. Mi ts'a' mi' yubiñob i tic'ol, Mi ma'anic mi' jac'beñob c mandar,

³² Che' jini mi caj c ju'sʌbeñob i pusic'al ti asiyal. Mi caj c jats'ob cha'an i mul.

³³ Pero ma'anic mi caj j cʌy j c'uxbin c winicob. Xuc'ul mi caj c chʌn mel pejtel tsa' bʌ cʌlʌ.

³⁴ Ma'anic mi caj c ñusan xuc'ul bʌ c t'an. Ma'anic mi caj c yʌñe' jini tsa' bʌ cʌlʌ.

³⁵ Junyajl jach tsa cʌc'ʌ c t'an. Mach c lotic tsa' bʌ c sube David.

³⁶ Mi caj i yajñel i p'olbal ti pejtelel ora, Che'ʌch i ñuclel i yumʌntel che' bajche' jini q'uin am bʌ tic tojel.

³⁷ Mi caj i yajñel ti pejtelel ora che' bajche' jini uw. Xuc'ul mi caj i yajñel che' bajche' jini panchan, che'en lac Yum.

³⁸ Pero wʌle c Yum, tsa'ix a cʌyʌ jini yajcʌbil bʌ a cha'an. Tsa'ix a ts'a'le, tsa'ix a mich'le.

³⁹ Tsa'ix a ñusa jini xuc'ul bʌ a t'an tsa' bʌ a wʌq'ue a winic. Tsa'ix a chilbe i ye'tel rey.

⁴⁰ Tsa'ix a jembe pejtel i ts'ajquil tac i tejclum. Tsa'ix a jisʌbe jini ts'ajquibil bʌ otot tac i cha'an.

⁴¹ Pejtel mu' bʌ i ñumelob majlel ti bij mi' xujch'ibeñob i chubʌ'an. I cʌñʌyo' bʌ mi' tse'tañob.

⁴² Tsa'ix a wʌq'ueyob i p'ʌtʌlel i contrajob cha'an mi' mʌjlel i cha'añob. Tsa'ix a wʌq'ueyob i tijicñʌyel i pusic'al i contrajob.

⁴³ Tsa'ix a puch'be i yej i yespada a winic. Ma'anic tsa' p'ʌtesa che' ti' yorajlel guerra.

⁴⁴ Tsa'ix a jisʌbe i ñuclel. Tsa'ix a chocbe i buchlib i yumʌntel ti lum.

⁴⁵ Tsa'ix a ñox'esa a winic che' ch'iton to. Tsa'ix a wʌc'ʌ ti quisin.

⁴⁶ C Yum, ¿jayp'ejl to q'uin? ¿Mu' ba caj a chʌn muc a bʌ ti pejtelel ora? ¿Mu' ba caj ti chʌn lejmel a mich'ajel che' bajche' c'ajc?

⁴⁷ Ña'tan mach jalijelonic ti pañimil. ¿Chuqui i ye'tel tsa' mele winicob x'ixicob che' mi' laj jilelob?

⁴⁸ ¿Am ba p'ʌtʌl bʌ winic mu' bʌ mejlel ti chʌn ajñel ti pañimil? ¿Am ba mach bʌ yujilic chʌmel? ¿Mejl ba i coltan i bʌ cha'an ma'anic mi' chʌmel?

⁴⁹ C Yum, la' tsictiyic a wutslel tsa' bʌ a pʌsʌ wajali. La' ts'ʌctiyic a t'an tsa' bʌ a wʌq'ue David ti ch'ujul bʌ a c'aba'.

⁵⁰ C Yum, ña'tan a winicob woli bʌ i ts'a'lentelob. Q'uele bajche' mij cuch cʌ'lentel ti' tojlel pejtelel winicob x'ixicob.

⁵¹ Come a contrajob woli' yʌ'leñon, jini yajcʌbil bʌ a cha'an.

⁵² La' ch'ujutesʌntic lac Yum ti pejtelel ora. Amén.