Salmos 80 - Chol: I T’an Dios

La' i cha' tajob i coltʌntel

¹ Xcʌnta tiñʌme' i cha'an Israel, ñich'tañon. Tsa'ix a pʌyʌ majlel José che' bajche' tiñʌme'. Buchuletix ti' t'ejl querubiñob ya' ti chan.

² Pʌsbeñob a p'ʌtʌlel Efraín, yic'ot Benjamín, yic'ot Manasés. La', coltañon lojon.

³ Dios, cha' ch'ejlesʌbeñon lojon c pusic'al. Pʌsbeñon a wutslel cha'an mij coltʌntel lojon.

⁴ C Yum Dios, i Yum Panchan yic'ot Pañimil, ¿Jayp'ejl to q'uin mich'et? ¿Mu' ba a ts'a'liben i yoración a cha'año' bʌ?

⁵ I ya'lel i wut i wentajlelʌch i waj mu' bʌ a wʌq'ueñob ti jujump'ejl q'uin. On tsa' wʌq'ueyob i jap i ya'lel i wut.

⁶ Tsa' wʌc'ʌyon lojon ti a'lentel ti' tojlel c pi'ʌlob ti chumtʌl. Mi' tse'tañon lojon j contrajob.

⁷ I Dioset bʌ Panchan yic'ot Pañimil, cha' ch'ejlesʌbeñon lojon c pusic'al. Pʌsbeñon a wutslel cha'an mij coltʌntel lojon.

⁸ Tsa'ix a pʌyʌyon lojon loq'uel ti Egipto. Tsa'ix a chilbeyob i lum yambʌ winicob x'ixicob Ba' tsa' cha' pʌc'ʌyon lojon che' bajche' ac'.

⁹ Tsa' cholobe i lumil ac'. Tsi' chucu lum i wi'. Tsa' bujt'i jini lum.

¹⁰ I yʌxñʌlel jini ac' tsi' moso jini wits. Cabʌl i xʌc' ac' che' bajche' ñuc bʌ i ch'ujte' Dios.

¹¹ I xʌc'tac tsa' coli majlel c'ʌlʌl ti colem ñajb. I yal tac te' tsa' coli ba'an colem ja'.

¹² ¿Chucoch tsa' jeme jini corral tac? Come pejtel jini mu' bʌ i ñumelob ya'i mi' tuc'ob i wut.

¹³ Jini mate' chitam mi' c'uxe'. Jini bʌte'el am bʌ ti jamil mi' c'uxe'.

¹⁴ I Dioset bʌ Panchan yic'ot Pañimil, la' ba' añon lojon. Awocolic mij c'ajtibeñet cha' q'uele jini ac'. La' ti jubel cha'an ma' wʌc'ñan.

¹⁵ Cʌntan a pʌc'ʌbʌl. Cʌntan ch'iton bʌ a walobil tsa' bʌ a cosa cha'an ma' pʌs a ñuclel.

¹⁶ Pulbilix jini ac' ti c'ajc, cholobil. Mi' jilelob israelob che' ma' tilel a wʌ'leñob.

¹⁷ Yom ma' cʌntan a winic ti a p'ʌtʌlel, Yom ma' cʌntan ti a c'ʌb a walobil tsa' bʌ a cosa cha'an mi' pʌs a ñuclel.

¹⁸ Che' jini ma'anix mi caj c chʌn cʌyet lojon. Cha' ch'ejlesañon lojon cha'an mic pejcañet lojon ti a c'aba'.

¹⁹ C Yum Dios, i Yum Panchan yic'ot Pañimil, Cha' ch'ejlesʌbeñon lojon c pusic'al. Pʌsbeñon lojon a wutslel cha'an mij coltʌntel lojon.