Salmos 6 - Chol: I T’an Dios

Mi' c'ajtin i p'untʌntel che' ti' yorajlel wocol

¹ C Yum, mach yomic cʌlʌx jax ma' mich'leñon che' ma' ju'sʌbeñon c pusic'al.

² C Yum, pʌsbeñon i yutslel a pusic'al, come wen c'uñon jax. Lajmesañon, come wen tsiltsilña c pusic'al cha'an j c'amʌjel.

³ An i ch'ijiyemlel c pusic'al. Awocolic, c Yum, ¿jala to mi caj a coltañon?

⁴ C Yum, yom ma' tilel ba' añon. Ac'ʌyon ti colel. Coltañon come uts a pusic'al.

⁵ Mi tsa' chʌmiyon mach mejlix c sub a ñuclel. ¿Am ba juntiquil ti mucoñibʌl mu' bʌ mejlel i sub a ñuclel?

⁶ Tsa' lujb'ayon ti ajacniyel. Ti jujump'ejl ac'ʌlel mi' yʌch'an c wʌyib ti' ya'lel c wut, cha'an woliyon ti uq'uel.

⁷ Woli' yajpel c wut cha'an i ch'ijiyemlel c pusic'al. Wolic sʌcʌ c'uñ'an cha'an cabʌlob j contrajob.

⁸ Cʌyʌyonix pejteletla mu' bʌ la' cha'len jontolil, Come lac Yum tsi' yubiyon che' bʌ tsac cha'le uq'uel.

⁹ Lac Yum tsa'ix i yubi chuqui tsaj c'ajtibe. Lac Yum mi caj i ñich'tʌbeñon coración.

¹⁰ Pejtel mu' bʌ i contrajiñon mi caj i yubiñob quisin. Mi caj i melob i pusic'al. Mi' caj i bʌc' sujtelob ti quisin.