Salmos 86 - Chol: I T’an Dios

Mi' c'ajtin i p'untʌntel ti Dios

¹ Jac'beñon, c Yum. Ñich'tʌbeñon c t'an, Come tic'lʌbilon, p'ump'un jax c bʌ.

² Cʌntañon ti xuc'ul, come tsa'ix cʌq'ueyet c pusic'al. C Diosetʌch, coltan a winic woli bʌ i ñopet.

³ C Yum, p'untañon, come mic pejcañet ti wocol t'an che' mi' sʌc'an c'ʌlʌl mi' yic'an.

⁴ Yom ma' tijicñesʌben i pusic'al a winic, c Yum, Come mi cʌq'ueñet c pusic'al.

⁵ Isujm uts'atet, c Yum, ma' ñusʌbeñon lojon c mul. Ma' pʌsbeñob i yutslel a pusic'al pejtel mu' bʌ i pejcañetob.

⁶ C Yum, ñich'tʌbeñon coración. Jac'beñon che' mic pejcañet ti wocol t'an.

⁷ Che' woliyon ti wocol mic pejcañet, come jatet mi caj a jac'beñon.

⁸ C Yum, ma'anic yambʌ Dios che' bajche'et. Ma'anic yambʌ lajal bʌ i melbal.

⁹ Pejtel winicob x'ixicob tsa' bʌ a mele mi caj i tilelob ti mojt ti mojt. Mi caj i ñocchocoñob i bʌ ti a tojlel, c Yum, Cha'an mi' subob i ñuclel a c'aba'.

¹⁰ Come wen ñuquet, laj uts'atax a melbal. Jatet jach Dioset.

¹¹ C Yum, pʌsbeñon a bijlel cha'an xuc'ul mi cajñel a wic'ot. La' cʌc' c pusic'al cha'an mic bʌc'ñañet.

¹² C Yum Dios, mi caj c subeñet wocolix a wʌlʌ ti pejtelel c pusic'al. Mi caj c sub i ñuclel a c'aba' ti pejtelel ora.

¹³ Cabʌlʌch a c'uxbiya tsa' bʌ a pʌsbeyon. Tsa' loc'sayon ba' bʌbʌq'uen mi cochel ti' yajñib chʌmeño' bʌ.

¹⁴ Dios, jini mu' bʌ i chañ'esañob i bʌ woli' contrajiñoñob. Jini jontol bʌ winicob tsi' temeyob i t'an cha'an mi' tsʌnsañon. Ma'anic mi' p'isetob ti' wenta.

¹⁵ C Yum, ma' p'untan winicob x'ixicob. Ma' pʌsbeñob i yutslel a pusic'al. Ma' cuchbeñob i sajtemal. Cabʌlʌch a wutslel, wen xuc'ulet.

¹⁶ Q'ueleyon cha'an ma' p'untañon. P'ʌtesan a winic come i yalobilon x'ixic tsa' bʌ i c'uxbiyet.

¹⁷ Pʌsbeñon i yejtal a wutslel cha'an mi' ñuc'an c pusic'al, Cha'an mi' cajelob ti quisin jini mu' bʌ i ts'a'leñoñob. Come jatet, c Yum, wola' coltañon. Wola' ñuq'uesʌbeñon c pusic'al.