Salmos 74 - Chol: I T’an Dios

P'ulchocobil jini Ch'ujul bʌ Ajñibʌl

¹ Dios, ¿chucoch tsa' junyajlel cʌyʌyon lojon? ¿Chucoch wola' mich'len jini tiñʌme' tac am bʌ ti a jamil?

² Mach mi' ñajʌyel a cha'an a cha'año' bʌ tsa' bʌ a yajca ti wajali, jini mʌmbilo' bʌ a cha'an. Ña'tan Jerusalén ba' tsa' chumleyet.

³ Yom ma' tilel a q'uel ili jejmen bʌ tejclum. Laj contrajob tsi' jisayob jini ch'ujul bʌ a wajñib.

⁴ Tsi' wajleyob jini Ch'ujul bʌ Ajñibʌl a cha'an. Tsi' wa'chocoyob i dioste' tac.

⁵ Lajal tsi' meleyob bajche' sec' te'el ti mate'el.

⁶ Ti jacha tsi' lu' jisayob pejtelel jini i t'ojol jax bʌ te' am bʌ i ts'ijbal.

⁷ Tsi' tsuc'uyob c'ajc cha'an mi' pulel jini Ch'ujul bʌ Ajñibʌl a cha'an. Tsi' p'ulchocoyob jubel ti lum. Tsi' bib'esayob ch'ujul bʌ a wajñib.

⁸ Tsi' yʌlʌyob: Mi caj lac laj jisan chuqui tac mi' yʌc' ti ña'tʌntel Dios, che'ob. Tsi' puluyob pejtelel i yotot tac Dios ti lac lumal.

⁹ Ma'anix chuqui tsa' cʌle cha'an mi' tsictesan mi a cha'añon lojon. Ma'añobix x'alt'añob. Ma'anic majqui yujil baqui ora mi caj i lajmel iliyi.

¹⁰ Dios, ¿jayp'ejl to q'uin mi caj i chʌn cha'len a'leya jini laj contra? ¿Mu' ba caj i chʌn ts'a'libeñet a c'aba'?

¹¹ ¿Chucoch lotol jach a p'ʌtʌlel? Pʌsʌ a p'ʌtʌlel. Jisañob.

¹² Dios, c reyetʌch c'ʌlʌl ti wajali. C'ʌlʌl wʌle woliyet ti coltaya ti' tojlel winicob x'ixicob.

¹³ Jatet tsa' t'oxo majlel jini colem ñajb. Jatet tsa' top'beyob i jol ajin ya' ti colem ja'.

¹⁴ Jatet tsa' jisʌbe i p'ʌtʌlel jini leviatán i yejtal Egipto. Tsa' bic'tesʌbe i bʌc'tal leviatán. Tsa' wʌq'ue i c'ux colem chʌy.

¹⁵ Tsa' mele i loq'uib ja', tsa' jambeyon lojon cuxul bʌ ja'. Tsa' tiquesa colem ja' mach bʌ yujilic tiquin.

¹⁶ A cha'añʌch q'uiñil yic'ot ac'ʌlel. Ya' jach ti' yajñib tsa' wʌc'ʌ jini q'uin yic'ot jini uw.

¹⁷ Jatet tsa' t'oxbeyon lojon lum che' bajche' a wom. A melbalʌch i yorajlel ticwal yic'ot i yorajlel tsʌñal.

¹⁸ C Yum, ña'tan bajche' woli' yʌ'leñet laj contra. Jini tontojo' bʌ woli' ts'a'leñob a c'aba'.

¹⁹ Che'ʌch añon lojon bajche' x'ujcuts c'uxbibil bʌ a cha'an. Mach a wʌc'on lojon ba' mi' c'uxon lojon bʌte'el. Mach ñajʌyic ti a pusic'al ti pejtelel ora jini p'ump'uño' bʌ a cha'an.

²⁰ Chʌn ña'tan jini xuc'ul bʌ a t'an, Come cabʌl mi' p'ojlel jontolil ba' maxto ochemic a t'an.

²¹ Mach a cha' ac'ob ti quisin jini tic'lʌbilo' bʌ. La' i subob i ñuclel a c'aba' jini p'ump'uño' bʌ yic'ot jini tic'lʌbilo' bʌ.

²² Dios, wa'i', subu a bʌ. Ubin bajche' woli' yʌ'leñetob jini tontojo' bʌ c'ʌlʌl mi' sʌc'an c'ʌlʌl mi' yic'an.

²³ Mach a ñusʌbeñob i p'ajoñel a contrajob. Woli' cha'leñob c'am bʌ t'an.