Salmos 79 - Chol: I T’an Dios

Ch'ijiyemob cha'an tsa' jisʌnti Jerusalén

¹ Dios, tsa'ix ochiyob jini sajtemo' bʌ ti a lumal. Tsa'ix i bib'esayob jini ch'ujul bʌ a Templo. Tsa'ix i jisayob Jerusalén.

² Tsa'ix i chocoyob i bʌc'tal a winicob cha'an mi' c'uxe' te'lemut. Tsa'ix i chocbeyob i bʌc'tal jini ch'ujulo' bʌ cha'an mi' c'uxe' jini bʌte'el tac.

³ Tsi' bec'beyob i ch'ich'el ti' joytilel Jerusalén che' bajche' ja'. Ma'anic majqui mi' mucob.

⁴ Ts'a'lebilonix lojon cha'an jini chumulo' bʌ tic t'ejl lojon. Mi' tse'tañon lojon jini año' bʌ tic joytilel.

⁵ C Yum, ¿jayp'ejl to q'uin? ¿Chʌn mich'et ba ti pejtelel ora? ¿Tsʌytsʌyña ba a mich'ajel che' bajche' c'ajc woli bʌ ti lejmel?

⁶ Pʌsbeñob a mich'ajel jini gentilob mach bʌ anic mi' ñopetob, Yic'ot jini colem tejclum tac ba' ma'anic mi' pejcañetob ti a c'aba'.

⁷ Come tsa'ix i jisayob israelob. Tsi' jisʌbeyon lojon c chumlib.

⁸ Mach ma' chʌn ña'tʌben i mul c ñojte'el lojon. Mach ma' wʌc' tic wenta lojon. Ti ora yom ma' p'untañon lojon, come wen p'ump'un lojon c bʌ.

⁹ Dios, caj Coltayajet, cʌntañon lojon cha'an uts'atax a c'aba'. Loc'sañon lojon ti mulil. Ñusʌbeñon lojon c mul cha'an ma' wʌc' ti ñuc a c'aba'.

¹⁰ Come mi' yʌlob jini sajtemo' bʌ: ¿Bacan tsiquil i Dios? che'ob. Q'uextʌbeñob i mul j contrajob lojon tsa' bʌ i bec'beyob i ch'ich'el a winicob. Che' ma' melob, ac'ʌ ti cʌjñel ti yan tac bʌ lum ti' tojel lojon c wut.

¹¹ Ñich'tʌben i t'an jini ñup'ulo' bʌ woliyo' bʌ ti ajcʌn. Pʌsʌ jini ñuc bʌ a p'ʌtʌlel. Loc'sañob ti' tojlel jini yomo' bʌ i tsʌnsañob.

¹² Wucyajl yom ma' q'uextʌbeñob i wajleya jini chumulo' bʌ tic t'ejl lojon Cha'an tsi' wajleyetob, c Yum.

¹³ A winicon lojon, tiñʌme'on lojon ti potrero a cha'an. Mi caj c subeñet lojon wocolix a wʌlʌ ti pejtelel ora. Mi caj c subeñob a ñuclel calobil lojon cha'an mi' subeñob i yalobilob ja'el ti lajm ti lajm.