Salmos 72 - Chol: I T’an Dios

I yumʌntel jini toj bʌ rey

¹ Dios, aq'uen i ye'tel jini rey cha'an mi' mel winicob che' bajche' ma' melob. Aq'uen jini ch'iton bʌ i yalobil rey toj bʌ i pusic'al, i pi'ʌl bʌ a pusic'al.

² La' i mel ti toj jini winicob x'ixicob a cha'an. La' i mel ti toj jini p'ump'uño' bʌ a cha'an.

³ La' p'ojlic i wenlel jini año' bʌ ti wits yic'ot bujtʌl tac, Cha'an toj bʌ a pusic'al mu' bʌ a pʌsbeñob.

⁴ La' i mel jini p'ump'uño' bʌ. La' i coltañob. La' i t'uchtan jini mu' bʌ i tic'lañob.

⁵ La' i c'uxbiñetob che' anto q'uin, Che' anto uw, c'ʌlʌl ti pejtelel ora.

⁶ Che' bajche' mi' tilel ja'al ya' ba' tsepel jam, la' tilic jini Rey ba' añon lojon. Che' bajche' ja'al mu' bʌ i mul pañimil, la' tilic.

⁷ Mux i tajob i wenlel jini tojo' bʌ che' woli ti yumʌl. Mux i tajob cabʌl i ñʌch'tʌlel i pusic'al winicob che' anto uw.

⁸ La' i cha'len yumʌl ti pejtelel lum yic'ot ti ñajb. La' i cha'len yumʌl ba' an jini colem ja' c'ʌlʌl ti' joytilel pañimil.

⁹ Mi caj i c'uchchocoñob i bʌ i contrajob ya' ti' tojlel. Mi caj i pʌcchocoñob i bʌ i contrajob ti' ts'ubeñal lum.

¹⁰ Jini reyob año' bʌ ti' ti' colem ñajb mi caj i yochelob ti' wenta. Jini reyob ti Tarsis, yic'ot ti Sabá, yic'ot ti Seba mi caj i ch'ʌmbeñob tilel i majtan.

¹¹ Isujm mi caj i c'uchchocoñob i bʌ pejtelel jini reyob ya' ti' tojlel lac Yum. Winicob x'ixicob ti pejtelel pañimil mi caj i melbeñob i ye'tel.

¹² Come mi' loc'san ti wocol jini p'ump'un bʌ che' mi' c'ajtiben, Yic'ot jini tic'lʌbil bʌ mach bʌ anic majqui mi' coltan.

¹³ Mi' p'untan jini c'un bʌ yic'ot jini p'ump'un bʌ. Mi' coltan jini p'ump'uño' bʌ.

¹⁴ Mi caj i mʌn jini tic'lʌbilo' bʌ yic'ot jini chuculo' bʌ ti jontolil cha'an mi' yʌc'ob ti colel. Mi caj i wen cʌntañob ame lon bejq'uic i ch'ich'el.

¹⁵ Cuxul ti pejtelel ora. Mi caj i yʌq'uentel oro am bʌ ti Sabá. Winicob x'ixicob mi caj i tajob jini Rey ti oración ti pejtelel ora. La' sujbic i p'ʌtʌlel c'ʌlʌl mi' sʌc'an c'ʌlʌl mi' yic'an pañimil.

¹⁶ Mi caj i yʌc' cabʌl i cuch jini cholel ya' ti joctʌl c'ʌlʌl ti pam tac jini wits. Yuquiña cha'an i cuch che' bajche' ti Líbano. Mi caj i p'ojlelob jini año' bʌ ti tejclum tac che' bajche' mi' p'ojlel jam ti lum.

¹⁷ Chʌn an i p'ʌtʌlel i c'aba' ti pejtelel ora. Mux i sujbel i ñuclel che' anto q'uin. Mux i tajob i wenlel winicob x'ixicob ti pejtelel pañimil cha'an jini Rey. Mux caj i yʌlob uts'at i pusic'al.

¹⁸ La' ch'ujutesʌntic lac Yum Dios, i Dios Israel, Mu' bʌ i bajñel mel ñuc tac bʌ i melbal.

¹⁹ Ch'ujutesan i c'aba' am bʌ i ñuclel ti pejtelel ora. La' bujt'ic pejtel pañimil yic'ot i ñuclel. Che'ʌch yom, che'ʌch yom.

²⁰ Jiñʌch i yujtibal i yoración David, i yalobil Isaí.