Salmos 83 - Chol: I T’an Dios

I contrajob Dios

¹ Dios, mach yomic ma' to'ol q'uelon lojon. Mach yomic ñʌch'ʌlet. Mach a tic' a bʌ.

² Come cabʌl woliyob ti t'an a contrajob. Jini mu' bʌ i ts'a'leñet mi' chañ'esañob i bʌ.

³ Mi' temob i t'an ti' contra jini winicob x'ixicob a cha'an. Mi' tem ña'tañob i contrajin jini cʌntʌbilo' bʌ a cha'an.

⁴ Mi' yʌlob: Conla, la' lac laj jisañob Cha'an mach chʌn ña'tibilix i lumal Israel, che'ob.

⁵ Come tsi' temeyob i t'an. Jump'ejlob i pusic'al. Tsi' temeyob i t'an cha'an mi' contrajiñet, c Yum.

⁶ Jini ch'oyolo' bʌ ti Edom yic'ot jini ismaelob, Yic'ot año' bʌ ti Moab, yic'ot jini agareñob,

⁷ Yic'ot año' bʌ ti Gebal, yic'ot ti Amón, yic'ot ti Amalec, Yic'ot filisteojob, yic'ot jini chumulo' bʌ ti Tiro

⁸ Tsi' laj much'quiyob i bʌ yic'ot Asiria ja'el. Tsi' coltayob ti guerra i p'olbalob Lot.

⁹ Laj aq'ueñob wocol che' bajche' tsa' wʌq'ueyob wocol jini año' bʌ ti Madián, Che' bajche' tsa' wʌq'ueyob wocol Sísara yic'ot Jabín ya' ti pa' i c'aba' Cisón.

¹⁰ Tsa' jisayob ya' ti Endor. Tsa' sujtiyob ti abono cha'an lum.

¹¹ La' jisʌnticob che' bajche' Oreb yic'ot Zeeb. La' jisʌnticob che' bajche' Zeba yic'ot Zalmuna.

¹² Come tsi' lon alʌyob: La' lac chilben i lumal Dios, Ba' chumulob i cha'año' bʌ, che'ob.

¹³ C Dios, meleyob che' bajche' ts'ubejn mu' bʌ i wejlan sutujt ic', Che' bajche' i yopol te' mu' bʌ i letsan ic',

¹⁴ Che' bajche' c'ajc mu' bʌ i pul majlel mate'el, Che' bajche' tojcʌlel mu' bʌ i pul majlel wits.

¹⁵ Choco tilel p'ʌtʌl bʌ ic' cha'an ma' wajñesañob. Bʌc'tesañob ti p'ʌtʌl bʌ ic' a cha'an.

¹⁶ La' i wen ubiñob quisin Cha'an mi' sajcañetob c Yum.

¹⁷ La' i yubiñob quisin. La' i yubiñob bʌq'uen ti pejtelel ora. La' ts'a'lenticob, la' jilicob.

¹⁸ La' i ñopob a c'aba' come jatet jach c Yumet lojon. C'ax ñuquet ti pejtelel pañimil.