Salmos 75 - Chol: I T’an Dios

Dios mi' contrajin jini xjontolil; mi' coltan jini toj bʌ

¹ Dios, wolic subeñet lojon wocolix a wʌlʌ. Jini ñuc bʌ a melbalob mi' yʌq'ueñon lojon c ña'tan wola' cʌntañon lojon.

² Isujm, che'en Dios. Che' i yorajlelix mic tech meloñel Joñon mi caj c mel winicob x'ixicob ti toj.

³ Anquese woli ti ñijcʌyel pañimil, anquese woliyob ti bʌq'uen jini xchumtʌlob ti pañimil, Xuc'ul tsac wa'choco pañimil, che'en.

⁴ Tsac sube jini mu' bʌ i chañ'esañob i bʌ cha'an mach mi' chañ'esañob i bʌ. Tsac sube jini jontolo' bʌ cha'an mach mi' subob i bʌ ti ñuc.

⁵ Mach la' chañ'esan la' bʌ. Mach la' ñusʌben i t'an año' bʌ i ye'tel.

⁶ Ma'anic mi' tilel lac ñuclel ba' mi' pasel q'uin, Mi ba' mi' bʌjlel q'uin mi ti jochol bʌ lum.

⁷ Awilan Dios jiñʌch Xmeloñel. Mi' peq'uesan juntiquil, mi' yʌq'uen i ñuclel yambʌ.

⁸ Come an vaso ti' c'ʌb lac Yum, i yejtalʌch i mich'ajel. Woli' paj'an jini vino am bʌ ti vaso, wen xʌbil bʌ. Mi' jeb ti' tojlel jontolo' bʌ ti pañimil. Mi caj i japob yic'ot i xixil pejtelel jontolo' bʌ. I yejtalʌch i mich'ajel Dios.

⁹ Pero joñon mi caj j c'ʌyiben i ñuclel i Dios Jacob ti pejtelel ora.

¹⁰ Mi caj c jisʌben i p'ʌtʌlel jini jontolo' bʌ. Mi caj c p'ojlesʌbeñob i p'ʌtʌlel jini tojo' bʌ.