Salmos 58 - Chol: I T’an Dios

Jontol bʌ juezob

¹ Ubinla, juezob. ¿Toj ba chuqui mi la' wʌl? ¿Mu' ba la' mel winicob x'ixicob ti toj?

² Mach tojic woli la' melob. Ti la' pusic'al woli la' ña'tan jontolil. Woli la' p'ojlesan jontolil ti pañimil.

³ Sojquemobʌch jini jontolo' bʌ c'ʌlʌl che' bʌ tsi' yilayob pañimil. C'ʌlʌl che' alʌlob to, mi' cha'leñob lot.

⁴ Lajal an i venenojlel che' bajche' lucum. Lajalobʌch bajche' lucum mach bʌ yomic i yubin t'an,

⁵ Mach bʌ muq'uic i jac' i yuts'esʌntel Anquese mi' lon uts'esan jini wen yujil bʌ.

⁶ Dios, lajalob yilal bajche' bajlum. C'ʌsbeñob i bʌquel i yej. C Yum, c'ʌsbeñob ja'el i bʌquel i yej i yal bajlum.

⁷ La' sʌc jilicob jini winicob che' bajche' ja' woli bʌ ti jilel. La' jilicob che' bajche' i te'el jalʌjb mach bʌ anic mi' tsictiyel che' mi' jujlel ti jalʌjb.

⁸ La' sajtic che' bajche' joch pupuy. La' jilic che' bajche' mi' chʌmel i yojl to bʌ alʌl.

⁹ Lolom jach pejtel chuqui mi' melob jini jontolo' bʌ. Mi caj i jilelob che' bajche' i pat te' mu' bʌ ti lejmel ti yebal a p'ejt. Che'ʌch yom mi' junyajlel wejlañob majlel Dios ti' mich'ajel.

¹⁰ Tijicña jini toj bʌ. Mi caj i q'uel che' mi' q'uextʌbentel i mul jini jontol bʌ. Mi caj i mujlel i yoc ti' ch'ich'el jini jontolo' bʌ.

¹¹ Mux i ña'tañob pejtel winicob x'ixicob: Añʌch i chobejtʌbal jini tojo' bʌ. Dios, isujm ma' cha'len meloñel ti pañimil.