Salmos 62 - Chol: I T’an Dios

Dios cojach bʌ la caj coltaya

¹ Ñʌch'ʌlon mi cʌq'uen c bʌ Dios. Jini jach Dios mic jac'ben. Tilem ti Dios j coltʌntel.

² Cojach Dios xuc'ulʌch bajche' xajlel. Jiñʌch caj Coltaya. Jiñʌch chan bʌ ts'ajc yilal ba' mi cochel. Ma'anic majqui mi mejlel i tic'lañon ya'i.

³ ¿Jayp'ejl to q'uin mi caj la' contrajiñon? Mi la' lon teñon ti la' pejtelel che' bajche' ñʌcʌl jax bʌ bojte' yic'ot c'unix bʌ corral.

⁴ Mi' temob i t'an cha'an mi' chilbeñon c ñuclel. Mi' mulañob lot. Mi' cha'leñob uts bʌ t'an yilal, Pero mi' cha'leñob p'ajoñel ti' pusic'al.

⁵ Ti' ñʌch'tilel c pusic'al mi cʌq'uen c bʌ Dios, Come tilem ti Dios chuqui wolic pijtan.

⁶ Cojach ti Dios mic taj c xuc'tʌlel yic'ot j c'oc'lel. Jiñʌch c Xajlel, caj Coltaya. Ma'anic majqui mi mejlel i tic'lañon ya' ti' tojlel.

⁷ Cʌyʌlon ti Dios cha'an mic taj j coltʌntel yic'ot c ñuclel. Lajalʌch Dios bajche' ch'entun ba' mic puts'el cha'an mij coltan c bʌ.

⁸ Winicob x'ixicob, ñopola Dios ti pejtelel ora. C'ajtibenla Dios ti wocol t'an pejtel chuqui wola' ña'tan ti a pusic'al, come jiñʌch lac puts'ib.

⁹ Lajalob bajche' ic' jini winicob. Xlotiyajob pejtelel winicob. Che' añob ti balanza mi' ch'ujyelob. Ñumen sejbob bajche' ic'.

¹⁰ Mach la' tic'lan la' pi'ʌlob cha'an mi la' chilbeñob i chubʌ'an. Mach mi la' xujch'iben i chubʌ'an la' pi'ʌlob. Che' mi' p'ojlel la' chubʌ'an mach mi la' lon ac' ti la' pusic'al.

¹¹ Tsi' cha'le t'an Dios. Cha'yajl tsa cubi iliyi: I bajñel an i p'ʌtʌlel Dios.

¹² Jatet jach an i yutslel a pusic'al, c Yum, Come ma' wʌq'ueñob i chobejtʌbal winicob x'ixicob che' bajche' an i ye'tel ti jujuntiquil.