Salmos 57 - Chol: I T’an Dios

Mi' c'ajtin i coltʌntel cha'an woli' tic'lʌntel

¹ Dios, p'untañon, come ya' ba' añet mic taj c puts'ib. Yom ma' luts'on ya' ti' yebal a wich' yilal che' bajche' mi' luts' i yal i ña'al mut Jinto mi' ñumel jini bʌbʌq'uen bʌ.

² Mi caj c pejcañet, Dios, C'ax Ñuquet Bʌ. Jatet jach ma' ts'ʌctesʌbeñon chuqui tac yom.

³ Ya' ti panchan mi caj a chocbeñon tilel a wutslel yic'ot a sujmlel. Mi caj a coltañon Dios, ti' tojlel jini mu' bʌ i jop' t'an tij contra.

⁴ Joyolon ti cabʌl bajlum yilal. Añon ti ojlil ba mich'ob winicob. Lajalob bajche' bajlum am bʌ jay bʌ i bʌquel i yej. Mi' c'ʌñob i yac' che' bajche' jay bʌ espada.

⁵ Dios, la' c'uxbintiquet ti' chañelal panchan. La' tsictiyic a ñuclel ti' pam pejtelel pañimil.

⁶ Tsa'ix i lon ña'tayob i jop'beñon c mul. Tsi' bʌc'tesayoñob. Tsi' top'oyob ch'en cha'an mi' chucoñob. Ya' jach tsa' cha' yajliyob ba' tsi' top'oyob.

⁷ C Dios, wen xuc'ul c pusic'al. Mi caj j c'ʌyibeñet a ñuclel.

⁸ La' ch'ojyicon, la' c ñijcan jini amʌy yic'ot arpa. La' ch'ojyicon che' ti wen sʌc'ajel.

⁹ C Yum, mi caj c subeñet wocolix a wʌlʌ wʌ' ti' tojlel winicob x'ixicob. Mi caj j c'ʌyiñet ti' tojlel gentilob.

¹⁰ Come mi' tsictiyel jini ñuc bʌ a c'uxbiya c'ʌlʌl ti panchan. C'ʌlʌl ba'an tocal ya'an i xuc'tilel a pusic'al.

¹¹ Dios, la' tsictiyic a ñuclel c'ʌlʌl ti panchan. La' tsictiyic a ñuclel ti pejtelel pañimil.